លោកស្រី ដាំ ដារីនី ប្ដេជ្ញាពង្រឹងសមត្ថភាពកង ទ័ព ក្រោយឡើងជា​នាយឧត្ដមសេនីយ៍​

ក្រោយការផ្ដល់ទំនុកចិត្ត និងបំពាក់ឋានន្តរស័ក្ដិជា​នាយឧត្ដមសេនីយ៍យោធា​នៃក្រសួងការពារជាតិ លោកស្រី ដាំ ដារីនី បានប្ដេជ្ញាបម្រើជាតិមាតុភូមិដោយស្មោះត្រង់ និងចូលរួមពង្រឹងសមត្ថភាពកងយោធពលខេមរភូមិន្ទថែមទៀត។

លោកស្រី ដាំ ដារីនី រដ្ឋលេខាធិការក្រសួងការពារជាតិ បានសរសេរនៅលើបណ្ដាញសង្គមហ្វេសប៊ុក នៅថ្ងៃទី២០ ខែមេសានេះ យ៉ាងដូច្នេះថា៖ «ឆ្លើយតបនឹង​ការផ្ដល់ទំនុកចិត្ត និងការប្រគល់ឋានន្តរស័ក្ដិជា​នាយឧត្ដមសេនីយ៍​ នាងខ្ញុំសូម ប្តេជ្ញា​បម្រើជាតិមាតុភូមិប្រកបដោយគុណធម៌ សីលធម៌ សុជីវធម៌ និងស្មារតីតម្កល់ឧត្តមប្រយោជន៍ជាតិ និងប្រជាជនកម្ពុជាជាធំ»។ លោកស្រី ក៏នឹងបន្តចូលរួមយ៉ាងសកម្មក្នុងការអភិវឌ្ឍ និងពង្រឹងសមត្ថភាពកងយោធពលខេមរភូមិន្ទ​ ដោយស្មោះត្រង់​ និងដើរតាមមាគ៌ាដឹកនាំដ៏ត្រឹមត្រូវរបស់រាជរដ្ឋាភិបាលកម្ពុជាដែលមានសម្តេចតេជោ ហ៊ុន សែន ជានាយករដ្ឋមន្ត្រី។  

លោកស្រី ដាំ ដារីនី ​បានថ្លែងអំណរព្រះរាជគុណថ្វាយព្រះករុណា ព្រះបាទ សម្តេច ព្រះបរមនាថ នរោត្តម សីហមុនី ព្រះមហាក្សតនៃកម្ពុជា ដែលទ្រង់សព្វព្រះរាជហឫទ័យប្រគល់ឋានន្តរស័ក្តិជា «នាយឧត្ដមសេនីយ៍» ដល់លោកស្រី។ លោកស្រី ក៏បានគោរពថ្លែងអំណរគុណ​ និងដឹងគុណដ៏ថ្លៃថ្លាបំផុតជូនសម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា​ ដែលបានធ្វើពលីកម្ម​គ្រប់បែបយ៉ាងដោយយកជីវិតជាដើមទុន​ ដើម្បីនាំមកនូវសន្តិភាព​ និងការអភិវឌ្ឍជូនដល់ប្រទេសកម្ពុជា​។

ទន្ទឹមនេះដែរ រដ្ឋលេខាធិការរូបនេះ ក៏បានថ្លែងអំណរគុណជូនចំពោះសម្តេចពិជ័យសេនា ទៀ បាញ់ ឧបនាយករដ្ឋមន្ត្រី និងជារដ្ឋមន្ត្រីក្រសួងការពារជាតិ ដែលតែងតែគាំទ្រ និងលើកទឹកចិត្តដល់លោកស្រីក្នុងការអនុវត្តការងាររហូតមក។

គួរជម្រាបថា នៅថ្ងៃទី២០ ខែមេសា ឆ្នាំ២០២៣នេះ សម្ដេចពិជ័យសេនា ទៀ បាញ់ ឧបនាយករដ្ឋមន្ត្រី និងជារដ្ឋមន្ត្រីក្រសួងការពារជាតិ បានបំពាក់ឋានន្តរស័ក្តិថ្នាក់ឧត្តមសេនីយ៍ដល់នាយទាហាននៃកងយោធពលខេមរភូមិន្ទចំនួន៣រូប។ ក្នុងនោះ ឯកឧត្តម ហ៊ុន ម៉ាណែត អគ្គមេបញ្ជាការរងនៃកងយោធពលខេមរភូមិន្ទ មេបញ្ជាការកងទ័ពជើងគោក និងលោកស្រី ដាំ ដារីនី រដ្ឋលេខាធិការក្រសួងការពារជាតិ គឺត្រូវបានបំពាក់ឋានន្តរស័ក្តិជានាយឧត្តមសេនីយ៍ ខណៈលោកស្រី ម៉ាលី សុជាតា អនុរដ្ឋលេខាធិការក្រសួងការពារជាតិ ត្រូវបានបំពាក់ឋានន្តរស័ក្តិជាឧត្តមសេនីយ៍ឯក៕

ដោយ៖ ធឿន វ៉ាន់សុង