ដៃទន្លេអាម៉ាហ្សូន រីងស្ងួតអាក្រក់បំផុត មិនធ្លាប់មានក្នុងរយៈពេល ១២២ឆ្នាំ

ស្របពេលប្រទេសជាច្រើននៅលើពិភពលោកកំពុងជួបគ្រោះទឹកជំនន់ ប៉ុន្តែបើងាកទៅមើលតំបន់អាមេរិកឡាទីនឯណោះវិញ ដៃទន្លេអាម៉ាហ្សូន កំពុងជួបគ្រោះរាំងស្ងួតដោយទឹកស្ទឹង Negro បានធ្លាក់ចុះដល់កម្រិតទាបដ៏អាក្រក់បំផុតមិនធ្លាប់មានសោះក្នុងរយៈពេល១២២ឆ្នាំ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមការចុះផ្សាយរបស់សារព័ត៌មាន AP ដោយដកស្រង់ប្រភពពីភ្នាក់ងារភូមិសាស្រ្តប្រេស៊ីល នៅថ្ងៃសៅរ៍ទី៥ខែតុលាឆ្នាំ២០២៤, កម្ពស់ទឹកស្ទឹង Negro នៅកំពង់ផែ Manaus បានធ្លាក់ចុះដល់ ១២.៦៦ម៉ែត្រ បើធៀបទៅនឹងកម្រិតធម្មតាប្រហែល ២១ម៉ែត្រ។

មិនត្រឹមប៉ុណ្ណឹង បើតាមការព្យាករ ស្ទឹងនេះនឹងបន្តរីងទៀត នៅប៉ុន្មានសប្តាហ៍ខាងមុខ ដោយសារតែមិនសូវមានភ្លៀងធ្លាក់នៅតំបន់អាងទឹកខាងលើ។

ច្បាស់ណាស់ គ្រោះរាំងស្ងួតបែបនេះ នឹងបង្កជាផលលំបាកហើយប៉ះពាល់ខ្លាំងដល់ជីវភាពរបស់ប្រជាពលរដ្ឋ។ ជាក់ស្តែង អ្នកនាង Gracita Barbosa អាយុ២៨ឆ្នាំ ដែលធ្វើការជាអ្នកគិតលុយនៅហាងបណ្តែតទឹកមួយនៅស្ទឹង Negro បានសម្រេចចិត្ត​ឈប់​ធ្វើ​ការ ​ព្រោះ​លែងមានទូកចូលទីនោះទៀតហើយ ដោយសារតែកម្រិតទឹកទាបពេក។

សូមបញ្ជាក់ថា រាល់ដង កម្រិតទឹកទន្លេ អាម៉ាហ្សូន របស់ប្រទេសប្រេស៊ីល តែងតែហក់ឡើងនៅរដូវវស្សា ហើយស្រកវិញនៅរដូវប្រាំង ប៉ុន្តែរាំងស្ងួតដ៏ធ្ងន់ធ្ងរក្នុងឆ្នាំនេះ គឺអាក្រក់ខ្លាំងបំផុត។ មិនមែនតែស្ទឹង Negro ទេ ដៃទន្លេអាម៉ាហ្សូនសំខាន់ៗផ្សេងទៀត រួមទាំងស្ទឹង Madeira ក៏កំពុងស្ថិតក្នុងស្ថានភាពធ្ងន់ធ្ងរផងដែរ៕

អត្ថបទ៖ សុខ សុវណ្ណ

ចុចអាន៖ ទន្លេអាម៉ាហ្សូនកំពុងជួបប្រទះគ្រោះរាំងស្ងួត​ខ្លាំងបំផុត​​ក្នុង​កំណត់​ត្រា​