សម្តេចតេជោ ស្នើក្រុមអ្នកច្បាប់សិក្សាបង្កើតច្បាប់មួយដាក់ទោស​ចំពោះជនណា​ដែលថាកម្ពុជាគ្មាន​របបប្រល័យពូជសាសន៍

ប្រធានព្រឹទ្ធសភានៃព្រះរាជាណាចក្រកម្ពុជា សម្តេចតេជោ ហ៊ុន​ សែន ស្នើក្រុមអ្នកច្បាប់​សិក្សាពីលទ្ធភាព​ក្នុង​ការដាក់ច្បាប់នៅកម្ពុជា ដែលច្បាប់នេះអាចដាក់ទោសចំពោះជនទាំងឡាយណាដែលថាកម្ពុជាគ្មានអំពើប្រល័យពូជសាសន៍គឺត្រូវទទួលទោស។

ការស្នើនេះ ត្រូវបាន​ថ្លែងឡើងនាឱកាសម្តេចតេជោ បានអញ្ជើញជាធិបតី ពិធីបិទសន្និសីទស្តីពី “អនាគតប្រទេសកម្ពុជាដែលគ្មានអំពើប្រល័យពូជសាសន៍” ដែលត្រូវបានផ្សព្វផ្សាយជាសកលអំពីដំណើរការនៃសាលាក្តីខ្មែរក្រហមអស់រយៈពេល ១៦ឆ្នាំ ព្រមទាំងភារកិច្ច និង សកម្មភាពការងារសំខាន់ៗ ដែលអង្គជំនុំជម្រះវិសាមញ្ញក្នុងតុលាការកម្ពុជា (អ.វ.ត.ក.) ដែលបានអនុវត្តក្រោយដំណើរការនៃសវនាការសាលាក្តី នៅសាលយុត្តិតេជោ បញ្ជាការដ្ឋានកងទ័ពជើងគោក នៅព្រឹកថ្ងៃទី ២២ ឧសភា ឆ្នាំ ២០២៤។

សម្តេចតេជោថ្លែងថា៖«ខ្ញុំសូមស្នើអ្នកច្បាប់ទាំងអស់ តើយើងអាចដាក់ច្បាប់នៅប្រទេសកម្ពុជាបានឬអត់សម្រាប់ជនក៏ដោយដែលថាកម្ពុជាគ្មានអំពើប្រល័យពូជសាសន៍គឺត្រូវទទួលទោស»។​ សម្តេចអះអាងថា​ ការចង់បានច្បាប់នេះ​ដោយផ្អែកទៅលើដំណើរការកាត់ក្តីរបស់សាលាក្តីខ្មែរក្រហម ដែលបានចេញសាលក្រមបញ្ជាក់ថាកម្ពុជាមានរបបប្រល័យពូជសាសន៍។ សម្តេចថា៖«ហេតុអីបានជាខ្ញុំត្រូវហ៊ាននិយាយអ៊ីចឹង ព្រោះសាលក្រមតុលាការមួយដែលចេញថា កម្ពុជាមានរបបប្រល័យពូជសាសន៍ និងមានដំណើរការកាត់ទោសរបបប្រល័យពូជសាសន៍។ អ៊ីចឹង! បើសិនជាតុលាការចេញសាលក្រមបែបនេះបានអះអាងថាកម្ពុជាមានរបបប្រល័យពូជសាសន៍។នៅអឺរ៉ុបក៏មានធ្វើបែបនេះដែរ អ៊ីចឹង!កម្ពុជាគួរមានធ្វើរឿងនេះ»។

ក្នុងន័យនេះ សម្តេចបញ្ជាក់ថា ការស្នើឱ្យចងក្រងជាច្បាប់នេះមិនមែន​ជាការបិទសិទ្ធិសេរីភា​ព​ក្នុងការបញ្ចេញ​មតិនោះទេ  ប៉ុន្តែដើម្បីចៀសវាងអ្នកនយោបាយមួយ​ចំនួនយកទៅបកស្រាយផ្ទុយ​ពី​ការពិតដើម្បីផលប្រយោជន៍នយោបាយខ្លួន ប៉ុន្តែប៉ះពាល់ដល់ប្រវត្តិសាស្រ្តកម្ពុជា។
សម្តេចសង្កត់ធ្ងន់ថា៖«នេះមិនមែនជាការបំផុតស្មារតីធ្វើការសង្កត់ទៅលើការបញ្ចេញមតិទេ ក៏ប៉ុន្តែកម្ពុជា​មានរឿងអាក្រក់បែបនេះ ម្ខាងថ្កោលទោសខ្មែរ​ក្រហម តែម្ខាងទៀតក៏បានថ្កោលទោសចំពោះអ្នកដែល​បានផ្តួលរំលំខ្មែរក្រហមដែរ។ អ៊ីចឹង! ខ្ញុំគិតថាល្មមដល់ពេលដែលត្រូវដាក់ច្បាប់ ព្រោះបើមិនអ៊ីចឹង​ទេ​ពួកអ្នកនយោបាយនៅតែលេងល្បែងនយោបាយ​ដដែលៗដែលធ្វើឱ្យមានច្របូក​ច្របល់កើត​ឡើងនៅក្នុងសង្គមរបស់យើង»។

«ដូច្នេះគួរតែមានច្បាប់ បើអ្នកឯងនិយាយថាអត់មានអំពើប្រល័យពូជសាសន៍គឺ​មានទោសប៉ុន្មាន​ នេះមិនមែនការហាមឃាត់ការបញ្ចេញទេ ប៉ុន្តែការបញ្ចេញមតិណាដែលគាំពាររបប​ប្រល័យពូជសាសន៍​គួរតែត្រូវមានទោស»។
សម្តេចតេជោ បញ្ជាក់បន្ថែម៕

អត្ថបទ៖ ឡាយ សាមាន