ផ្លូវកៅស៊ូប្រវែងជាង ១៩ គីឡូម៉ែត្រ ឆ្ពោះទៅតំបន់ទេសចរណ៍ ឆ្នេរនេសាទ ស្ថាបនាបាន ៥០ ភាគរយ

ប្រធានមន្ទីរអភិវឌ្ឍន៍ជនបទខេត្តកោះកុង បង្ហាញថា ការដ្ឋានស្ថាបនាថ្នល់កៅស៊ូប្រវែងជាង ១៩ គីឡូម៉ែត្រ ដែលធ្វើដំណើរឆ្ពោះទៅកាន់តំបន់រមណីយដ្ឋានទេសចរណ៍ឆ្នេរនេសាទ ស្ថាបនាសម្រេចបាន ៥០ ភាគរយហើយ។

លោក អៀង ដារ៉ាវុធ ប្រធានមន្ទីរអភិវឌ្ឍន៍ជនបទ ខេត្តកោះកុង បានឱ្យដឹងនៅថ្ងៃទី ២៩ ខែមករា ឆ្នាំ ២០២៤ នេះថាគិតចាប់ពីថ្ងៃទី១ ខែមិថុនា ឆ្នាំ ២០២៣ ដល់ថ្ងៃទី ២៩ ខែមករា ឆ្នាំ ២០២៤ ការដ្ឋានស្ថាបនាផ្លូវថ្នល់កៅស៊ូប្រវែង ១៩ គីឡូម៉ែត្រ ទទឹង ៨ ម៉ែត្រ ចាប់ពីកែងផ្លូវស្រុកស្រែអំបិល ទៅតំបន់ឆ្នេរនេសាទ ស្ថាបនាសម្រេចបាន ៥០ ភាគរយហើយ ដោយគ្រោងនឹងបញ្ចប់គម្រោងរបស់ខ្លួននៅថ្ងៃទី ៣១ ខែឧសភា ខាងមុខ។

លោកប្រធានមន្ទីរអភិវឌ្ឍន៍ជនបទខេត្តកោះកុង បន្ថែមថា គម្រោងអភិវឌ្ឍន៍ជាផ្លូវកៅស៊ូនេះ ធ្វើឡើងក្រោមកិច្ចសម្របសម្រួលរបស់ក្រសួងអភិវឌ្ឍន៍ជនបទ និងធនាគារវិនិយោគហេដ្ឋារចនាសម្ព័ន្ធអាស៊ី ហៅកាត់ថា AIIB ដើម្បីពង្រឹងសមត្ថភាពផលិតភាពជនបទឱ្យកាន់តែល្អប្រសើរ។

គួរកត់សម្គាល់ថា កន្លងទៅ ផ្លូវកៅស៊ូ ១ ខ្សែ ខាងលើនេះ ជាផ្លូវក្រួសក្រហមពិបាកធ្វើដំណើរទាំងរដូវវស្សា និងរដូវប្រាំង ដោយសារតែមើលឃើញពីភាពលំបាករបស់ពលរដ្ឋ និងអ្នកទេសចរ ទើបខាងមន្ទីរ និងអជ្ញាធរពាក់ព័ន្ធ បានជួយសម្រួល ក្នុងការស្ថាបនាផ្លូវធ្វើដំណើរ ដែលវាបានជួយលើកកម្ពស់ជីវភាពពលរដ្ឋ តាមរយៈការស្ថាបនាជាផ្លូវកៅស៊ូដ៏មានសារៈសំខាន់មួយនេះ។

លោក ជា ច័ន្ទកញ្ញា អភិបាលស្រុកស្រែអំបិល យល់ថា មូលដ្ឋានគ្រប់គ្រងរបស់លោក កាន់តែមានការអភិវឌ្ឍន៍បោះជំហានទៅមុខ ព្រោះតែសមិទ្ធផលកកើតមានជាហូរហែ ជាក់ស្តែង ដូចមានផ្លូវកៅស៊ូនេះស្រាប់តែម្តង។ វាផ្តល់អត្ថប្រយោជន៍ច្រើនណាស់ដល់ជីវភាពរស់នៅរបស់ពួលរដ្ឋ និងសក្តានុពលទាក់ទាញភ្ញៀវទេសចរ ខណៈស្រុកស្រែអំបិលបានតំបន់ឆ្នេរសមុទ្រស្រស់ស្អាតគួរឱ្យចង់មកលេងកម្សាន្តគ្រប់រដូវកាលទាំងអស់។ 

ចំណែកប្រជាពលរដ្ឋរស់នៅក្នុងភូមិជ្រោយស្វាយ ឃុំជ្រោយស្វាយ បានសម្តែងក្តីរីករាយយ៉ាងខ្លាំងពេលជិតបានថ្នល់កៅស៊ូស្អាតល្អងាយស្រួលធ្វើដំណើរទៅមកបានឆាប់រហ័ស ដោយសារតែពួកគាត់ចង់បានផ្លូវកៅស៊ូជាយូរឆ្នាំមកហើយជំនួសឱ្យផ្លូវក្រួសក្រហម។

ក្រុមពលរដ្ឋដដែល ជឿជាក់ថា ទៅថ្ងៃមុខ កំណើនភ្ញៀវទេសចរមកកាន់តែកម្សាន្តតំបន់រមណីយដ្ឋានឆ្នេរនេសាទមានច្រើន និងលើកកម្ពស់ជីវភាពរស់នៅរបស់ពួកគាត់នឹងកាន់តែល្អប្រសើរតាមរយៈការទទួលបានផ្លូវ១ខ្សែនេះ ពិសេសគឺមានសុវត្ថិភាពធ្វើដំណើរទៅមកមិនថាខែវស្សា ឬខែប្រាំងនោះទេ ។

ដើម្បីថែររក្សាការពារផ្លូវកៅស៊ូ១ខ្សែនេះបានរឹងមាំគង់វង្ស និងកាត់បន្ថយគ្រោះថ្នាក់ចរាចរណ៍ ពលរដ្ឋស្នើដល់អ្នកពាក់ព័ន្ធទាំងអស់កុំដឹកទំនិញលើសកំណត់ និងបើកបរកុំហួសល្បឿនកំណត់ជាដើម៕

  អត្ថបទ ៖ សិរីវឌ្ឍនៈ