សុបិន ៤ប្រភេទ ចាស់ៗផ្ដាំថា ជាប្រផ្នូលសំណាងល្អ កម្របានជួប

សុបិនជាប្រផ្នូលពាក់ព័ន្ធនឹងជីវិតពិត ដែលតាមជំនឿវាអាចប្រាប់ឱ្យម្ចាស់ខ្លួនដឹងជាមុននូវរឿងហេតុដែលបម្រុងនឹងកើត។ ​សុបិនមានច្រើនប្រភេទ មានទាំងប្រផ្នូលល្អ និងប្រផ្នូលអាក្រក់។ ជាមួយគ្នានោះ បើសិនជាអ្នកបានជួបសុបិន ៤ប្រភេទដូចខាងក្រោម ចាស់ពីដើមផ្ដាំថាជាសុបិនតំណាងឱ្យរឿងល្អចូលមកក្នុងជីវិត ដែលសុបិនទាំង ៤ នោះរួមមាន៖

១. សុបិនឃើញខ្សែកមាស

សុបិនឃើញខ្សែកមាស អ្នកខ្លះ​ជឿថា​នឹង​បាន​ជួប​គូស្រករ ឬ​ទទួលបាន​លាភ​សំណាងផ្នែកហិរញ្ញវត្ថុ ព្រមទាំង​រីកចម្រើន​ក្នុងអាជីព​។ ផ្ទុយទៅវិញ បើបាត់ខ្សែកមាស ជាសារដាស់តឿន​ឲ្យ​ប្រុង​ប្រយ័ត្ន​ចំពោះ​ទ្រព្យ​សម្បត្តិ ព្រោះអាច​ត្រូវ​បាត់បង់ប្រាក់ ឬ​ត្រូវ​គេ​ឆបោក។

២. សុបិនឃើញត្រី

សុបិន​ឃើញ​ត្រី ជាសុបិននៃ​​លាភ​សំណាង។ តាមការទស្សន៍ទាយ មានន័យថា អ្នកនឹងជោគជ័យក្នុងការងារ ហើយអ្នកនៅលីវនឹងជួបមនុស្សដែលខ្លួនពេញចិត្ត។

៣. សុបិនឃើញព្រះសង្ឃ

សុបិនឃើញព្រះសង្ឃ ក៏ជាសុបិនល្អផងដែរសម្រាប់ម្ចាស់ខ្លួន។ អត្ថន័យទូទៅ វា​ជា​សុបិន​ដែល​ចង់ប្រាប់​​ថា ​អ្នក​នឹងរួច​ផុត​ពី​សំណាងអាក្រក់ ចាកចេញ​ពី​ទុក្ខព្រួយ ឬ​បាន​សម្រេច​គោលដៅ​ដែល​អ្នក​ចង់បាន​។ បើជាស្ត្រី មានន័យថា នាងនឹងមានបុត្រក្នុងពេលឆាប់ៗ។

៤. សុបិនឃើញអ្នកស្លាប់

សុបិនឃើញមនុស្សអានិច្ចកម្មហើយ មិនថាជាសាច់ញាតិ ឬមិត្តភក្តិ ចង់បង្ហាញថា ​នឹង​មាន​អ្នក​ស្គាល់​គ្នា​មក​ជួយ​ឧបត្ថម្ភគាំទ្រនូវកង្វះខាតរបស់អ្នក ពុំនោះទេជីវិតជិតនឹងផ្លាស់ប្តូរទៅកាន់ភាពវិជ្ជមានមួយ គួរជាទីរីករាយ៕

អត្ថបទ៖ សន្យា

ចុចអាន៖ អត្ថន័យសុបិន ១៤ប្រភេទ ចាស់ៗឱ្យកត់ចំណាំទុក កុំភ្លេចឱ្យសោះ

ចុចអាន៖ សុបិនឃើញលោកតាដែលចែកឋានហើយ ជាប្រផ្នូលនៃពរជ័យ