ប្រើប្រាស់ថ្នាំញៀនក្រពុលមុខ យកកាំបិតដេញចាក់អ្នកសារព័ត៌មាន

អ្នកសារព័ត៌មានម្នាក់ត្រូវបានជនដៃដល់ដែលគេសង្ស័យថា កំពុងបែកថ្នាំញៀនក្រពុលមុខដេញចាក់នឹងកូនកាំបិតរត់សឹងមិនទាន់។

ហេតុការណ៍នេះកើតឡើងនៅល្ងាចទី១០ ខែសីហា ឆ្នាំ២០២៣ វេលាម៉ោង១៦និង៥៥នាទី នៅភូមិតាខុន ឃុំព្រៃល្វា ស្រុកព្រៃកប្បាស ខេត្តតាកែវ ដែលបង្កឡើងដោយជនសង្ស័យឈ្មោះ កាន់ ភារៈ ភេទប្រុស អាយុ២៨ឆ្នាំ រស់នៅភូមិតាខុម ឃុំព្រៃល្វា ស្រុកព្រៃកប្បាស ខេត្តតាកែវ។ មុខរបរមិនពិតប្រាកដ ដោយបានធ្វើសកម្មភាពយកកូនកាំបិតចិតបន្លែមុខពីរ ដងដែកប្រវែង២០ស.ម ដេញចាក់ទៅលើជនរងគ្រោះឈ្មោះ គា លីដា ភេទប្រុស អាយុ៣៧ឆ្នាំ មុខរបរអ្នក សារព័ត៌មាន រស់នៅភូមិឃុំជាមួយគ្នា ខណៈដែលជនរងគ្រោះ កំពុងមើលជាងធ្វើរបងផ្ទះរបស់ខ្លួន តែមិនបណ្តាលឲ្យរងរបួសនោះទេ។ ចំពោះមូលហេតុ គឺជនសង្ស័យជាមុខសញ្ញាប្រើប្រាស់គ្រឿងញៀន ។

ក្រោយកើតហេតុ និងដោយមានការចង្អុលបង្ហាញពីសំណាក់លោកឧត្តមសេនីយ៍ទោស្នងការនគរបាលខេត្តតាកែវ និងមានការសម្របសម្រួលនីតិវិធីពីសំណាក់ព្រះរាជអាជ្ញាអមសាលាដំបូងខេត្តតាកែវ កម្លាំងជំនាញ នៃអធិការដ្ឋាននគរបាលស្រុកព្រៃកប្បាស សហការជាមួយកម្លាំងប៉ុស្តិ៍នគរបាលរដ្ឋបាលព្រៃល្វា បានចុះទៅដល់កន្លែងកើតហេតុ និងឃាត់ខ្លួន​ជន​សង្ស័យខាងលើយកមកអធិការដ្ឋាននគរបាលស្រុកព្រៃកប្បាស ដើម្បីកសាងសំណុំរឿងតាមនីតិវិធី៕

អត្ថបទ៖ វីរៈ