រដ្ឋាភិបាល និងពលរដ្ឋចំណេញថវិកា ក្រោយការលើកលែងកាតព្វកិច្ចពាក់ម៉ាស​

ចាប់តាំងពីកូវីដ-១៩ លុកលុយនៅលើសកលលោក អស់រយៈពេលពីរឆ្នាំ បានបង្កការរិតត្បិតសេរីភាពក្នុងការធ្វើដំណើរ និងការប្រាស្រ័យទាក់ទងគ្នា ដើម្បីការពារការចម្លងពីមនុស្សម្នាក់ទៅម្នាក់ទៀត។ នៅគ្រានៃការរីករាលដាលខ្លាំង រាជរដ្ឋាភិបាល តម្រូវឱ្យពលរដ្ឋពាក់ម៉ាសជាប្រចាំ និងបាញ់អាល់កុលរៀងរាល់ចាប់កាន់ ឬប៉ះពាល់របស់អ្វី ដើម្បីការពារ និងសម្លាប់មេរោគដែលអាចកើតមានដោយប្រការណាមួយ។

នៅគ្រានេះដែរ ក្រៅពីចំណាយថវិកាលើតម្រូវការស្បៀងអាហារ ពលរដ្ឋមានកាតព្វកិច្ចត្រូវចំណាយលុយទិញម៉ាសពាក់ រាល់ការចេញដំណើរទៅក្រៅគ្រប់ពេល។

សម្តេចតេជោ ហ៊ុន សែន បានថ្លែងថា ការតម្រូវឱ្យពាក់ម៉ាសធ្វើឱ្យប្រជាពលរដ្ឋចំណាយថវិកាអស់ជាច្រើន។ សម្តេចបន្តថា« ជួនកាលមិនហ៊ានទិញខោអាវឱ្យកូនពាក់ទេ ប៉ុន្តែត្រូវទិញម៉ាសមករក្សាទុក ដើម្បីពាក់ជាកាតព្វកិច្ច»។

នៅក្នុងបរិបទវិបត្តិកូវីដនេះ រាជរដ្ឋាភិបាល បានចំណាយលុយទិញម៉ាសក្នុងមួយថ្ងៃអស់ប្រមាណ ១០ម៉ឺនដុល្លារ ដោយក្នុងមួយខែ ត្រូវចំណាយអស់ ៣លានដុល្លារ នៅទូទាំងប្រទេស។ តាមការប៉ាន់ស្មាន មនុស្សជាង ១០លាននាក់ បានពាក់ម៉ាសជារៀងរាល់ថ្ងៃ។ នេះបើតាមប្រសាសន៍សម្តេចតេជោ ហ៊ុន សែន នៅក្នុងពិធីប្រគល់-ទទួល អំណោយវ៉ាក់សាំង កូវីដ-១៩ ចំនួន ១លាន៥ម៉ឺន៦ពាន់ដូស ដែលជាអំណោយរបស់រដ្ឋាភិបាល និងប្រជាជនអ៊ីតាលី កាលពីថ្ងៃទី ២៥ ខែ មេសា ឆ្នាំ ២០២២។

ចំណែកពលរដ្ឋ ក៏ត្រូវចំណាយប្រចាំថ្ងៃ ទៅលើការទិញម៉ាសពាក់ផងដែរ។ គ្រួសារខ្លះមានសមាជិកច្រើន ត្រូវចំណាយអស់ម៉ាសច្រើនក្នុងមួយថ្ងៃ។ ដោយសារមើលឃើញអំពីការចំណាយដ៏ច្រើនរបស់ពលរដ្ឋ រាជរដ្ឋាភិបាល បានពន្លឿនការចាក់វ៉ាក់សាំង ដើម្បីបង្កើនភាពស៊ាំនៅក្នុងសហគមន៍។ រហូតមកដល់ពេលនេះ កម្ពុជាសម្រេចបានការចាក់វ៉ាក់សាំងប្រមាណជាង ៩០ភាគរយហើយ លើពលរដ្ឋទូទាំងប្រទេស ដែលចំនួននេះ បានបង្កើតភាពស៊ាំនៅក្នុងសហគមន៍ ធ្វើឱ្យការឆ្លងធ្លាក់ចុះ ស្ទើតែអស់លែងមានអ្នកឆ្លងប្រចាំថ្ងៃ។

ឃើញដូច្នេះ នៅថ្ងៃទី ២៦ ខែមេសា រាជរដ្ឋាភិបាល ក៏បានប្រកាសលើកលែងកាតព្វកិច្ចពាក់ម៉ាស នៅទូទាំប្រទេស ចំពោះទីកន្លែងសាធារណៈ និងទីកន្លែងចំហនានា ហើយទុកឱ្យប្រជាជនទាំងអស់ ជាអ្នកសម្រេចថាតើ គួរពាក់ម៉ាស ឬមិនពាក់ម៉ាស។

សម្តេចតេជោ នាយករដ្ឋមន្រ្តី បានសង្កត់ធ្ងន់ថា ការដកកាតព្វកិច្ចពាក់ម៉ាស គឺជាការចូលរួមចំណែកកាត់បន្ថយការចំណាយរបស់ក្រុមគ្រួសារនីមួយៗ និងសង្គមជាតិរបស់យើង។

ទោះយ៉ាងណា រាជរដ្ឋាភិបាល នៅតែបន្តលើកទឹកចិត្តឱ្យមានការពាក់ម៉ាស ក៏ប៉ុន្តែមិនមែនជាកាតព្វកិច្ច ដែលត្រូវតែពាក់នោះទេ។

សម្តេចមានប្រសាសន៍ថា «យើងនឹងអាចត្រឡប់ទៅពាក់ម៉ាសជាកាតព្វកិច្ចវិញ ប្រសិនបើមានករណីឆ្លងកើនឡើង»។ ជាមួយគ្នានេះ សម្តេចបានជំរុញអ្នកដែលមិនទាន់បានទទួលវ៉ាក់សាំងដូសទី៣ ត្រូវទៅកាន់កន្លែងណា ដែលមានការផ្គត់ផ្គង់វ៉ាក់សាំង ចាក់ឱ្យបានគ្រប់ៗគ្នា ដើម្បីបង្កើនភាពស៊ាំក្នុងសហគមន៍បន្ថែមទៀត៕