ព្រឹកស្អែក សម្តេចតេជោ នឹងអញ្ជើញសម្ពោធអគាររដ្ឋបាលថ្មីនៃអគ្គនាយកដ្ឋានគយ និងរដ្ឋាករកម្ពុជា

សម្តេចអគ្គមហាសនាបតីតជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា នឹងអញ្ជើញជាអធិបតីភាពដ៏ខ្ពង់ខ្ពស់សម្ពោធដាក់ឲ្យប្រើប្រាស់ជាផ្លូវការអគាររដ្ឋបាលថ្មីនៃអគ្គនាយកដ្ឋានគយ និងរដ្ឋាករកម្ពុជានៅព្រឹកថ្ងៃទី២៣ ខែធ្នូ ឆ្នាំ២០២១ ស្អែកនេះ។

អគាររដ្ឋបាលអគ្គនាយកដ្ឋានគយ និងរដ្ឋាករកម្ពុជា ស្ថិតនៅមហាវិថីព្រះនរោត្តមសង្កាត់ផ្សារថ្មី៣ ខណ្ឌដូនពេញ រាជធានីភ្នំពេញ។ អគាររដ្ឋបាលអគ្គនាយកដ្ឋានគយ និងរដ្ឋាករកម្ពុជា បានចាប់ផ្តើមសាងសង់នៅខែកុម្ភៈឆ្នាំ ២០១៧ បញ្ចប់នៅ ខែកក្កដាឆ្នាំ ២០២០ មានកម្ពស់៣៥ជាន់(ដោយមិនគិតជាន់ក្រោមដី២ជាន់)កម្ពស់១២០ម៉ែត្រ មានបណ្តោយប្រវែង ៥៤ម៉ែត្រ ទទឹងប្រវែងជាង២៦ម៉ែត្រ។

ដោយឡែក ហេដ្ឋារចនាសម្ព័ន្ធអគារនេះវិញ គឺរៀបចំបង្កលក្ខណៈភាពងាយស្រួលសម្រាប់បំពេញការងារដោយមានចំណត៨ជាន់(រួមទាំងជាន់ក្រោមដី២ជាន់) អាចចតរថយន្ត បាន ១៤២ គ្រឿង និងទោចក្រយា​នយន្ត ១០២ គ្រឿង បញ្ជរព័ត៌មាន(ជាន់ទី១) ច្រកចេញ-ចូលតែមួយ(ជាន់ទី៦) សាលប្រជុំ និងបន្ទប់ប្រជុំ សាលប្រជុំធំ ២ (សម្រាប់១៩៨ នាក់ និងសម្រាប់១២៨នាក់ និងបន្ទប់ប្រជុំតូចមួយចំនួន ការិយា​ល័យ២៣ជាន់ ការិយាល័យអគ្គនាយក បន្ទប់ទទួលភ្ញៀវ ការិយាល័យអគ្គនាយករង ការិយាល័យថ្នាក់ដឹកនាំ នា​យ​ក​ដ្ឋាន និងការិយាល័យមន្រ្តី អាហារដ្ឋាន(ជាន់ទី២០) ក្លឹបហាត់ប្រាណ ស្ទីម និង សូណា(ជាន់ទី៣១) ស្កាយបារ (ជាន់ទី៣៣ និង៣៤)។

គួររំលឹកជូនថា អគ្គនាយកដ្ឋានគយ និងរដ្ឋាករកម្ពុជា ត្រូវបានបង្កើតឡើងក្នុងសម័យសង្គមរាស្ត្រនិយមដោយព្រះរាជក្រមលេខ៦៦១ចុះថ្ងៃទី២៩ ខែមិថុនា ឆ្នាំ១៩៥១។ កិច្ចដំណើរការរបស់អគ្គនាយកដ្ឋានគយនិងរដ្ឋាករ ត្រូវបានបញ្ឈប់ពីឆ្នាំ១៩៧៥ ដល់ឆ្នាំ១៩៧៩ ក្រោមរបបខ្មែរក្រហម ។ អង្គភាពនេះ បានចាប់ដំណើរការឡើងវិញនៅថ្ងៃទី១៣ ខែកក្កដា ឆ្នាំ១៩៧៩ ក្រោមឱវាទក្រសួងពាណិជ្ជកម្ម ។

អង្គភាពនេះ ត្រូវបានផ្ទេរទៅនៅក្រោមឱវាទក្រសួងសេដ្ឋកិច្ច និងហិរញ្ញវត្ថុថ្ងៃទី ១១ ខែ មិនា ឆ្នាំ១៩៨៨។ ទីចាត់ការគយ និងរដ្ឋាករ ត្រូវបានដំឡើង ជាអគ្គនាយកដ្ឋានគយ និងរដ្ឋាករកម្ពុជា(អគរ)ថ្ងៃទី១៥ ខែកញ្ញា ឆ្នាំ២០០៨ ហើយជារដ្ឋបាលសាធារណៈស្ថិតក្រោមឱវាទក្រសួងសេដ្ឋកិច្ច និងហិរញ្ញវត្ថុ មានភារកិច្ចគ្រប់គ្រង ត្រួតពិនិត្យ និងប្រមូលពន្ធអាករគ្រប់ប្រភេទលើទំនិញនាំចេញ និងនាំចូល បង្ការ និងបង្ក្រាបបទល្មើសគ្រប់ប្រភេទ ជាពិសេស បទល្មើសគយ បង្កភាពងាយស្រួលដល់ពាណិជ្ជកម្មអន្តរជាតិ៕

អត្ថបទ ៖ ណារី