ករណីបែកធ្លាយវីដេអូអធិការស្រុករតនមណ្ឌលជុំគ្នាផឹកស្រាក្នុងឯកសណ្ឋានជានគរបាល ក្រសួងមហាផ្ទៃកំពុងស្រាវជ្រាវ

ករណីបែកធ្លាយវីដេអូអធិការស្រុករតនមណ្ឌលជួបជុំគ្នាផឹកស្រាបៀរក្នុងឯកសណ្ឋានជានគរបាលជាតិ ក្រុមការងារនៃអង្គភាពជំនាញរបស់ក្រសួងមហាផ្ទៃ កំពុងពិនិត្យស្រាវជ្រាវ ដើម្បីចាត់វិធានការ បើរកឃើញថាមានកំហុសឆ្គងបែបនេះមែន។

បើតាមការបញ្ជាក់របស់អ្នកនាំពាក្យរងក្រសួងមហាផ្ទៃ លោក ទូច សុខៈ ករណីនេះ អគ្គនាយកដ្ឋានធនធានមនុស្ស នៃក្រសួងមហាផ្ទៃ កំពុងស៊ើបអង្កេត ថា ជាករណីចាស់ ឬថ្មី ហើយបើពិនិត្យរកឃើញកំហុសឆ្គងពិតមែន ក្រសួងមហាផ្ទៃ ក្រោមការដឹកនាំរបស់លោកឧបនាយករដ្ឋមន្ត្រី ស សុខា នឹងចាត់វិធានការទៅតាមបទវិន័យរបស់កងកម្លាំងនគរបាលជាតិ ដោយពុំមានការលើកលែងជាដាច់ខាត។

បន្ទាប់ពីឃើញរូបភាពឃ្លីបវីដេអូដែលបណ្តាញសង្គមផ្សព្វផ្សាយពីភាពមិនសមរម្យរបស់លោកវរសេនីយ៍ឯក សន និល អធិការ នគរបាលស្រុករតនមណ្ឌល ក្រុមការងារព័ត៌មាន និងប្រតិកម្មរហ័ស នៃស្នងការដ្ឋាននគរបាលខេត្តបាត់ដំបង ក៏បានចាត់វិធានការឱ្យផែនការងារធនធានមនុស្សធ្វើការស្រាវជ្រាវលើករណីនេះបន្ទាន់។

ក្នុងករណីរកឃើញនូវកំហុសឆ្គងដែលបង្កឡើងដោយអធិការស្រុករតនមណ្ឌល និងមន្រ្តីផ្សេងទៀតនោះពិតមែន លោកឧត្តមសេនីយ៍ទោ ដាញ់ អេងប៊ុនចាន់ ស្នងការនគរបាលខេត្តបាត់ដំបង បញ្ជាក់ថា នឹងមានវិធានការខាងវិន័យនគរបាលជាតិ ស្របតាមកម្រិតនៃអំពើនោះ។

គួរជម្រាបថា នៅថ្ងៃទី០៦ ខែមីនា ឆ្នាំ២០២៥ មានការចែករំលែកលើបណ្ដាញសង្គមនូវវីដេអូបែកធ្លាយ មានរយៈពេលប្រមាណ២នាទី ដែលបង្ហាញពីសកម្មភាពរបស់មន្ត្រីនគរបាលជាតិ កំពុងជួបជុំគ្នាផឹកស្រាបៀរជាមួយកូនចៅ ទាំងឯកសណ្ឋានជានគរបាល ខណៈមាននគរបាលស័ក្តិប្រាំម្នាក់ ដែលគេស្គាល់ថា លោកវរសេនីយ៍ឯក សន និល អធិការ នគរបាលស្រុករតនមណ្ឌល ថែមទាំងបានបង្ខំឱ្យកូនចៅផឹកស្រាទៀតផង៕