ស្ពានឆ្លងទន្លេបាសាក់ចាក់អង្រែ-ព្រែកប្រា​ តម្លៃ ៦០ លានដុល្លារ សម្រេចការសាងសង់ ២៥%

គិតត្រឹមខែមីនា ឆ្នាំ២០២៥ នេះ គម្រោងស្ថាបនាស្ពានឆ្លងទន្លេបាសាក់ចាក់អង្រែក្រោម-ព្រែកប្រា សម្រេចបានប្រមាណ ២៥ភាគរយ បន្ទាប់ពីដំណើរការសាងសង់រយៈពេលជាងមួយឆ្នាំ។​

លោក ផន រឹម អ្នកនាំពាក្យក្រសួងសាធារណការ និងដឹកជញ្ជូនប្រាប់កម្ពុជាថ្មី នៅថ្ងៃទី ១៣ ខែមីនា ឆ្នាំ ២០២៥ថា គម្រោងស្ថាបនាស្ពានចាក់អង្រែក្រោម-ព្រែកប្រា មានតម្លៃប្រមាណ ៦០​លានដុល្លារអាមេរិក និងប្រើរយៈពេល​សាងសង់ ៤២ ខែ ដោយប្រើឥណទានសម្បទានពី​ប្រទេស​ចិន សម្រេចបានការសាងសង់ប្រមាណ ២៥ ភាគរយ។

ស្ពានឆ្លងទន្លេបាសាក់-ចាក់អង្រែក្រោម មានប្រវែងសរុប ១.៦៥០ម៉ែត្រ (ប្រវែងស្ពាន ៨៤៥,៧០ម៉ែត្រ, ទទឹងផ្លូវ២៧ម៉ែត្រ,ផ្លូវតភ្ជាប់ក្បាលស្ពានប្រវែង ៨០៤,៣០ម៉ែត្រ, ទទឹងផ្លូវ ២៧ម៉ែត្រ) សាងសង់ដោយក្រុមហ៊ុន សំណង់សៀងហៃ, ទីប្រឹក្សាគម្រោង ដោយក្រុមហ៊ុនក្វាងចូវវ៉ានអាន។

បើតាមលោក ផន រឹម ពេលសាងសង់រួចស្ពាននេះនឹងជួយកាត់បន្ថយការកកស្ទះចរាចរណ៍លើស្ពាន​ព្រះមុនីវង្សឆ្លង​កាត់ទន្លេបាសាក់ ភ្ជាប់ផ្លូវជាតិលេខ១ នៅខណ្ឌច្បារអំពៅ ព្រមទាំងជួយពង្រឹង​ដល់ទំនាក់ទំនងសេដ្ឋកិច្ចសង្គម រវាងរាជធានីភ្នំពេញប៉ែកខាងត្បូង ព្រលានយន្តហោះអន្តរជាតិ​តេជោ ជាពិសេសធ្វើឱ្យប្រសើរឡើងដល់​ប្រសិទ្ធភាពនៃការដឹកជញ្ជូន និងភស្តុភារកម្ម​នៅក្នុងតំបន់រាជធានីភ្នំពេញ។

គួរបញ្ជាក់ថា នេះជាស្ពានទី៦ ក្នុងចំណោមស្ពានដែលបានសាងសង់រួច៖ ស្ពានឆ្លងកោះពេជ្រ-កោះនរា, ស្ពានព្រះមុនីវង្សទាំង២, ស្ពានព្រែកសំរោង-តាខ្មៅ, ស្ពានកោះអន្លង់ចិន, ស្ពានកោះធំ និងស្ពានមួយទៀតកំពុងសិក្សាភ្ជាប់ផ្លូវជាតិលេខ​២៣៕