លោក ឆាយ សុផល៖ ក្នុងសង្គមព័ត៌មានកម្ពុជា តើពេលណាទើបអស់ក្រុមប្រភេទនេះ?

ស្របពេលភ្នាក់ងារព័ត៌មានតាមបណ្ដាញសង្គម កើនឡើងច្រើន ដោយពួកគេនិយមតាមប្រមាញ់ព័ត៌មាន និងធ្វើការផ្សាយផ្ទាល់តាមទំព័រ Facebook របស់ខ្លួនឯង អំពី សន្តិសុខសង្គម ដូចជាករណី គ្រោះអគ្គិភ័យ គ្រោះថ្នាក់ចរាចរណ៍ ជម្លោះបុគ្គលក្នុងគ្រួសារ និងករណីធ្វើអត្តឃាត ជាដើមនោះ សាស្ត្រាចារ្យ និងមន្ត្រីក្រសួងព័ត៌មាន លោក ឆាយ សុផល បានលើកជាចម្ងល់ នៃការបន្តមានវត្តមានរបស់ភ្នាក់ងារសារព័ត៌មាន មិនមានវិជ្ជាជីវៈ ខណៈលោកធ្លាប់បានបណ្ដុះបណ្ដាលក្រុមអ្នកព័ត៌មានអាជីពជាច្រើនកន្លងទៅហើយ។

លោក ឆាយ សុផល អនុរដ្ឋលេខាធិការក្រសួងព័ត៌មាន នៅព្រឹកថ្ងៃទី២៣ ខែកុម្ភៈ ឆ្នាំ២០២២ នេះ បានលើកឡើងថា៖ “ក្នុងសង្គមព័ត៌មានកម្ពុជា តើពេលណាទើបអស់ក្រុមប្រភេទនេះ? បណ្តុះបណ្តាលមួយជំនាន់រួច ក៏ស្រាប់តែចេញមួយជំនាន់ថ្មីចែស!”

​សាស្ត្រាចារ្យ​ផ្នែក​សារព័ត៌មាន និង​ជា​អ្នកនិពន្ធ​សៀវភៅ​ រូបនេះ បានបញ្ចប់ប្រយោគ ១ឃ្លាថា៖ “អ្នកសារព័ត៌មានអាជីព vs អ្នករកលុយតាមហ្វេសប៊ុកជ្រកម្លប់ព័ត៌មាន!”

លោក មាស សុភ័ណ្ឌ អនុរដ្ឋលេខាធិការ និងជាអ្នកនាំពាក្យក្រសួងព័ត៌មាន បានមានប្រសាសន៍ប្រាប់ “កម្ពុជាថ្មី” ថា ដោយសារការរីកចម្រើននៃប្រព័ន្ធព័ត៌មានវិទ្យា ប្រជាពលរដ្ឋកម្ពុជាមានសិទ្ធិប្រើប្រាស់បណ្ដាញសង្គមយ៉ាងទូលំទូលាយ។ អ្នកខ្លះប្រើប្រាស់បណ្ដាញសង្គម ដើម្បីការងារ ទំនាក់ទំនង និងអាជីវកម្មជាដើម ឯអ្នកមួយចំនួន មិនបានប្រើប្រាស់បណ្ដាញសង្គមដោយត្រឹមត្រូវ ឬផ្ដល់ជាប្រយោជន៍ដល់សង្គមទេ។

លោក មាស សុភ័ណ្ឌ មានប្រសាសន៍ថា៖ “ខ្ញុំយល់ឃើញថា ក្នុងនាមជាអ្នកប្រើប្រាស់បណ្ដាញសង្គម ដើម្បីចែករំលែកព័ត៌មាន ព្រឹត្តិការណ៍ ឬហេតុការណ៍អ្វីមួយ គួរតែពិនិត្យ និងយកចិត្តទុកដាក់នូវការចែករំលែកព័ត៌មានពិត មានប្រភពច្បាស់លាស់ ឬចែករំលែកអ្វីដែល​​ប្រកបដោយការយល់ដឹង និងភាពទទួលខុសត្រូវ ដើម្បីចៀសវាងការចែករំលែករបស់ខ្លួនប្រែជាខុសឆ្គង ឬប៉ះពាល់ដល់សិទ្ធិរបស់អ្នកដទៃ”។

មន្ត្រីក្រសួងព័ត៌មានខាងលើ លើកឡើងថា ករណីប្រជាពលរដ្ឋដែលមិនមែនជាសារអ្នកព័ត៌មាន មិនស្ថិតក្រោមការគ្រប់គ្រងរបស់ក្រសួងព័ត៌មាន ដែលអាចហៅមកអប់រំណែនាំបានទេ។ ប៉ុន្តែ​បើពួកគាត់ប្រើប្រាស់បណ្ដាញសង្គមមិនត្រឹមត្រូវ ឬប៉ះពាល់ដល់សេចក្ដីថ្លៃថ្នូរ ឬសិទ្ធិអ្នកដទៃ នោះ​គាត់ត្រូវ​​​ទទួលខុសត្រូវចំពោះមុខច្បាប់ ដោយអាចរងបណ្ដឹងទៅដល់អាជ្ញាធរ ឬតុលាការ។

គួរបញ្ជាក់ថា កន្លង ក្រសួងព័ត៌មាន ធ្លាប់បានណែនាំ រហូតដល់ដកអាជ្ញាបណ្ណ ឬសិទ្ធិចេញផ្សាយព័ត៌មានរបស់ក្រុមព័ត៌មានមួយចំនួនដែលធ្វើការផ្សព្វផ្សាយព័ត៌មានមិនមានវិជ្ជាជីវៈ ឬរហូតអនុវត្តការងារលើសសមត្ថកិច្ចរបស់ខ្លួន ក៏ដូចជារំលោភសិទ្ធិឯកជនភាពរបស់ប្រភព និងមហាជនជាដើម៕

អត្ថបទ៖ ច័ន្ទ វីរៈ