កម្ពុជាទទួលបានទឹកប្រាក់ ៨២៩ លានដុល្លារពីការនាំចេញស្វាយចន្ទីនារយៈពេល ៩ ខែ ធ្លាក់ចុះជាង ១៦ ភាគរយ

នៅក្នុងរយៈពេល ៩ ខែ ឆ្នាំ ២០២៣ ​កម្ពុជាផលិតគ្រាប់ស្វាយចន្ទីឆៅបានជាង ៦ សែនតោន (៦៣៩.០០០) ក្នុងនោះនាំចេញទៅប្រទេសវៀតណាម​ ៦១៣.២០០ តោន ស្មើនឹងទឹកប្រាក់ ​៨២៩ លានដុល្លារ ថយចុះ ១៦,៣% បើធៀបរយៈកាលដូចគ្នា ទៅនឹង២០២២។

​លោក​ ​អួន​ ​សី​ឡុ​ត​ ​ប្រធាន​សមាគម​ស្វាយ​ចន្ទី​កម្ពុជា ប្រាប់កម្ពុជាថ្មីនៅថ្ងៃច័ន្ទទី ១៦ ខែតុលា នេះថា សមាគមស្វាយចន្ទីកម្ពុជា​បានទម្លាក់ការព្យាករណ៍​ទិន្នផលនៃស្វាយចន្ទីកម្ពុជាតាំងពីដើមឆ្នាំ ​ដោយ​សារ​តែកសិករបានកាប់ស្វាយចន្ទីមួយចំនួនចោល​ដោយសារការប្រែប្រួលអាកាស​ធាតុ​ធ្វើឱ្យ​គាត់លំបាកថែទាំ។

ម្យ៉ាងទៀត ​ការប្រជែងទិញពីសហគ្រាសក្នុងស្រុក ថ្វីបើពួកគាត់​មានទុន​បង្វិល​ទាប ប៉ុន្តែហាក់ដូចជាមានការងើបឡើង​ក្រោយពីមានគោល​នយោបាយជាតិស្ដី​ពីស្វាយចន្ទី ដែលធ្វើឱ្យ​សហគ្រាសក្នុងស្រុកដណ្ដើមគ្នាទិញ​ពីការនាំចេញទៅក្រៅប្រទេស។

តម្លៃគ្រាប់ស្វាយចន្ទីស្ងួត ១ ៦៥៨ដុល្លារ/១តោន។ ខែកញ្ញាគ្រាប់ស្ងួតតម្លៃ ៧០០០-៧៥០០ រៀល ក្នុង១គីឡូក្រាម។

ប្រទេសដែលទទួលទិញគ្រាប់ស្វាយចន្ទីរបស់កម្ពុជាមាន ប្រទេសវៀតណាម ថៃ ជប៉ុន រុស្សី ចិន ហុងកុង បារាំង កូរ៉េ តួគី និង បង់ក្លាដេស ជាដើម។

បើតាម លោក លោក​ ​អួន​ ​សី​ឡុ​ត ​សមាគមស្វាយចន្ទី ​តាមរយៈក្រសួងពាណិជ្ជកម្ម​បានខិតខំប្រឹងប្រែង​រកទីផ្សារ​នៅក្រៅប្រទេស​ជាក់ស្ដែងថ្មីៗនេះ ​ក្រុមការងារសមាគមរបស់លោក ​បានទៅចូលរួម​ពិព័រណ៍នៅ Gwangju Food Fair 2023 នៅប្រទេសកូរ៉េ ដើម្បីផ្សព្វផ្សាយសក្ដានុពល​ស្វាយចន្ទីកម្ពុជា។

​ប្រធាន​សមាគម​ស្វាយ​ចន្ទី​កម្ពុជាបញ្ជាក់ថា ​នេះជាការបើកទីផ្សារថ្មីមួយទៀតសម្រាប់​សហគ្រាស​ក្នុងស្រុក ខណៈថ្ងៃទី ៤ ដល់ថ្ងៃទី ១៥ ខែក្រោយ សមាគមស្វាយចន្ទី​គ្រោងរៀបចំការ​តាំងពិព័រណ៍​នៅ​ទីក្រុងឡុងប៊ិច សហរដ្ឋអាមេរិកដើម្បីពង្រីក​ទីផ្សារថ្មីដល់សហគ្រាសក្នុងស្រុក៕

អត្ថបទ៖ ឡេង ដេត