ការបោះជំរំកាយរឹទិ្ធថ្នាក់ជាតិលើកទី៥ ឆ្នាំ២០២២ ចែកចេញ ១៣អនុស្ថានីយសកម្មភាពជំនាញ

ក្រសួងអប់រំ យុវជន និងកីឡា នៅព្រឹកនេះ បានឱ្យដឹងថា តាមផែនការប្រតិបត្តិប្រចាំ២០២២ កាយរឹទ្ធិជាតិកម្ពុជាបានរៀបចំ ការបោះជំរំកាយរឹទ្ធិថ្នាក់ជាតិលើកទី៥ ក្រោមប្រធានបទ “កាយរឹទ្ធិ និងបំណិនសតវត្សរ៍ទី២១” ចែកចេញ ១៣អនុស្ថានីយសកម្មភាពជំនាញ។

ពិធីបើកប្រារព្ធក្រោមអធិបតីភាព បណ្ឌិត ស៊ាន បូរ៉ាត រដ្ឋលេខាធិការក្រសួងអប់រំ យុវជន និងកីឡា និងជាអនុប្រធានកាយរឹទ្ធិជាតិកម្ពុជា និង អ្នកម្នាង ស៊ីសុវត្ថិ កន្ធីរ៉េត អគ្គស្នងការរងនៃសមាគមកាយឫទ្ធិនារីកម្ពុជា។

“ការបោះជំរំកាយរឹទិ្ធថ្នាក់ជាតិលើកទី៥” មានប្រតិភូកាយរឹទ្ធិមកពី ២៥រាជធានីខេត្ត សមាគមកាយឫទ្ធិនារីកម្ពុជា និងយុវជនស្ម័គ្រចិត្ត ចំនួនសរុប ៤៥០នាក់។ កម្មវិធីនេះប្រព្រឹត្តទៅរយៈពេល ៥ថ្ងៃ រហូតដល់ថ្ងៃទី៣០ ខែតុលា ឆ្នាំ២០២២ ដោយបានបែងចែកជា ៤អនុជំរំ ស្មើនឹង ១២កង ក្នុង១កង មាន៤ល្បាត និង១ល្បាតមានសមាជិក ៨នាក់។ កម្មវិធីបោះជំរំកាយរឹទិ្ធថ្នាក់ជាតិលើកទី៥ រៀបចំឡើងដោយតម្រូវឱ្យប្រតិភូកាយរឹស្ថានីយទិ្ធចូលរួមធើ្វសកម្មភាពទៅតាមស្ថានីយចំនួន៥ទីតាំង ដោយចែកចេញ ១៣អនុស្ថានីយសកម្មភាពជំនាញ ដែលបានឆ្លើយតបទៅជំនាញសតវត្សរ៍ទី២១ ក្នុងនោះរួមទាំងបន្ថែមសកម្មភាពក្នុងជំរំ និងសកម្មភាពនៅតាមទីវាលរួមមាន៖

១-ស្ថានីយសកម្មភាពជំនាញទន់ ចែកចេញជា ៣ អនុស្សាវរីយ៍

២-ស្ថានីយភូមិសាកល ចែកចេញជា ៣ អនុស្ថានីយ

៣-ស្ថានីយវិទ្យាសាស្ត្រ ព័ត៌មានវិទ្យា ចែកចេញជា ៣ អនុស្ថានីយ

៤-ស្ថានីយភាពជាអ្នកដឹកនាំ ចែកចេញជា ២ អនុស្ថានីយ

៥-ស្ថានីយទស្សនកិច្ចសិក្សា និងគម្រោងសហគមន៍ ចែកចេញជា ២ អនុស្ថានីយ

លើសពីនេះ សកម្មភាពតាមស្ថានីយ ប្អូនៗកាយរឹទ្ធិទាំងអស់ត្រូវសិក្សាលើបំណិនជីវិត តាមរយៈធើ្វសកម្មភាពក្នុងជីវភាពជំរំ (Camp Life) ដូចជាការស្នាក់នៅ និងធើ្វសកម្មភាពក្នុងប្រព័ន្ធកងល្បាតរួមគ្នា ដោយត្រូវបានបែងចែកជា ៤អនុជំរំ រួមមាន៖ ១. អនុជំរំប្រាសាទក្រោលរមាស ២. អនុជំរំប្រាសាទយាយព័ន្ធ ៣. អនុជំរំប្រាសាទតោ និង៤. អនុជំរំប្រាសាទសំបូរព្រៃគុក៕