Selena Gomez និយាយរឿងឡើងទម្ងន់ថា នាងមិនមែនជាតារាម៉ូដែលទេ

តារាសម្តែង និងច្រៀង Selena Gomez សារភាពថា ការឡើងទម្ងន់ថេររបស់នាងគឺបណ្ដាលមកពីផលប៉ះពាល់នៃថ្នាំ Lupus ដែលនាងកំពុងទទួល និងនាងថែមទាំងបានចែករំលែកអំពីភាពចម្រូងចម្រាសទាក់ទងនឹងរូបរាង “លើសទម្ងន់” របស់នាងផងដែរ ។

ថ្មីៗនេះ Selena Gomez បានជជែកជាមួយអ្នកគាំទ្រតាមរយៈវេទិកា TikTok នៅក្នុងនោះ តារាចម្រៀង និងសម្តែងរូបនេះបានចែករំលែកអំពីភាពចម្រូងចម្រាសទាក់ទងនឹងរូបរាង “លើសទម្ងន់” របស់នាង ។ Selena បាននិយាយថា ការលេបថ្នាំដើម្បីព្យាបាលជំងឺ Lupus ធ្វើឲ្យនាងហើម និងឡើងទម្ងន់ ។

Selena ចែករំលែកថា “នៅពេលខ្ញុំប្រើថ្នាំ រាងកាយរបស់ខ្ញុំមានទំនោររក្សាជាតិទឹក ហើយនៅពេលដែលខ្ញុំឈប់ប្រើវា ខ្ញុំបានស្រកទម្ងន់” ។ Selena បាននិយាយថា “ខ្ញុំ គ្រាន់តែចង់និយាយ និងលើកទឹកចិត្តដល់មនុស្ស ដែលខ្មាស់នឹងអ្វីដែលពួកគេកំពុងធ្វើ ត្រូវហ៊ានឆ្លងកាត់ ព្រោះថា គ្មាននរណាម្នាក់ដឹងពីរឿងរ៉ាវពិតនៅពីក្រោយអ្នកនោះទេ ។

មិនយូរប៉ុន្មាន អតីតតារា Disney បានបន្តនិយាយបន្ថែមទៀតអំពីបទពិសោធន៍របស់នាង នៅពេលដែលនាងត្រូវបានគេនិយាយជាញឹកញាប់អំពីរូបរាងរបស់នាងថា “ខ្ញុំមិនមែនជាតារាម៉ូដែលទេ ដូច្នេះប្រសិនបើអ្នកមិនអាចគាំទ្រ និងយល់ពីខ្ញុំទេក៏តាមចិត្ត” ។

យ៉ាងណាមិញ នេះមិនមែនជាលើទីមួយទេ ដែល Selena Gomez បើកចំហអំពីរូបរាងរបស់នាងប៉ុន្មានឆ្នាំចុងក្រោយនេះ ព្រោះកន្លងមកតារាចម្រៀងស្រីរូបនេះ តែងតែតស៊ូដើម្បីលើកកម្ពស់ការយល់ ដឹងពីសុខភាពរបស់នាង ក៏ដូចជាការព្រមានអំពីការមាក់ងាយនៃរូបរាងដែលកំពុងតែកើតមាន ៕

ប្រែសម្រួល ៖ នាងតូច

ចុចអាន៖Selena Gomez ហៅឧស្សាហកម្មហូលីវូដថាជា “បិសាច”