សិស្សថ្នាក់ទី៩ ចាប់ផ្តើមប្រឡងឌីប្លូម​នៅព្រឹកនេះ មានចំនួនជាង១៧ម៉ឺននាក់

ក្រសួងអប់រំ យុវជន និងកីឡាបានបើកការប្រឡងសញ្ញាបត្រមធ្យមសិក្សាបឋមភូមិ​ឬឌីប្លូមនៅថ្ងៃទី២៤​ខែតុលាឆ្នាំ២០២២នេះ ជាមួយវិធានការការពារការឆ្លងរាលដាលជំងឺកូវីដ១៩។

លោក រស់ សុវា ចា អ្នកនាំពាក្យក្រសួងអប់រំយុវជននិងកីឡាបានឱ្យដឹងថា ឆ្នាំនេះមានបេក្ខជនចូលរួមប្រឡងឌីប្លូមសរុប ១៧៤ ៧២៦ នាក់ ស្រី ៩៥ ១២៧ នាក់ក្នុងនោះសិស្សចំណេះទូទៅ ១៧៣ ៤៦៦ នាក់ ស្រី ៩៤ ៨៧៦ នាក់បេក្ខជន​ស្វៃរិន ១៣៦ នាក់ ស្រី ៤៥ នាក់ បេក្ខជនបំពេញវិជ្ជា ១ ០៧៦ នាក់ ស្រី ១៩២ នាក់ បេក្ខជនគថ្លង់ ២៩ នាក់ ស្រី ០៩ នាក់ បេក្ខជនពិការភ្នែក ១៩ នាក់ ស្រី ០៥ នាក់ដោយមានមណ្ឌលប្រឡងសរុប ១ ៧២៣ និងបន្ទប់សរុប ៧ ៨១៦។

លោក រស់ សុវាចា បានបន្តថា ចំនួនបេក្ខជនឆ្នាំនេះ បើធៀបទៅនឹងឆ្នាំមុនឃើញថា មានការកើនឡើងជាង១០០នាក់ ខណៈឆ្នាំមុនមានបេក្ខជនចំនួន១៦២ ៥៨៩ នាក់នារី ៨៧ ៨៧១នាក់ចែកជា១៧២២មណ្ឌលនិង៧៣២៧ បន្ទប់។

លោកបានបន្តទៀតថា សម្រាប់ការប្រឡងឌីប្លូមឆ្នាំនេះក្រសួងអប់រំនៅតែបន្តប្រគល់សិទ្ធិអំ ណាច និងការទទួលខុស​ត្រូវទាំងស្រុងជូនគ្រឹះស្ថានមធ្យមសិក្សាសាធារណៈនិងឯកជននីមួយៗ ដែលមានអនុវិទ្យាល័យ និងវិទ្យាល័យក្នុង​ការរៀបចំដំណើរការប្រឡង ដោយខ្លួនឯងពោលគឺចាប់តាំងពីការរៀបចំប្រធានវិញ្ញាសា ដំណើរការសំណេរ កំណែ ស្រង់បូកពិន្ទុនិងការប្រកាសលទ្ធផលប្រឡងជាដើម។

 បើតាមក្រសួងអប់រំមុខវិជ្ជា ដែលត្រូវប្រឡងមានចំនួន ១០មុខវិជ្ជា ត្រូវជា១១ វិញ្ញាសា រួមមានតែងសេចក្ដី .គីមីវិទ្យា .ផែនដីនិងបរិស្ថានវិទ្យា .រូបវិទ្យា .ភូមិវិទ្យា សីលធម៌-ពលរដ្ឋវិជ្ជាគណិតវិទ្យា ការសរសេរតាមអាន  ជីវវិទ្យា ប្រវត្តិវិទ្យា និង ភាសាបរទេស ។

ចំពោះរបបពិន្ទុដែលបេក្ខជនទទួលបានជាអតិបរមាមានចំនួន៤៤៥ពិន្ទុ និងរបបពិន្ទុប្រចាំឆ្នាំ១០០ពិន្ទុសរុបពិន្ទុទាំងអស់ ៥៤៥ពិន្ទុ។ ប៉ុន្តែដោយសារភាសាបរទេសជាវិញ្ញាសាស្ម័គ្រដូចនេះពិន្ទុប្រឡងជាប់​គឺ៥៤៥ដក២៥រួចចែក​នឹង២ស្មើនឹង​២៦០ពិន្ទុសំរាប់បេក្ខជនចំណេះទូទៅនិងបំពេញវិជ្ចា។ចំពោះបេក្ខជនស្វ័យរិនពិន្ទុជាប់៤៤៥​ដក២៥ចែកនឹង២ស្មើនឹង​២១០ពិន្ទុ។

ពិន្ទុដែលទទួលបាននិទ្ទេសមធ្យមគឺចាប់ពី២៦០ដល់៣៣៧ពិន្ទុ និទ្ទេសល្អបង្គួរចាប់ពី៣៣៨ដល់៤១៥​ពិន្ទុនិង​និទ្ទេសល្អចាប់៤១៦​ពិន្ទុឡើងទៅសម្រាប់បេក្ខជនចំណេះទូទៅនិងបំពេញវិជ្ជា។ ចំពោះបេក្ខជនស័្វយ​រិនពិន្ទុចាប់​ពី២១០ដល់២៧២ទទួលនិទ្ទេសមធ្យម។ពិន្ទុចាប់ពី២៧៣ដល់៣៣៥​ទទួលបាននិទ្ទេសល្អបង្គួរ​និងពិន្ទូចាប់ពី៣៣៦​ឡើងទៅទទួលបាននិទ្ទេសល្អ។

គួរបញ្ជាក់ថា កាប្រកាសលទ្ធផលប្រឡងសញ្ញាបត្រមធ្យមសិក្សាបឋមភូមិនៅឆ្នាំនេះ នឹងប្រព្រឹត្តិទៅនៅថ្ងៃទី ០១ វិច្ឆិកាឆ្នាំ២០២២៕ អត្ថបទ៖ សំអឿន