ផលិតផលក្នុងស្រុកបានចុះបញ្ជីនៅភូមិមួយផលិតផលមួយ​ មានប្រមាណជិត ៧០០មុខ

ផលិតផលដែលបានស្នើសុំចុះបញ្ជីនៅក្នុងចលនាភូមិមួយផលិតផលមួយ គិតមកដល់ពេលនេះ មានចំនួន ៦៨០មុខហើយ។ នេះជាការបញ្ជាក់របស់លោក លោក​ ​សួង​ ​ណយ​ ​អគ្គលេខាធិការ​រង​គណៈកម្មការ​ជាតិ​ជំរុញ​ចលនា​ ​ភូមិ​មួយ​ផលិតផល​មួយ​ ​នៃ​ទីស្តីការ​គណៈរដ្ឋមន្ត្រី​។

លោក សួង ណយ បានឱ្យដឹងទៀតថា ចលនាភូមិមួយផលិតផលមួយ បាននិងកំពុងជំរុញការប្រមូលផ្តុំផលិតផល​ពីមួយឆ្នាំទៅមួយឆ្នាំ ពោលគឺធ្វើយ៉ាងណាឱ្យកសិផលរបស់កសិករប្រទាក់ក្រឡាគ្នាជាមួយសិប្បកម្ម។ មានន័យថា ចលនាភូមិមួយផលិតផលមួយ ជួយភ្ជាប់ទំនាក់ទំនងរវាងអ្នកផលិត អ្នកកែច្នៃ និងនាំចូលផ្សារទំនើប។

លោកបានបន្តថា ចលនាភូមិមួយផលិតផលមួយ ទទួលបានការគាំទ្រខ្លាំង ដោយសារមានសន្ទុះនៃការផលិតច្រើន មានគុណភាព សោភ័ណភាព អនាម័យ ជាពិសេសភាពស្មោះត្រង់។​

បើតាមលោក សួង ណយ យន្តការរបស់រាជរដ្ឋាភិបាល ក្នុងការជំរុញចលនាភូមិមួយផលិតផលមួយ គឺដើម្បីកាត់បន្ថយ​ភាពក្រីក្រ ការធ្វើចំណាកស្រុក និងបង្កើនចំណូលជូនប្រជាពលរដ្ឋ ដែលជាផលិតករ កសិករ សមាគម សហគមន៍ និងសេវាករ។

ការជំរុញចលនាភូមិមួយផលិតផលមួយ ក៏ដើម្បីឱ្យមានការទទួលស្គាល់នូវគុណភាពផលិតផល និងស្វែងរកទីផ្សារ​លក់ចេញ​របស់ផលិតផលផងដែរ។

​លោកបន្ថែមដូច្នេះថា« ភូមិមួយផលិតផលមួយ បានចូលផ្សារទំនើបប្រមាណ ៨០ភាគរយ ហើយ ២០ភាគរយទៀត យើងកំពុងជំរុញឱ្យកសិករសុំច្បាប់ស្តង់ដារ អនាម័យ សុវត្ថិភាព ​ព្រោះនៅពេលដែលនាំចូលផ្សារទំនើប​ត្រូវតែមាន​លក្ខខណ្ឌទាំងអស់នេះ»។

​អគ្គលេខាធិការ​រង​គណៈកម្មការ​ជាតិ​ជំរុញ​ចលនា​ ​ភូមិ​មួយ​ផលិតផល​មួយ បានជំរុញដល់កសិករ ផលិតឱ្យបានច្រើន ដើម្បីផ្គត់ផ្គង់តម្រូវការក្នុងស្រុក។ លោកសង្កត់ធ្ងន់ថា ការលក់ទំនិញបានច្រើន ក្នុងតម្លៃធូរថ្លៃ ប្រសើរជាងផលិតបានតិច តែលក់ថ្លៃ។

គណៈកម្មការជាតិជំរុញចលនាភូមិ១ផលិតផល១ នៅតែបន្តលើកទឹកចិត្តដល់សិប្បករឱ្យមានការកែច្នៃវត្ថុធាតុដើម​ឱ្យទៅជាផលិតផល​សម្រេចស្របតាមបច្ចេកទេសស្ដងដារ និងអនាម័យ ហើយចលនាភូមិ១ផលិតផល១ ក៏បន្តជំរុញ​កសិករឱ្យចុះបញ្ជី ដើម្បីផលិតតាមស្តង់ដារគុណភាព ស្របតាមតម្រូវទីផ្សារផងដែរ៕

អត្ថបទ៖ ផល ធារិត