ព័ត៌មានអន្ដរជាតិ

វៀតណាមកំណត់គោលដៅ ៨ ប៊ីលានដុល្លារ សម្រាប់ការនាំចេញបន្លែ និងផ្លែឈើ ឆ្នាំនេះ

បានផុស

១ year មុន

នៅ

ថ្ងៃអង្គារ ១៤ មករា ២០២៥

ដោយ

សមាគមបន្លែ និងផ្លែឈើវៀតណាម (VINAFRUIT) បានឱ្យដឹងថា វៀតណាមបានកំណត់គោលដៅ ៨ ប៊ីលានដុល្លារ សម្រាប់ការនាំចេញបន្លែ និងផ្លែឈើ នៅឆ្នាំ ២០២៥ នេះ តាមរយៈការពង្រីកទីផ្សារ និងពង្រឹកកំណើនជាដើម។ នេះបើតាមការចុះផ្សាយរបស់ទីភ្នាក់ងារសារព័ត៌មានវៀតណាម VNA។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ភាពរឹងមាំនៃការនាំចេញបន្លែផ្លែឈើវៀតណាមក្នុងឆ្នាំ ២០២៤ ដែលកើបប្រាក់ប្រមាណ ៧,១ ប៊ីលានដុល្លារ នឹងត្រួសត្រាយផ្លូវសម្រាប់គោលដៅថ្មីរបស់វៀតណាម។ បើតាម VINAFRUIT ផលិតផលវៀតណាមបានពង្រឹងជំហររបស់ខ្លួននៅក្នុងទីផ្សារសំខាន់ៗដោយបានឡើងដល់លំដាប់ទី ២ លើទីផ្សារចិន ជាមួយនឹងកំណើនគួរឱ្យកត់សម្គាល់នៅសហរដ្ឋអាមេរិក និងថៃ។

បច្ចុប្បន្ន ផលិតផលបន្លែផ្លែឈើស្រស់ និងកែច្នៃរបស់វៀតណាម មានវត្តមាននៅក្នុងទីផ្សារជាង ៦០ នៅទូទាំងពិភពលោក។

ប្រធានសមាគម លោក Nguyen Thanh Binh បាននិយាយថា ភាពតានតឹងពាណិជ្ជកម្ម និងជម្លោះភូមិសាស្ត្រនយោបាយនឹងក្លាយជាបញ្ហាប្រឈមចម្បងសម្រាប់ការនាំចេញកសិផលនៅឆ្នាំ ២០២៥ ក៏ប៉ុន្តែគោលដៅនាំចេញចំនួន ៨ ប៊ីលានដុល្លារ គឺអាចធ្វើទៅបាន ដោយពឹងផ្អែកលើការពង្រីកចំណែកទីផ្សាររបស់សហគ្រាសវៀតណាមក្នុងទីផ្សារសំខាន់ៗ និងការវិនិយោគនៅលើបច្ចេកវិទ្យាក្រោយប្រមូលផលជាដើម។

លោកបានស្នើថា សហគ្រាសគួរតែយកចិត្តទុកដាក់លើការកែលម្អគុណភាពផលិតផល និងការលើកកម្ពស់ការប្រកួតប្រជែង ខណៈរក្សាបាននូវការគោរពយ៉ាងតឹងរឹងជាមួយនឹងកិច្ចព្រមព្រៀងពាណិជ្ជកម្មសេរីទ្វេភាគី និងពហុភាគី៕