ដំណឹងសោកសៅ! កូនប្រុសរបស់ Cristiano Ronaldo ត្រូវបាត់បង់ជីវិត

ខ្សែប្រយុទ្ធ Cristiano Ronaldo របស់ក្លិបបិសាចក្រហម Manchester United និងដៃគូ Georgina Rodriguez បានប្រកាសពីការស្លាប់របស់កូនប្រុសពួកគេដោយនិយាយថា វាជាក្តីឈឺចាប់ដ៏ធំធេងបំផុតដែលឪពុកម្តាយគ្រប់រូបពិតជាដឹង។

កីឡាករអន្តរជាតិព័រទុយហ្គាល់វ័យ៣៧ឆ្នាំរូបនេះនិងដៃគូ Rodriguez វ័យ២៨ឆ្នាំ កំពុងរង់ចាំការចាប់កំណើតកូនភ្លោះ ប៉ុន្តែពេលនេះ បានបាត់បង់កូនប្រុសម្នាក់ទៅហើយ។

យ៉ាងណាក្តី កូន​ស្រី​របស់​ពួក​គេ​នៅ​រស់​រាន​មាន​ជីវិត ហើយ​ពួក​គេ​​និយាយ​ថា ការចាប់​កំណើត​របស់​នាងនឹងផ្តល់នូវ​កម្លាំង​ចិត្តឲ្យ​យើង​រស់​នៅ​ពេល​នេះ ​ដោយ​ក្តី​សង្ឃឹម និង​សុភមង្គល។

Ronaldo បានបង្ហោះក្នុង Instagram​ ថា “វាគឺជាក្តីសោកសៅជាទីបំផុតដែលយើងប្រកាសពីការស្លាប់របស់កូនប្រុសរបស់យើង។ វាជាការឈឺចាប់ដ៏ធំធេងបំផុតរបស់ឪពុកម្តាយ មានតែកំណើតរបស់កូនទេដែលធ្វើឲ្យយើងមានកម្លាំងក្នុងការរស់នៅពេលនេះដោយក្តីសង្ឃឹមនិងសុភមង្គល។ យើងខ្ញុំសូមថ្លែងអំណរគុណដល់វេជ្ជបណ្ឌិត និង គិលានុបដ្ឋាយិកា សម្រាប់ការយកចិត្តទុកដាក់ និង ការគាំទ្រ។ យើងត្រូវបានបំផ្លាញនិងស្នើសុំភាពឯកជននៅគ្រាលំបាកនេះ។ ក្មេងប្រុសរបស់យើង អ្នកជាទេវតារបស់យើង។ យើងនឹងស្រឡាញ់អ្នកជារៀងរហូត”។

ភ្លាមៗនេះដែរ គ្រប់សារព័ត៌មានអន្តរជាតិ មិនបានពន្យល់លម្អីតពាក់ព័ន្ធការទទួលមរណភាពនេះទេ។

គួរបញ្ជាក់ថា អ្នក​ទាំង​ពីរ​បាន​ប្រកាស​ពី​ការ​មាន​ផ្ទៃ​ពោះ​កាល​ពី​ខែ​តុលា។

Ronaldo មានកូនប្រុសឈ្មោះ Cristiano Jr ដែលកើតក្នុងឆ្នាំ ២០១០ និងកូនភ្លោះ Eva និង Mateo កើតនៅឆ្នាំ ២០១៧។ គាត់ក៏មានកូនស្រីម្នាក់ជាមួយ Rodriguez ផងដែរ ឈ្មោះថា Alana Martina ដែលកើតនៅឆ្នាំ២០១៧៕

ប្រែសម្រួល៖ Vann Vann

ប្រភព៖ BBC

ចុចអាន៖ កីឡាករ៣រូប ឈ្នះពានធំៗ ក្នុងព្រឹត្តិការណ៍ យូរ៉ូ