ព័ត៌មានជាតិ

ឧបនាយករដ្ឋមន្ត្រី ហ៊ុន ម៉ានី៖ ពុកគឺជា សម្តេចពុករបស់ប្រជាជនកម្ពុជា

បានផុស

៤ នាទី មុន

នៅ

ថ្ងៃសៅរ៍ ២០ មិថុនា ២០២៦

ដោយ

រដ្ឋមន្ត្រីក្រសួងមុខងារសាធារណៈ លោកឧបនាយករដ្ឋមន្ត្រី ហ៊ុន ម៉ានី បានរម្លឹកពីដំណើរតស៊ូរបស់សម្ដេចតេជោ ហ៊ុន សែន ដើម្បីរំដោះជាតិពីរបបខ្មែរក្រហម និងកសាងប្រទេសកម្ពុជាពីផេះផង់រហូតអភិវឌ្ឍន៍ដូចបច្ចុប្បន្នគឺជាគុណបំណាច់ដ៏ធំធេងដែលលើសពីឪពុកម្នាក់ តែជាពុករបស់ប្រជាជនកម្ពុជាទាំងមូល។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកឧបនាយករដ្ឋមន្ត្រី ហ៊ុន ម៉ានី បានបង្ហោះលើបណ្ដាញសង្គមនៅរសៀលថ្ងៃទី២០ ខែមិថុនា ឆ្នាំ២០២៦នេះចំខួប៤៩ឆ្នាំ នៃការសម្រេចចិត្តរបស់សម្ដេចតេជោភៀសខ្លួនទៅវៀតណាមដើម្បីស្វែងជំនួយរំដោះប្រទេសកម្ពុជាពីរបបខ្មែរក្រហមថាសម្ដេចតេជោ លើសពីឪពុកតែគឺជា«សម្តេចពុករបស់ប្រជាជនកម្ពុជា»។ លោកបានលើកឡើងបន្ថែមថាថ្ងៃទី២០ ខែមិថុនា គឺជារបត់ប្រវត្តិសាស្ត្រដែលស្ទើតែពេញមួយជីវិតរបស់សម្ដេចតេជោ គឺ ជាតិ និងប្រជាជន។

លោកសរសេរថា៖ «បើគ្មានការសម្រេចចិត្តដ៏លំបាកនៅយប់ថ្ងៃទី២០ មិថុនា ១៩៧៧ នោះក៏មិនអាចនាំទៅដល់ការបង្កើតកងកម្លាំងប្រដាប់អាវុធសាមគ្គីសង្គ្រោះជាតិកម្ពុជា ថ្ងៃទី១២ ឧសភា ១៩៧៨ និងរណសិរ្សសាមគ្គីសង្គ្រោះជាតិកម្ពុជា នៅថ្ងៃ២ ធ្នូ ១៩៧៨ ហើយឈានទៅសម្រេចជ័យជម្នះជាប្រវត្តិសាស្ត្រថ្ងៃ ៧ មករា ១៩៧៩ ដែរ»។

ក្នុងនាមជាកូនមួយរូបសម្ដេចតេជោផងនោះ លោក ហ៊ុន ម៉ានី ថាជិតកន្លះសតវត្សមកនេះពលិកម្មនិងគុណបំណាច់សម្ដេចតេជោ ហ៊ុន សែន និងថ្នាក់ដឹកនាំជំនាន់មុនរបស់កម្ពុជាបាន កសាងប្រទេសកម្ពុជាពីបាតដៃទទេ ឆ្ពោះទៅរកការបង្រួបបង្រួមជាតិ ឯកភាពជាតិ ឯកភាពទឹកដី សន្តិភាពពេញលេញ ស្ថិរភាព និងការអភិវឌ្ឍ ព្រមទាំងផ្ដល់ជីវិតថ្មីដល់ប្រជាចនកម្ពុជារាប់លាននាក់ និងដឹកនាំប្រទេសឱ្យមានការទទួលស្គាល់ស្មើមុខស្មើមាត់លើឆាកអន្តរជាតិ។

លោកបានសរសេរបន្ថែមថា៖ «យើងខ្ញុំសូមគោរពដឹងគុណយ៉ាងជ្រាលជ្រៅ និងប្រណិប័តតាមគំរូវីរភាពដ៏អង់អាចក្លាហានរបស់ថ្នាក់ដឹកនាំជំនាន់មុន ដោយប្តេជ្ញាការពារសន្តិភាព និងថែរក្សាសមិទ្ធផល ដែលថ្នាក់ដឹកនាំជំនាន់មុនបានកសាងឡើងដោយលំបាក ហើយហ៊ានចេញមុខការពារប្រទេសជាតិ ទោះក្នុងតម្លៃណាក៏ដោយ»។

គួររំលឹកថា នៅថ្ងៃទី២០ ខែមិថុនា ឆ្នាំ២០២៣ គឺជាខួបគម្រប់ ៤៦ឆ្នាំ នៃដំណើរតស៊ូឆ្ពោះទៅរកការរំដោះជាតិរបស់សម្តេចតេជោ ហ៊ុន សែន និងយុទ្ធមិត្ត ដើម្បីរំដោះជាតិ និងប្រជាជនកម្ពុជាចេញពីការកាប់សម្លាប់នៃរបបប្រល័យពូជសាសន៍ ប៉ុល ពត។ ថ្ងៃទី២០ ខែមិថុនា ឆ្នាំ១៩៧៧ ជាពេលដែលសមមិត្ត ហ៊ុន សែន ក្នុងវ័យ ២៥ឆ្នាំ រួមនឹងយុទ្ធមិត្តដ៏ស្ម័គ្រស្មោះ ៤រូបផ្សេងទៀត បានសម្រេចចិត្តក្នុងស្ថានភាពដ៏តាន់តឹងបំផុតលាចាកទឹកដី លាចាកឧត្តមភរិយា និងកូនក្នុងផ្ទៃជាទីស្រឡាញ់ធ្វើដំណើរជ្រែកស្បៃរាត្រីឆ្លងកាត់ព្រំដែនទាំងគ្រោះថ្នាក់បំផុត ឆ្ពោះទៅកាន់ប្រទេសវៀតណាម ដើម្បីស្វែងរកគាំទ្រក្នុងការរំដោះជាតិ និងប្រជាជនកម្ពុជា ចេញពីក្រញាំបិសាចដ៏សែនឃោរឃៅ ប៉ុលពត។

ផ្តើមចេញពីដំណើរតស៊ូជាមួយទឹកចិត្តដ៏មុះមុតនោះហើយ ទើបនាំឱ្យមានការរំដោះប្រទេសជាតិ និងប្រជាជនកម្ពុជា ចេញពីរបបវាលពីឃាត ប៉ុល ពត នៅថ្ងៃទី៧ ខែមករា ឆ្នាំ១៩៧៩ ហើយឈានឆ្ពោះទៅរកការបិទបញ្ចប់ភ្លើងសង្គ្រាម បិទបញ្ចប់ការបែកបាក់ជាតិ នាំមកនូវការបង្រួបបង្រួមជាតិ ឯកភាពជាតិ និងការកសាងអភិវឌ្ឍប្រទេសឱ្យរីកចម្រើនដូចពេលបច្ចុប្បន្ន។

ដើម្បីរំលឹកដល់ស្លាកស្នាមប្រវត្តិសាស្ត្រដ៏មានគុណតម្លៃសម្រាប់ជាតិ និងប្រជាជន និងដើម្បីគាសរំលើងឱ្យឃើញនូវវីរភាពរបស់កុលបុត្រខ្មែរក្នុងការតស៊ូដើម្បីជាតិ និងប្រជាជនសម្រាប់កុលបុត្រខ្មែរជំនាន់ក្រោយនោះ ចាប់តាំងពីឆ្នាំ២០១៧នោះមក ក្រសួងការពារជាតិ ក៏បានទទួលភារកិច្ចរៀបចំប្រារព្ធពិធីដើម្បីរម្លឹកដល់ទិវានេះជារៀងរាល់ឆ្នាំ។ បន្ថែមពីលើនោះ ក៏មានការរៀបចំសាងសង់នូវសំណង់នានា នៅលើតំបន់ប្រវត្តិសាស្ត្រមួយនេះផងដែរ ដើម្បីតម្កល់ទុកជាមរតកដល់មនុស្សជំនាន់ក្រោយ៕