Breaking News! សម្ដេចតេជោ ហ៊ុន សែន អញ្ជើញទៅដល់ភូមិគ្រឹះលោក ថាក់ស៊ីន ហើយ

សម្ដេចតេជោ ហ៊ុន សែន បានអញ្ជើញទៅដល់ភូមិគ្រឹះ Ban Chan Song La ក្នុងទីក្រុងបាងកក ដែលជាគេហដ្ឋានរបស់លោក ថាក់ស៊ីន ស៊ីណាវ៉ាត្រា ហើយ ដើម្បីជួបសួរសុខទុក្ខអតីតនាយករដ្ឋមន្ត្រីថៃរូបនេះដែលជាបងធម៌របស់សម្ដេច ។ នេះបើតាមការចេញផ្សាយដោយសារព័ត៌មានថៃ The Nation នៅថ្ងៃទី២១ ខែកុម្ភៈនេះ ។

តាម​សេចក្តី​រាយការណ៍ដដែល​បាន​ឲ្យ​ដឹងទៀត​ថា សម្ដេចតេជោ ហ៊ុន សែន បានអញ្ជើញ​មក​ដល់​អាកាសយានដ្ឋាន​អន្តរជាតិ​ដនមឿង​ក្នុងទីក្រុងបាងកកនៅវេលា​ម៉ោង ១០ ព្រឹកនេះ ដោយ​យន្តហោះ​ឯកជន​របស់សម្ដេច ។

ដោយឡែកយោងតាមសារព័ត៌មាន Thai PBS ក៏បានរាយការណ៍ផងដែរថា ការអញ្ជើញជួបសួរសុខទុក្ខលោក ថាក់ស៊ីន ពីសំណាក់សម្ដេចតេជោ ហ៊ុន សែន គឺដោយសារតែសម្ដេចព្រួយបារម្ភពីស្ថានភាពសុខភាពរបស់អតីតនាយករដ្ឋមន្ត្រីវ័យ ៧៤ ឆ្នាំរូបនេះ ក្រោយពេលដោះលែងឲ្យមានសេរីភាព ។

ចំណែកកូនស្រី​​ពៅលោក​ ថាក់ស៊ីន គឺ​លោកស្រី ផេថងថាន បានប្រាប់អ្នកសារព័ត៌មានថា ក្រៅពីជួបសួរសុខទុក្ខហើយ សម្ដេចតេជោ ហ៊ុន សែន ក៏នឹងពិសារអាហាថ្ងៃត្រង់ជាមួយបងធម៌គឺលោក ថាក់ស៊ីន ផងដែរ ហើយបន្ទាប់មក សម្ដេចនឹងអញ្ជើញហោះត្រឡប់មកព្រះរាជាណាចក្រកម្ពុជាវិញ ។

គួរបញ្ជាក់ថា សម្តេចតេជោ ហ៊ុន សែន និងលោក ថាក់ស៊ីន បានរាប់អានគ្នាជាបងប្អូនធម៌ ហើយមានទំនាក់ទំនងយ៉ាងជិតស្និទ្ធ ចាប់តាំងពីឆ្នាំ ១៩៩២ ពោលមុនលោក ថាក់ស៊ីន ធ្វើជាជានាយករដ្ឋមន្ត្រីថៃមកម៉្លេះ ៕

ដោយ ៖ សុខ ជីវ័ន្ត

ចុចអាន ៖ ដំណើរជីវិត និងការចាប់កំណើតអាជីពនយោបាយលោក ថាក់ស៊ីន