ព័ត៌មានជាតិ

ប្រកាសផ្លាស់ប្តូរប្រធានមន្ទីរដែនដីថ្មីខេត្តក្រចេះ

បានផុស

៣ years មុន

នៅ

ថ្ងៃពុធ ១៦ សីហា ២០២៣

ដោយ

កាលពីម្សិលមិញនេះ ខេត្តក្រចេះមានរៀបចំពិធីប្រកាសចូលកាន់មុខតំណែងប្រធានមន្ទីររៀបចំដែនដីនគរូបនីយកម្មសំណង់និងសុរិយោដីខេត្តក្រចេះថ្មីជំនួសលោក កៅ ម៉ាឌីឡែន ដែលត្រូវបានតែងតាំងជាអនុប្រធាននាយកដ្ឋានស្រាវជ្រាវនិងអភិវឌ្ឍនៃមន្ទីរពិសោធន៍ជាតិសំណង់។

លោក ឆាន់ សាផាន រដ្ឋលេខាធិការប្រចាំការ ក្រសួងរៀបចំដែនដី នគរូបនីយកម្ម សំណង់ និងសុរិយោដីបានគូសបញ្ជាក់ថា ការផ្លាស់ប្តូរមន្ត្រីជារឿងធម្មតាទៅតាមការចាត់តាំងរបស់ក្រសួងក៏ដូចជាស្ថាប័ននីមួយៗ។

ថ្លែងក្នុងឱកាសនោះ លោក ឆាន់ សាផាន បានវាយតម្លៃនិងកោតសរសើរចំពោះលោក កៅ ម៉ាឌីឡែន ប្រធានមន្ទីរចាស់ដែលបានបំពេញតួនាទីភារកិច្ចនិងដឹកនាំមន្រ្តីក្រោមឱវាទក្នុងវិស័យដីធ្លីប្រកបដោយប្រសិទ្ធភាព និងស្មារតីទំនួលខុសត្រូវខ្ពស់។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក កៅ ម៉ាឌីឡែន អតីតប្រធានមន្ទីររៀបចំដែនដីនគរូបនីយកម្មសំណង់ និងសុរិយោដីខេត្តក្រចេះ

លោក កៅ ម៉ាឌីឡែន បានរំលេចពីការងាររៀបចំដែនដីនិងនគរូបនីយកម្ម ដោយកន្លងទៅមន្ទីរបានបញ្ចប់ការធ្វើសេចក្ដីពង្រាងចុងក្រោយផែនការរៀបចំដែនដី និងប្លង់គោលប្រើប្រាស់ដីខេត្តក្រចេះសម្រាប់ចក្ខុវិស័យឆ្នាំ២០៤០។ បានអនុម័តប្លង់គោលទីប្រជុំជននៃស្រុកអូរគ្រៀងសែនជ័យ សម្រាប់ចក្ខុវិស័យឆ្នាំ២០៤០ និងបានពិនិត្យស្នើសុំកែតម្រូវប្លង់គោលក្រុងក្រចេះ សម្រាប់ចក្ខុវិស័យឆ្នាំ២០៤០។

ដោយឡែកការងារចុះបញ្ជីដីធ្លីជាប្រព័ន្ធ មន្ទីរបានចុះវាស់វែងនិងបិទផ្សាយបានចំនួន ៤ ៤២៧ ក្បាលដី ក្នុងនោះចែកប័ណ្ណបានចំនួន ១ ០៤៩ បណ្ណ។

លោក អ៊ូ សុបុណ្ណកា ប្រធានមន្ទីររៀបចំដែនដីនគរូបនីយកម្មសំណង់និងសុរិយោដីថ្មីខេត្តក្រចេះ

លោក អ៊ូ សុបុណ្ណកា ក្រោយទទួលបានការតែងតាំងជាប្រធានមន្ទីររៀបចំដែនដីថ្មីខេត្តក្រចេះ បានប្រកាសប្តេជ្ញាចិត្តក្នុងបំពេញតួនាទីភារកិច្ចប្រកបដោយមនសិកាវិជ្ជាជីវៈ និងការទទួលខុសត្រូវ និងបន្តខិតខំកៀរគរចំណូលឲ្យបានតាមផែនការ។

លោកអះអាងថានឹងបន្តអនុវត្តនិងដឹកនាំការងារជំនាញទាំងលើការងារចុះបញ្ជីដីធ្លី ការកសាងផែនការប្រើប្រាស់ដីធ្លី ជាពិសេសការងារសម្របសម្រួលនិងដោះស្រាយទំនាស់ដីធ្លី ដើម្បីបម្រើឲ្យឧត្ដមប្រយោជន៍ជាតិនិងប្រជាជន៕

អត្ថបទ៖ លី រតនា

Related Topics:ខេត្តក្រចេះ