ពលរដ្ឋថា ក្នុងមូលដ្ឋានខណ្ឌ៧មករា ហាក់ស្ងប់ស្ងាត់បញ្ហាបទល្មើស និងក្រុមក្មេងទំនើង ជាពិសេសនៅតំបន់បុរីកីឡា

ប្រជាពលរដ្ឋរស់នៅក្នុងមូលដ្ឋានខណ្ឌ៧មករា ហាក់សម្ដែងក្ដីរីករាយ និងមិនសូវមានការព្រួយបារម្ភពីបញ្ហាសុវត្ថិភាពដូចមុននោះទេ នៅពេលក្នុងមូលដ្ឋានរបស់ពួកគាត់ហាក់មានភាពស្ងប់ស្ងាត់ពីបញ្ហាបទល្មើសផ្សេងៗ និងក្រុមក្មេងទំនើង ជាពិសេសនៅតំបន់បុរីកីឡា។

លោក ឈិន សៀកឡេង ពលរដ្ឋរស់នៅក្នុងមូលដ្ឋានខណ្ឌ៧មករា បានលើកឡើងថា មួយរយៈនេះគាត់សង្កេតឃើញថា បញ្ហាក្មេងទំនើង ឆក់ លួច គ្រឿងញៀនទាំងនេះ គឺបានស្ងប់ស្ងាត់តែម្តង ដោយសារតែកម្លាំងសមត្ថកិច្ចចុះល្បាត និងបង្រ្កាបជាប្រចាំ។ លោក ឈិន សៀកឡេង បន្ថែមថា នៅពេលបញ្ហាទាំងអស់នេះលែងមាន នឹងធ្វើអោយពលរដ្ឋទាំងអស់រួមទាំងគាត់ មានសុខសុវត្ថិភាព លែងមានការភ័យខ្លាចទៀតឡើយ។

លោកស្រី នីតា ជាពលរដ្ឋរស់នៅតំបន់បុរីកីឡា ក៏បានអោយដឹងដែរថា តំបន់បុរីកីឡានេះកាលពីមុនសម្បូរណាស់ក្រុមក្មេងទំនើង និងបញ្ហាលួច តែចាប់តាំងពីមានកម្លាំងនគរបាលល្បាត និងបង្រ្កាបជាប្រចាំ តំបន់នេះក៏លែងសូវមានបញ្ហា ស្ងប់ស្ងាត់ស្រួលរស់នៅ និងសុវត្ថិភាព។

ប្រជាពលរដ្ឋក្នុងមូលដ្ឋានខណ្ឌ៧មករា បានសម្ដែងអំណរអរគុណទៅកាន់អាជ្ញាធរមានសមត្ថកិច្ច ដែលបានបញ្ចេញកម្លាំងល្បាតទាំងថ្ងៃទាំងយប់ ដើម្បីការពារសុខសុវត្ថិភាពជូនពលរដ្ឋរស់នៅក្នុងមូលដ្ឋាន។ ជាមួគ្នានេះ ពួកគាត់ក៏បានសំណូមពរទៅកាន់កម្លាំងសមត្ថកិច្ច សូមបន្តល្បាតការពារបែបនេះបន្តទៀត ដើម្បីកុំអោយកើតមានបញ្ហាចោរកម្មរហូតតែម្តងទៅ។

លោកវេសេនីយ៍ឯក ជុន ប៊ុនណាន អធិការនៃអធិការដ្ឋាននគរបាលខណ្ឌ៧មករា បានបញ្ជាក់អោយដឹងថា មួយរយៈក្រោយរហូតមកដល់បច្ចុប្បន្ននេះ ក្នុងមូលដ្ឋានខណ្ឌ៧មករា គឺមិនមានក្មេងទំនើង បង្កជាបញ្ហាដល់ពលរដ្ឋទៀតនោះទេ រីឯបញ្ហាគ្រឿងញៀន ដូចជាករណីចែកចាយ និងប្រើប្រាស់ ក៏បានថមថយខ្លាំងដែរ ដោយសារលោកបានដាក់បទបញ្ជាទៅតាមបណ្ដាប៉ុស្តិ៍ទាំងអស់ ឲ្យដាក់វេនល្បាតទាំងយប់ទាំងថ្ងៃ ដើម្បីបង្កាការពារជូនពលរដ្ឋជាប្រចាំ ដូច្នេះហើយបញ្ហាទាំងអស់នេះ ក៏បានធូរស្បើយតែម្តង។

លោកអធិការបន្តថា ក្នុងខែមករាកន្លងទៅ មានករណីឆក់តែ២បទល្មើសប៉ុណ្ណោះ ប៉ុន្តែសុទ្ធតែបង្រ្កាបបាន ហើយចំពោះមុខសញ្ញាដែលកម្លាំងសមត្ថកិច្ចតាមបង្រ្កាប ភាគច្រើនកម្លាំងស្រាវជ្រាវយកបានទាំងក្រុមតែម្តង មិនអោយសល់ឬសគល់បន្តទៀត ដើម្បីរក្សាសុខសុវត្ថិភាពជូនប្រជាពលរដ្ឋនៅក្នុងមូលដ្ឋានខណ្ឌ៧មករា កុំអោយមានការភ័យខ្លាចចំពោះបញ្ហាទាំងអស់នេះ៕

អត្ថបទ៖ រដ្ឋា