សេដ្ឋកិច្ច

សហគ្រាស ២០ ចុះឈ្មោះ ប្រកួតប្រជែងកែច្នៃគ្រាប់ស្វាយចន្ទី

បានផុស

២ years មុន

នៅ

ថ្ងៃសុក្រ ៣ ឧសភា ២០២៤

ដោយ

គិតត្រឹមថ្ងៃទី ០៣ ខែឧសភា ឆ្នាំ ២០២៤ ដែលជាថ្ងៃផុតនៃការដាក់ចុះឈ្មោះដាក់ពាក្យចូលរួមកម្មវិធីប្រកួតប្រជែងកែច្នៃគ្រាប់ស្វាយចន្ទី ដែលរៀបចំដោយ នាយកដ្ឋានកសិ-ឧស្សាហកម្ម នៃក្រសួងកសិកម្ម រុក្ខាប្រមាញ់ និងនេសាទ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

កញ្ញា អ៊ឹម រចនា អ្នកនាំពាក្យក្រសួងកសិកម្ម មានប្រសាសន៍ថា គិតត្រឹមថ្ងៃទី ០៣ ខែឧសភា ឆ្នាំ ២០២៤ ដែលជាថ្ងៃផុតកំណត់ទទួលចុះឈ្មោះប្រឡងប្រជែងកែច្នៃគ្រាប់ស្វាយចន្ទី មានសហគ្រាសចំនួន ២០ បានចុះឈ្មោះចូលរួមប្រកួតប្រជែង។

នាយកដ្ឋានកសិ-ឧស្សាហកម្ម នៃក្រសួងកសិកម្ម រុក្ខាប្រមាញ់ និងនេសាទ ប្រកាសរៀបចំកម្មវិធីប្រឡងប្រជែងកែច្នៃគ្រាប់ ស្វាយចន្ទីឆ្នើម ឆ្នាំ២០២៤ លើកដំបូង ដើម្បីលើកស្ទួយដល់ការកែច្នៃផលិតផលក្នុងស្រុក ជាពិសេសការកែច្នៃផលិតផលគ្រាប់ស្វាយចន្ទី។

កម្មវិធីប្រកួតនេះនឹងត្រូវរៀបចំឡើងជាពីរជុំគឺនៅថ្ងៃទី ០៩ និងទី ១០ ខែឧសភា ឆ្នាំ ២០២៤ សម្រាប់ជុំទីមួយ នៅខេត្តសៀមរាប ហើយសម្រាប់ជុំទី២ នៅថ្ងៃទី ២៤ ខែឧសភា ឆ្នាំ ២០២៤ នៅរាជធានីភ្នំពេញ។ សម្រាប់ជ័យលាភីគឺផ្ដល់ជូនពីលេខ ១ ដល់លេខ ៣ និងទទួលបានពានរង្វាន់ អមដោយប្រាក់រង្វាន់លើកទឹកចិត្ត។

នាយកដ្ឋានកសិ-ឧស្សាហកម្ម បានបញ្ជាក់ថា កម្មវិធីប្រឡងនេះ រៀបចំឡើង ដើម្បីផ្សព្វផ្សាយ និងស្វែងរកសហគ្រិនកែច្នៃផលិតផលគ្រាប់ស្វាយចន្ទីឆ្នើមបំផុត និងជំរុញ និងលើកកម្ពស់ការអភិវឌ្ឍន៍វិស័យស្វាយចន្ទីតាមរយៈការអនុវត្តន៍ផលិតកម្មកសិកម្មតាមកិច្ចសន្យា បច្ចេទេសកែច្នៃ គ្រាប់ស្វាយចន្ទី ការប្រកួតប្រជែងទីផ្សារ និងការបន្ថែមរសជាតិ លើផលិតផល គ្រាប់ស្វាយចន្ទី។

លោក អួន ស៊ីឡុត ប្រធានសមាគមស្វាយចន្ទីកម្ពុជាយល់ឃើញថា ការប្រកួតនេះមានសារៈសំខាន់ក្នុងការលើកទឹកចិត្តដល់សហគ្រាសកែច្នៃក្នុងស្រុក និងដាស់តឿនវិនិយោគគិនក្នុងស្រុកដែលមិនសូវចាប់អារម្មណ៍លើការកែច្នៃចន្ទី ដោយចង់ប្រាប់ពួកគាត់ថា យើងមានសក្តានុពលចន្ទីច្រើនក្នុងស្រុកដែលត្រូវការវិនិយោគបន្ថែម។

លោក អួន ស៊ីឡុតប្រាប់ថា ការកែច្នៃគ្រាប់ស្វាយចន្ទីក្នុងស្រុកបច្ចុប្បន្នបានត្រឹមតែ ១០% ខណៈ ៩០% នៃវត្ថុធាតុដើម ត្រូវបាននាំចេញទៅក្រៅ ហើយកម្មវីធីប្រកួតនេះ ជាការលើកកម្ពស់ផ្នែកកែច្នៃ និងទាក់ទាញវិនិយោគឱ្យសម្លឹងមើលការកែច្នៃក្នុងស្រុក៕