អគ្គិភ័យឆេះព្រៃនៅភ្នំជីសូរយប់មិញ សមត្ថកិច្ច​សន្និដ្ឋានសង្ស័យមានអ្នកដុតភ្លើងយកឃ្មុំ​

ករណីអគ្គិភ័យឆាបឆេះព្រៃរបោះនៅជេីងភ្នំជីសូ​រ(ភ្នំតូច)ដែលមានទីតាំងស្ថិតនៅក្នុងភូមិដក់ពរ ឃុំរវៀង ស្រុកសំរោង​ ខេត្តតាកែវ​ កាលពីព្រលប់ថ្ងៃទី២៣​ ខែកុម្ភៈ​ ឆ្នាំ២០២៥ សមត្ថិកិច្ចសន្និដ្ឋានសង្ស័យមានអ្នកដុតភ្លើងដើម្បីយកឃ្មុំ​។

តាមការឲ្យដឹងពីលោកវរសេនីយ៍ឯក ភី ឆុន​ អធិការនៃអធិការដ្ឋាននគរបាលស្រុកសំរោងថា​ ក្រោយកេីតមានអគ្គិភ័យនេះ​ឡេីង​ លោកបានដឹកនាំកម្លាំងជំនាញបង្ការ និងពន្លត់អគ្គិភ័យស្រុក សហការណ៍​ជាមួយកម្លាំងប៉ុស្តិ៍រដ្ឋបាលរវៀង ប្រជាការពារ និងប្រជាពលរដ្ឋចុះជួយអន្តរាគមន៍ពន្លត់ដោយបានប្រើប្រាស់រថយន្តអង្គភាពអគ្គិភ័យ​បាញ់ពន្លត់រហូតរលត់ជាស្ថាពរនៅវេលាម៉ោង២០និង០០នាទី។​

លោកអធិការស្រុកបញ្ជាក់ថា​ អគ្គិភ័យខាងលើមិនបណ្ដាលឲ្យខូចខាតទ្រព្យសម្បត្តិប្រជាពលរដ្ឋដែលលក់ដូរនៅតាមជើងភ្នំនោះទេ​ ពិសេសមិនបណ្តាលឲ្យប៉ះពាល់ដល់ប្រាសាទបូរាណ​ គឺឆេះតែព្រៃរបោះ និងស្មៅក្រាស់នៅជេីងភ្នំអស់មួយចំនួនតែប៉ុណ្ណោះ។ ដោយឡែកតាមការសន្និដ្ឋានពីសមត្ថកិច្ចថា ករណីនេះសង្ស័យមានអ្នកដុតភ្លើងដើម្បីយកឃ្មុំ​ ហេីយធ្វេសប្រហេសទេីបកេីតជាអគ្គិភ័យយ៉ាងនេះទៅ៕​

អត្ថបទ៖ វីរៈ