ព័ត៌មានជាតិ

វេទិកាផ្គូផ្គងរវាងអ្នកផលិតនិងអ្នកទិញចលនាភូមិមួយផលិតផលមួយរៀបចំបាន ១០ ខេត្ត គ្រោងបញ្ចប់ ១៥ ខេត្តក្រុង

បានផុស

៣ years មុន

នៅ

ថ្ងៃសុក្រ ៦ តុលា ២០២៣

ដោយ

វេទិកាផ្គូផ្គងរវាងអ្នកផលិតនិងអ្នកទិញចលនាភូមិមួយផលិតផល រហូតពេលនេះរៀបចំបញ្ចប់នៅខេត្តចំនួន ១០ និងបន្តនៅខេត្តក្រុងចំនួន ៥ ទៀតជាបន្តបន្ទាប់។

ឆ្នាំនេះវេទិកាផ្គូផ្គងរវាងអ្នកផលិត និងអ្នកទិញ និងការតាំងបង្ហាញផលិតផលក្នុងស្រុក គ្រោងរៀបចំនៅ ១៥ ខេត្ត-ក្រុង រួមមាន ខេត្តសៀមរាប កំពង់ឆ្នាំង បាត់ដំបង បន្ទាយមានជ័យ កំពង់ចាម ឧត្តរមានជ័យ កណ្តាល កំពត ពោធិ៍សាត់ កំពង់ធំ ត្បូងឃ្មុំ ស្ទឹងត្រែង កំពង់ស្ពឺ ស្វាយរៀង និងរាជធានីភ្នំពេញ។

លោកបណ្ឌិត សួង ណយ អគ្គលេខាធិការរង គណៈកម្មាធិការជាតិជំរុញចលនាភូមិមួយផលិតមួយនៃទីស្ដីការគណៈរដ្ឋមន្ដ្រីបានឲ្យកម្ពុជាថ្មីដឹងនៅព្រឹកនេះថា ការរៀបចំវេទិកាផ្គូផ្គងរវាងអ្នកផលិតនិងអ្នកទិញចលនាភូមិមួយផលិតផល ឆ្នាំនេះគ្រោងរៀបចំចំនួន ១៥ ខេត្តក្រុង ដោយមកដល់ពេលនេះរៀបចំបានចំនួន ១០ ខេត្ត និងបន្តនៅខេត្តក្រុងចំនួន ៥ ទៀតជាបន្តបន្ទាប់។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកបណ្ឌិត សួង ណយ អគ្គលេខាធិការរងគណៈកម្មាធិការជាតិជំរុញចលនាភូមិមួយផលិតមួយ នៃទីស្ដីការគណៈរដ្ឋមន្ដ្រី

«យើងរៀបចំបានចំនួន ១០ ខេត្ត នៅសល់រាជធានីភ្នំពេញ ខេត្តត្បូងឃ្មុំ ខេត្តស្ទឹងត្រែង ខេត្តស្វាយរៀង និងខេត្តឧត្តរមានជ័យ នឹងរៀបចំបន្តបន្ទាប់ទៀត»។

លោកបណ្ឌិតបានបញ្ជាក់ថា វេទិកាផ្គូផ្គងរវាងអ្នកផលិត និងអ្នកទិញនិងការតាំងបង្ហាញផលិតផលក្នុងស្រុក គឺដើម្បីកៀរគរសក្ដានុពលសេដ្ឋកិច្ចនៃផលិតផល និងសេវាកម្មក្នុងស្រុក ដើម្បីលើកកម្ពស់ជីវភាពរស់នៅរបស់ប្រជាពលរដ្ឋ និងសហគមន៍មូលដ្ឋាន។

«យើងធ្វើការកសាងបណ្តាញទីផ្សារ ដើម្បីឲ្យប្រទាក់ក្រឡាគ្នារវាងអ្នកផលិត និងអ្នកទិញយកទៅប្រើប្រាស់ កែច្នៃវេចខ្ចប់ ផលិតផលក្នុងស្រុក ដើម្បីលក់បន្តនិងឈានទៅការនាំចេញ។ លើសពីនេះ យើងទាក់ទងជាមួយអាជ្ញាធរនិងសា្ថប័នពាក់ព័ន្ធដើម្បីកសាងបរិយាកាសអំណោយផលសម្រាប់ផលិតផលក្នុងស្រុកឱ្យរីកចម្រើន។ នេះនាំឱ្យមានការអភិវឌ្ឍសេដ្ឋកិច្ចប្រកបដោយនិរន្តរភាពក្នុងប្រទេស»។

លោកបណ្ឌិត សួង ណយ បន្តថា ការដឹកនាំគំនិតផ្ដួចផ្ដើមឱ្យមានជំនួបរវាងផលិតផល និងអ្នកទិញមានគោលបំណងកាត់បន្ថយគម្លាតរវាងអ្នកផលិតក្នុងស្រុក និងអ្នកទិញសក្ដានុពល។

តាមរយៈការបង្កើតយន្តការតភ្ជាប់បណ្ដាញប្រទាក់ក្រឡាគ្នាពីអ្នកផ្គត់ផ្គង់វត្ថុធាតុដើម អ្នកកែច្នៃវេចខ្ចប់ អ្នកប្រមូលផ្ដុំផលិតផល (ពីកសិដ្ឋានរហូតដល់តុបាយពីសិប្បកររហូតដល់អ្នកប្រើប្រាស់) ពួកគាត់អាចសិក្សាស្វែងយល់ដកស្រង់បទពិសោធន៍ពីគ្នាទៅវិញទៅមក។ ណែនាំអ្នកផលិតទៅកាន់ទីផ្សារ ដោះស្រាយបញ្ហាជាមួយស្ថាប័នពាក់ព័ន្ធ ក្នុងការចុះបញ្ជីឬច្បាប់គតិយុត្តិផ្សេងៗ និងជំរុញឱកាសពាណិជ្ជកម្មឱ្យកាន់តែមានទំនុកចិត្ត និងរួមចំណែកដល់ការអភិវឌ្ឍន៍សេដ្ឋកិច្ចនៃខេត្តនិងប្រទេសកម្ពុជាទាំងមូលនិងបង្កើនកម្រិតជីវភាពរបស់សហគមន៍មូលដ្ឋានផងដែរ។

បើតាមលោកបណ្ឌិត សួង ណយ រហូតមកដល់ពេលនេះមានមុខទំនិញ ផលិតផល កសិផលក្នុងចលនាភូមិមួយផលិតផលមួយចំនួនជាង ៦០០ មុខ ត្រូវបានចុះបញ្ជីនិងបច្ចុប្បន្នកំពុងបន្តចុះបន្ថែមទៀត៕