ប្រតិកម្មការចោទថា អង្គរសង្ក្រាន្ត ធ្វើឡើងដើម្បីពង្វក់យុវជន សម្ដេចធិបតី ថា ជាការបំភាន់លើព្រឹត្តិការណ៍នេះ

នាព្រឹកថ្ងៃទី១១ ខែមីនា ឆ្នាំ២០២៥នេះ នាយករដ្ឋមន្ត្រីកម្ពុជា សម្ដេច ហ៊ុន ម៉ាណែត បានប្រតិកម្មតបទៅកាន់ក្រុមបុគ្គលខ្លះ ដែលចោទថា ព្រឹត្តិការណ៍អង្គរសង្ក្រាន្ត រៀបចំឡើងដើម្បីពង្វក់យុវជន។ សម្ដេចនាយករដ្ឋមន្ត្រី ថា ការចោទដូច្នេះ ជាចេតនាបំផុសបំផុល​ឱ្យមានការភាន់ច្រឡំលើការរៀបចំព្រឹត្តិការណ៍នេះ។

កាលពីព្រឹកថ្ងៃទី៩ ខែមីនា ឆ្នាំ២០២៥ ឯកឧត្តម ហ៊ុន ម៉ានី ប្រធានសហភាពសហព័ន្ធយុវជនកម្ពុជា (ស.ស.យ.ក) និងជាប្រធានគណៈកម្មការរៀបចំព្រឹត្តិការណ៍អង្គរសង្ក្រាន្ត បានប្រកាសជាផ្លូវការនៃការត្រៀមរៀបចំព្រឹត្តិការណ៍អង្គរសង្ក្រាន្ត ឆ្នាំ២០២៥ ក្រោមប្រធានបទ «ញញឹមសាទរសង្ក្រាន្តឆ្នាំថ្មី» ដោយនឹងលើកយកនូវកេរតំណែលអរិយធម៌ វប្បធម៌ ទំនៀមទម្លាប់ និងស្នាដៃរបស់បុព្វបុរសខ្មែរមករំលេចឡើងជាផ្ទាំងទស្សនីយភាពចម្រុះដ៏សម្បូរបែបលើទឹកដីអង្គរ រយៈពេល៣ថ្ងៃ គឺថ្ងៃទី១៤ ១៥ និងថ្ងៃទី១៦ ខែមេសា ឆ្នាំ២០២៥ ក្នុងឱកាសនៃពិធីបុណ្យចូលឆ្នាំប្រពៃណីជាតិខ្មែរ។

តាមការបញ្ជាក់របស់ឯកឧត្តម ហ៊ុន ម៉ានី ឆ្នាំ២០២៥នេះ ជាឆ្នាំទី១២ហើយ ដែល ស.ស.យ.ក បានរៀបចំព្រឹត្តិការណ៍អង្គរសង្ក្រាន្ត ដើម្បីជាការអបអរសាទរបុណ្យចូលឆ្នាំថ្មីប្រពៃណីជាតិ ក៏ដូចជាការជំរុញនូវចលនាទាក់ទាញទេសចរជាតិ-អន្តរជាតិ មកខេត្តសៀមរាប។ ខណៈឆ្នាំនេះ គ្រោងនឹងរៀបចំទ្រង់ទ្រាយធំជាងឆ្នាំមុនៗ ពិសេសជាលើកទី១ ដែលមានការយាងរបស់ព្រះករុណា ព្រះបាទ សម្ដេចព្រះបរមនាថ នរោត្តម សីហមុនី ព្រះមហាក្សត្រកម្ពុជា ដើម្បីបួងសួងចម្រើនសេចក្តីសុខដល់កម្ពុជា ក្នុងព្រឹត្តិការណ៍នេះ។

ប៉ុន្តែការរៀបចំព្រឹត្តិការណ៍នេះ ត្រូវបានក្រុម​បុគ្គលមាននិន្នាការប្រឆាំងខ្លះ បាន​រិះគន់ និងចោទប្រកាន់ថា ​ជាការ​ខ្ជះខ្ជាយ​ថវិកា​ជាតិ ដើម្បី​តែ​លើក​មុខ​មាត់​រាជរដ្ឋាភិបាល ហើយបង្កើត​ព្រឹត្តិការណ៍​អង្គរ​សង្ក្រាន្ត​នេះឡើង គឺដើម្បីតែបន្លំ​កុំ​ឱ្យ​យុវជន​ចាប់​អារម្មណ៍​បញ្ហា​សង្គមទៅវិញ។

ប្រតិកម្មតបនឹងការចោទយ៉ាងដូច្នេះ សម្ដេចធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា បានចេញមកបញ្ជាក់បន្ថែមថា ការរៀបចំព្រឹត្តិការណ៍អង្គរសង្ក្រាន្ត គឺដើម្បីទាក់ទាញភ្ញៀវទេសចរ ក្នុងគោលដៅលើកស្ទួយវិស័យទេសចរណ៍នៅក្នុងខេត្តសៀមរាប ផ្ទុយពីការលើកឡើងរបស់ក្រុមបុគ្គលខ្លះ ដែល​បំផុសបំផុល​ឱ្យប្រជាពលរដ្ឋភាន់ច្រឡំលើការរៀបចំព្រឹត្តិការណ៍នេះ។ សម្ដេចធិបតី ថ្លែងដូច្នេះថា«ការរៀបចំនេះ គឺដើម្បីបង្កើតព្រឹត្តិការណ៍ទេសចរណ៍ កាលមិនសូវមាន គេវាយតម្លៃថា រដ្ឋាភិបាលអត់មានគោលនយោបាយបង្កើតព្រឹត្តិការណ៍ទេសចរណ៍ទាក់ទាញ ឥលូវរៀបចំបែបនេះ»។

សម្ដេចធិបតី ហ៊ុន ម៉ាណែត បានប្រាប់ទៅក្រុមទាំងនោះថា ការរៀបចំព្រឹត្តិការណ៍អង្គរសង្ក្រាន្ត ក៏មិនមែនដើម្បីមុខមាត់ក្រុមគ្រួសាររបស់សម្ដេចដែរ ព្រោះថា ការរៀបចំ មិនបានដាក់រូបថតក្រុមគ្រួសាររបស់សម្ដេចឡើយ។ ការរៀបចំនេះ គឺកើតចេញពីសសៃឈាមនៃសមាជិក ស.ស.យ.ក ដែលបានរៀបចំឡើងអស់រយៈពេល ១២ឆ្នាំមកហើយ មិនមែនជាលើកទី១ទេ។

ភ្ជាប់ជាមួយនឹងការឆ្លើយតបខាងលើ សម្ដេចធិបតីនាយករដ្ឋមន្រ្ដី បានអះអាងពីការត្រៀមរបស់កម្ពុជា ដែលកំពុងរៀបចំឯកសារដាក់ «មហាសង្ក្រាន្តខ្មែរ» ចូលក្នុងបញ្ជីសម្បត្តិបេតិកភណ្ឌពិភពលោករបស់អង្គការយូណេស្កូ ហើយការរៀបចំព្រឹត្តិការណ៍ អង្គរសង្ក្រាន្ត ក៏ជាផ្នែកមួយនៃការជំរុញលើកិច្ចការងារនេះដែរ៕

អត្ថបទ៖ ធឿន វ៉ាន់សុង