រុស្ស៊ី និងអ៊ុយក្រែន បញ្ចប់សកម្មភាព ដោះដូរអ្នកទោសរបស់ពួកគេ ទៅវិញទៅមក

រុស្ស៊ី និងអ៊ុយក្រែនបាននិយាយកាលពីថ្ងៃពុធ ទី៣១ ខែមករា នេះ ថា ពួកគេបានបញ្ចប់ការដោះដូរអ្នកទោសរវាងគ្នា និងគ្នា ។

ក្រសួងការពារជាតិរុស្ស៊ីបាននិយាយថា ភាគីនីមួយៗបានបញ្ចប់ការដោះដូរអ្នកទផស ដោយរុស្ស៊ីបានទទួលទាហាន ១៩៦នាក់ត្រឡប់មកវិញ ហើយទាហានរបស់ខ្លួននឹងត្រូវហោះហើរទៅកាន់ទីក្រុងមូស្គូ ដើម្បីទទួលការព្យាបាលផ្នែកវេជ្ជសាស្ត្រ និងផ្លូវចិត្ត។

ភ្នាក់ងារសារព័ត៌មានរដ្ឋ រុស្ស៊ី RIA បានផ្សាយថា កិច្ចព្រមព្រៀងខាងលើនេះ ត្រូវបានសម្របសម្រួលដោយ សហព័ន្ធអេមីរ៉ាតអារ៉ាប់រួម ហើយទាហានរុស្ស៊ីចំនួន ១៩៦នាក់ ដែលបានជាប់ជាចំណាត់ខ្មាំងរបស់ អ៊ុយក្រែន ត្រូវបានផ្ទេរមកវិញ និងកំពុងរង់ចាំការព្យាបាល ។

ជាមួយគ្នានេះដែរ ប្រធានាធិបតីអ៊ុយក្រែនលោក Volodymyr Zelenskyy បាននិយាយនៅលើគណនី Twitter ផ្លូវការរបស់គាត់ថា សកម្មភាពដោះដូរអ្នកទោសជាមួយ រុស្ស៊ី គឺជាសកម្មភាពដ៏ធំមួយ ដោយអ៊ុយក្រែន ក៏ទទួលបានទាហានរបស់ខ្លួនដែលជាចំណាត់ខ្មាំងរបស់រុស្ស៊ី ចំនួន ២០៧ នាក់ផងដែរ ។

សូមបញ្ជាក់ថា ប្រទេសទាំងពីរ (អ៊ុយក្រែន-រុស្ស៊ី) បានធ្វើការដោះដូរអ្នកទោសតាមកាលកំណត់អន្តរការី ចាប់តាំងពីសង្រ្គាមបានចាប់ផ្តើមជិតពីរឆ្នាំមុន បើទោះបីជាមិនមានការចរចាសន្តិភាពណាមួយរវាងពួកគេក៏ដោយ ៕

ប្រែសម្រួលដោយ÷ ប៉ោ កុសល

ប្រភព៖ Reuters