ឃាត់ខ្លួនជនសង្ស័យ ០៣ នាក់ និងរថយន្ត ០៣ គ្រឿង ករណីជួញដូរសារធាតុញៀន

នគរបាល​ប៉ុស្តិ៍​ព្រៃ​ស បាន​ធ្វើការ​ឃាត់​ខ្លួន​ជនសង្ស័យ​ចំនួន ០៣ នាក់ និង​រថយន្ត ០៣ គ្រឿង ក្រោយ​ជួញដូរ​សារធាតុ​ញៀន​ខុសច្បាប់។

ការ​ឃាត់ខ្លួន​នេះ​កាលពី​ថ្ងៃ​ទី ២១ ខែ​តុលា ឆ្នាំ ២០២៤ វេលា​ម៉ោង ០៤ រសៀល នៅ​ចំណុច​ផ្លូវ​បេតុង ស្ថិតនៅ​ភូមិ​ព្រៃ​ស សង្កាត់​ព្រៃ​ស ខណ្ឌ​ដង្កោ រាជធានី​ភ្នំពេញ។

ជនសង្ស័យ​ចំនួន ០៣ នាក់ រួមមាន ៖ ០១-ឈ្មោះ ម៉ា គឹម​ស្រេង ភេទ​ប្រុស ជនជាតិ​ខ្មែរ មុខរបរ​លក់​ដូរ មាន​ទីលំនៅ​ភូមិ​បឹង​ឈូក សង្កាត់​គីឡូ​លេខ ៦ ខណ្ឌ​ឫស្សី​កែវ។ ០២-ឈ្មោះ ឌឹក យិន​អ៊ី ភេទ​ប្រុស ជនជាតិ​ខ្មែរ ជា​សិស្ស មាន​ទីលំនៅ​ភូមិ​ធម្ម​ត្យ័​យ សង្កាត់​ព្រៃ​ស ខណ្ឌ​ដង្កោ។ ០៣-ឈ្មោះ សាន វណ្ណី ភេទ​ប្រុស ជនជាតិ​ខ្មែរ មុខរបរ​ជាង​ថត មាន​ទីលំនៅ​ភូមិ​ធម្ម​ត្យ័​យ សង្កាត់​ព្រៃ​ស ខណ្ឌ​ដង្កោ។

តាម​ការ​បញ្ជាក់​ពី​សមត្ថកិច្ច កម្លាំង​ប៉ុស្តិ៍​នគរបាល​រដ្ឋបាល​ព្រៃ​ស នៃ​អធិការដ្ឋាន​នគរបាល​ខណ្ឌ​ដង្កោ បាន​ឲ្យ​ដឹង​ថា កាលពី​វេលា​ម៉ោង ០៤ រសៀល កម្លាំង​ប៉ុស្តិ៍​បាន​និង​កំពុង​ធ្វើការ​ល្បាត​ក្នុង​មូលដ្ឋាន ប៉ុន្តែ​ខណៈ​ពេល​ល្បាត​មក​ដល់​ចំណុច​ផ្លូវ​បេតុង​មួយ​កន្លែង ស្ថិត​នៅ​សង្កាត់​ព្រៃ​ស បាន​ប្រទះឃើញ​ជនសង្ស័យ ០៣ នាក់ កំពុង​ប្រព្រឹត្ត​ការ​ជួញដូរ​ខុសច្បាប់​នូវ​សារធាតុ​ញៀន។ ភ្លាមៗ សមត្ថកិច្ច​បាន​ជិះ​ប្រដេញ​ឃាត់​បាន​ទាំង ០៣ នាក់ នៅ​នឹង​កន្លែង​តែម្ដង។

ជាក់ស្ដែង​បន្ទាប់ពី​ត្រួតពិនិត្យ រក​ឃើញ​វត្ថុតាង​មួយ​ចំនួន​ដូចជា ៖ ក្រាម​ពណ៌​ស​ថ្លា ចំនួន ០៣ កញ្ចប់​ថង់(​ធំ​ល្មម​ចំនួន ០២ កញ្ចប់​ថង់​, តូច​ចំនួន ០១ កញ្ចប់​ថង់​), ទូរស័ព្ទ​ដៃ​ ម៉ាក iPhone 15 Pro Max ពណ៌​ខ្មៅ​, ទូរស័ព្ទ​ដៃ ​ម៉ាក iPhone 15 Pro ពណ៌​ទឹកប្រាក់​, ទូរស័ព្ទ​ដៃ​ម៉ាក​ Samsung Z fold 4 ទឹកប្រាក់​, រថយន្ត​ម៉ាក​ Toyota Prius ពណ៌ស ផ្លាក​លេខ ភ្នំពេញ 2BV-2155, រថយន្ត​ម៉ាក ​Toyota Prius ពណ៌​ប្រផេះ ផ្លាក​លេខ ភ្នំពេញ​ 2BY-4398, រថយន្ត​ម៉ាក​ Lexus Gs300 ពណ៌​ស ផ្លាក​លេខ ភ្នំពេញ​ 2BP-4641, ជញ្ជីង​អេឡិចត្រូនិក​ចំនួន ០១ គ្រឿង​, ខ្សែដៃ​លោហធាតុ​ពណ៌​លឿង​ចំនួន ០១ ខ្សែ​, ចិញ្ចៀន​លោហធាតុ​ពណ៌​លឿង​ចំនួន ០១ វង់។

បច្ចុប្បន្ន​ជនសង្ស័យ និង​វត្ថុ​តាង​ខាងលើ ត្រូវ​បាន​សមត្ថកិច្ច​ជំនាញ​កសាង​សំណុំរឿង​បញ្ជូន​ទៅ​សាលា​ដំបូង​រាជធានី​ភ្នំពេញ ដើម្បី​ចាត់ការ​តាម​នីតិវិធី៕

អត្ថបទ ៖ រដ្ឋា