នគរបាលខេត្តបាត់ដំបង​ដុតបំផ្លាញគ្រឿងក្នុង និងសាច់មាន់បង្កកខូចគុណភាពជិត៤តោន ក្រោយបង្ក្រាបបានជាបន្តបន្ទាប់

កម្លាំងការិយាល័យ​ប្រ​ឆាំងបទ​ល្មើសសេដ្ឋកិច្ច នៃស្នងការដ្ឋាននគរបាលខេត្តបាត់ដំបង សហការជាមួយកម្លាំងនៃសាខា ក.ប.ប​ ខេត្ត ធ្វើកា​រ​ដុតបំផ្លាញចោលនូវគ្រឿងក្នុង និង​ស្លាបមាន់បង្កកខូចគុណភាពមិនអនុលោមតាមបទដ្ឋានបច្ចេកទេសចំនួនជិត៤តោន បន្ទាប់ពីកម្លាំងបង្ក្រាបបានជាបន្តបន្ទាប់នាពេលកន្លងមក។

តាមរបាយការណ៍របស់ស្នងការដ្ឋាននគរបាលខេត្តបាត់ដំបង បានឲ្យដឹងនៅថ្ងៃទី២៧ មករានេះថា គ្រឿងក្នុង និងស្លាបមាន់បង្កកដែលត្រូវដុតបំផ្លាញចោលនៅពេលនេះ មានចំនួន ៣៤១កេស ស្មើនឹង ៣,៨៩០គី​ឡូក្រាម ដែលត្រូវដុតបំផ្លាញចោលនៅទីលានចាក់សំរាម ស្ថិតនៅភូមិអូរមុនី ឃុំអន្លង់វិល ស្រុកសង្កែ ខេត្តបាត់ដំបង។ គ្រឿងក្នុង និងស្លាបមាន់ខូចគុណភាពទាំងនេះ ត្រូវបានកម្លាំងជំនាញបង្ក្រាបបានជាបន្តបន្ទាប់កាលពីថ្ងៃទី១១ និងថ្ងៃទី១៦ ខែមករា ឆ្នាំ២​០២៥ កន្លងទៅ នៅក្នុងភូមិសាស្ត្រស្រុកសង្កែ និងស្រុកថ្មគោ​ល។

តាមរបាយការណ៍ ការបង្ក្រាបការនាំចូលសាច់បង្កកខូចគុណភាពទាំងនេះ ក៏មានការចូលរួមសហ​ការពីមហាជនផងដែរ​ ហើយសមត្ថកិច្ចក៏បន្តស្នើសុំការ​ចូលរួមសហការពីមហាជនជាបន្តទៀត និងអាជ្ញាធរពាក់ព័ន្ធដើម្បី សុវត្ថិភាព និងសុខមាលភាពរបស់ពលរដ្ឋទាំងអស់គ្នា៕