ខេត្តព្រះសីហនុ​ សាងសង់ប៉ម​ ១២ ​សម្រាប់ឆ្មាំសមុទ្រ​ យាមកាម​សុវត្ថិ​ភាព​ភ្ញៀវ​ទេសចរ​

អ្នកឧកញ្ញ៉ា ទ្រីភាព បានសាងសង់ប៉មចំនួន ១២ សម្រាប់ឆ្មាំសមុទ្រ យាមកាមពិនិត្យសុខសុវត្ថិភាពភ្ញៀវទេសចរជាតិ និងអន្តរជាតិមកលេងកំសាន្តនៅឆ្នេរសមុទ្រក្នុងក្រុងព្រះសីហនុ។

នៅព្រឹកថ្ងៃទី ១៤ ខែមីនា លោក គួច ចំរើន អភិបាល នៃគណៈអភិបាលខេត្តព្រះសីហនុ និងអ្នកឧកញ៉ា ទ្រី ភាព អញ្ជើញចូលរួមក្នុងពិធីប្រគល់ ទទួលប៉មយាមចំនួន១២ប៉ម នៅឆ្នេរអូរឈើទាល២ ស្ថិតក្នុងសង្កាត់លេខ៤ ក្រុងព្រះសីហនុ ដោយមានការចូលរួមពីលោកអភិបាលរងខេត្ត លោកអភិបាលក្រុងព្រះសីហនុ ប្រធានមន្ទីរ អង្គភាព កងកម្លាំងប្រដាប់អាវុធ បុគ្គលិកសម្អាតឆ្នេរ និងឆ្មាំឆ្នេរសមុទ្រ។

លោក គួច ចំរើន បានថ្លែងអរគុណដល់អ្នកឧកញ៉ា ទ្រី ភាព ដែលបាន​ជួយឧបត្ថម្ភការសាងសង់ប៉មចំនួន ១២ សម្រាប់ឆ្មាំសមុទ្រ យាមកាមពិនិត្យសុខសុវត្ថិភាពភ្ញៀវទេសចរជាតិ និងអន្តរជាតិមកលេងកម្សាន្តនៅឆ្នេរសមុទ្រក្នុងក្រុងព្រះសីហនុ។

លោក ឃាង ភិរម្យ អ្នកនាំពាក្យសាលាខេត្តព្រះសីហនុ បានឱ្យដឹងថា ប៉មចំនួន ១២ សាងសង់នៅតាមបណ្ដោយមាត់ឆ្នេរសមុទ្រ សម្រាប់ឆ្នាំសមុទ្រប្រើប្រាស់យាមកាមការពារសុវត្ថិភាពដល់ភ្ញៀវទេសចរណ៍ជាតិ អន្តរជាតិដែលមកលេងកម្សាន្តនៅតំបន់ឆ្នេរក្នុងក្រុងព្រះសីនុ។

លោក ឃាង ភិរម្យ បញ្ជាក់ថា នៅចំពោះមុខ គឺចំនួន ១២ ប៉ុន្តែលទ្ធភាពនៅពេលខាងមុខ រដ្ឋបាលខេត្តនឹងធ្វើបន្ថែមឱ្យសមមាត្រទៅនឹងឆ្មាំឆ្នេរដែលមាន ខណៈដែលលោកមិនទាន់បញ្ជាក់ពីចំនួនថវិកាសាងសង់នោះទេ ប៉ុន្តែជាការសាងសង់ឡើងក្រោមជំនួយឧបត្ថមរបស់អ្នកឧកញ៉ា ទ្រី ភាព៕