លោក ស សុខា ប្រាប់មន្ត្រីឱ្យប្រកាន់យកទស្សនៈ «ដើមឈើមួយដើម ទាល់តែខ្ចីដៃគ្នាឱប ទើបជុំ»

ឧបនាយករដ្ឋមន្ត្រី រដ្ឋមន្ត្រី ក្រសួងមហាផ្ទៃ លោក ស សុខា បានណែនាំឱ្យមន្ត្រីក្រោមឱវាទរបស់លោក ត្រូវប្រកាន់ខ្ជាប់នូវព្រហ្មវិហារធម៌ទាំង៤ រួមមាន មេត្តា ករុណា មុទិតា និងឧបេក្ខា។ ជាមួយគ្នានេះ លោក ស សុខា បានណែនាំឱ្យមន្ត្រីទាំងអស់នៅក្រសួងមហាផ្ទៃប្រកាន់យកទស្សនៈ «ដើមឈើមួយដើមទាល់តែខ្ចីដៃគ្នាឱបទើបជុំ»។ លោក ស សុខា បានណែនាំបែបនេះ នៅក្នុងពិធីជួបសំណេះសំណាលជាមួយមន្ត្រីនៃក្រសួងមហាផ្ទៃ នាព្រឹក ថ្ងៃទី០៤ ខែកញ្ញា ឆ្នាំ២០២៣។

លោក ស សុខា ក៏បានណែនាំដល់មន្ត្រីទាំងអស់ ត្រូវចាត់ទុកថា គ្រប់មន្ត្រីទាំងអស់ ជាសមាជិកគ្រួសារក្រសួងមហាផ្ទៃតែមួយ។ លោកបន្តណែនាំឱ្យមន្ត្រីក្រោមឱវាទទាំងអស់ ត្រូវប្រកាន់ខ្ជាប់ទស្សនៈ រួមគិត រួមធ្វើ រួមទទួលខុសត្រូវ ហើយត្រូវរួមសាមគ្គីគ្នា ទម្លុះគោលដៅរួម ចៀសវាងគិតតែប្រយោជន៍មួយជ្រុងណាមួយ។

ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ ក៏បានថ្លែងអំណរគុណ ដឹងគុណយ៉ាងជ្រាលជ្រៅ ចំពោះសម្ដេចតេជោ ហ៊ុន សែន អតីតនាយករដ្ឋមន្ដ្រី និងសម្ដេចក្រឡាហោម ស ខេង អតីតឧបនាយករដ្ឋមន្ដ្រី រដ្ឋមន្ដ្រីក្រសួងមហាផ្ទៃ ក៏ដូចជាសម្តេចធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា ដែលបានទុកចិត្ត និងបានស្នើតែងតាំងមុខតំណែងដល់រូបលោកជាឧបនាយករដ្ឋមន្ដ្រី រដ្ឋមន្ដ្រីក្រសួងមហាផ្ទៃ សម្រាប់រាជរដ្ឋាភិបាលកម្ពុជា នីតិកាលទី៧ នៃរដ្ឋសភា ឆ្នាំ២០២៣-ឆ្នាំ២០២៨៕

ដោយ៖ ង៉ិល ណារ៉ាត់