ថៃ រុះរើគណៈរដ្ឋមន្ត្រី ឯលោក ថាក់ស៊ីន ក្ដោបក្ដាប់ចាត់ចែងតួនាទីទាំងអស់

នៅទីបំផុត​ការ​រុះរើ​គណៈរដ្ឋមន្ត្រីរបស់លោកនាយករដ្ឋមន្ត្រីថៃ ​សេដ្ឋា ថាវីស៊ីន បានឈានចូលមកដល់ហើយ បន្ទាប់ពីមានការវិវត្តចុងក្រោយកាលពីរសៀលថ្ងៃព្រហស្បតិ៍ ជាពិសេសគឺការជួបពិភាក្សាគ្នារវាងលោក សេដ្ឋា ជាមួយលោក ភូមិថាំ វិឆាយ៉ាឆៃ ឧបនាយករដ្ឋមន្ត្រី និងជារដ្ឋមន្ត្រីក្រសួងពាណិជ្ជកម្ម និង​​លោក ថាក់ស៊ីន ស៊ីណាវ៉ាត្រា នៅ​សណ្ឋាគារ​មួយកន្លែង​ក្នុង​ទីក្រុង​បាងកក ។ នេះបើយោងតាមការចេញផ្សាយដោយសារព័ត៌មាន MGR Online នៅថ្ងៃទី២៦ ខែមេសានេះ ។

ក្រោយបញ្ចប់កិច្ចពិភាក្សានោះហើយ ការរុះរើគណៈរដ្ឋមន្ត្រីទំនងជានឹងបិទបញ្ចប់ក្នុងសប្ដាហ៍នេះ ខណៈសកម្មភាពដែលកើតមានឡើងទាំងប៉ុន្មានបានបង្ហាញឲ្យឃើញយ៉ាងច្បាស់ថា ទាំងរដ្ឋាភិបាល និងទាំងការរុះរើគណៈរដ្ឋមន្ត្រីសុទ្ធសឹងតែស្ថិតក្រោមកណ្ដាប់ដៃគ្រប់គ្រងរបស់លោក ថាក់ស៊ីន នៅគ្រប់ដំណាក់កាលទាំងអស់ ។

អ្វីដែលកាន់តែច្បាស់ការណ៍អំពីការរុះរើគណៈរដ្ឋមន្ត្រីនេះដែរ ក្រោយមានសេចក្ដីរាយការណ៍ថា លោក Pichai Chunhavajira ទីប្រឹក្សានាយករដ្ឋមន្ត្រីដែលបច្ចុប្បន្នកាន់តំណែងជាប្រធានក្រុមប្រឹក្សាភិបាលផ្សារហ៊ុនថៃបានលាលែងពីតំណែងប្រធានក្រុមប្រឹក្សាភិបាលផ្សារហ៊ុនកាលពីថ្ងៃទី២៤ ខែមេសា ខណៈក្រុមហ៊ុន Bangchak Corporation Limited ក៏បានជូនដំណឹងដែរថា លោក Pichai សម្រេចចិត្តដកខ្លួនចេញពីតួនាទីមួយនេះ ដោយសារតែមានបេសកកម្មជាច្រើនដែលត្រូវបំពេញ ចាប់ពីថ្ងៃទី២៥ ខែមេសាតទៅ ។

ទន្ទឹមនោះ ការលាលែងពីតំណែងរបស់លោក Pichai នេះទៀតសោត ក៏ដោយសារតែទីប្រឹក្សានាយករដ្ឋមន្ត្រីរូបនេះគឺទៅទទួលតំណែងជាឧបនាយករដ្ឋមន្ត្រីទទួលបន្ទុកផ្នែកសេដ្ឋកិច្ច និងជារដ្ឋមន្ត្រី​ក្រសួង​ហិរញ្ញវត្ថុ​ជំនួស​លោកនាយករដ្ឋមន្ត្រី សេដ្ឋា បន្ទាប់ពីមាន​ការ​រុះរើ​គណៈរដ្ឋមន្ត្រីនាពេល​ឆាប់ៗខាងមុខ​នេះ ។

សម្រាប់គណៈរដ្ឋមន្ត្រី​ដែលនឹងមាន​ការរុះរើជាថ្មីខាងមុខនេះត្រូវបានគេ​រំពឹង​ថា លោក សេដ្ឋា អាច​នឹងកាន់តំណែងជានាយក​រដ្ឋមន្ត្រី​តែ​មួយមុខប៉ុណ្ណោះ ហើយ​លោក Pichai នឹងចូលមកកាន់តំណែងជាឧបនាយក​រដ្ឋមន្ត្រី និងជារដ្ឋមន្ត្រី​ក្រសួង​ហិរញ្ញវត្ថុជំនួសលោក សេដ្ឋា ។

ក្រៅពីនេះ លោក Somsak Thepsuthin ដែលបច្ចុប្បន្នជាឧបនាយករដ្ឋមន្ត្រី នឹងទៅកាន់ការជារដ្ឋមន្ត្រី​ក្រសួងសុខភាពសាធារណៈ​ជំនួស​លោក​វេជ្ជបណ្ឌិត Chonnan Srikaew ខណៈ​លោក Suriya Juangroongruangkit រដ្ឋមន្ត្រីក្រសួងដឹកជញ្ជូន នឹងក្លាយជាឧបនាយករដ្ឋមន្ត្រី ។ ចំណែកលោក Panpree Phittanukorn ឧបនាយករដ្ឋមន្ត្រី និងជារដ្ឋមន្ត្រីក្រសួងការបរទេស នឹងនៅសល់តែតំណែងជារដ្ឋមន្ត្រីក្រសួងការបរទេសមួយមុខប៉ុណ្ណោះ ។

គួរបញ្ជាក់ថា ការរុះរើគណៈរដ្ឋមន្ត្រីនេះមានហេតុផលជាច្រើន ហើយនេះក៏អាចជាស្ទីលរបស់គណបក្សភឿថៃផងដែរ ខណៈការផ្លាស់ប្ដូរនេះអនុវត្តតាំងតែពីសម័យបក្សថៃស្រលាញ់ថៃក្រោមការដឹកនាំរបស់លោក ថាក់ស៊ីន ដូចគ្នា ដើម្បីឆ្លើយ​តបចំពោះក្រុម​នយោបាយ ក៏ដូចជាការចរចាផលប្រយោជន៍ជាមួយក្រុមមូលធន ហើយស្ទីលនេះជាមធ្យមនឹងមានការរុះរើគណៈរដ្ឋមន្ត្រីនៅរៀងរាល់ ៦ ខែ ឬ ១ ឆ្នាំម្តង ៕

ដោយ ៖ គង់ សំអាន

ចុចអាន ៖ ថៃ បញ្ចេញទំហំទឹកប្រាក់កើបបានពីពិធីបុណ្យសង្ក្រាន្ត