ផលិតកម្មអំបិលក្នុងខេត្តកំពត សម្រេចបានជាង ១២ ម៉ឺនតោននៅឆ្នាំ ២០២៤

ខេត្តកំពតមានផ្ទៃដីស្រែអំបិលសរុបចំនួន ៣៤៨៩ ហិកតា ក្នុងនោះផ្ទៃដីប្រមូលផល ២៦៤០ ហិកតា និងទទួលបានទិន្នផលសរុបចំនួន ១២៨ ៤៧៥ ហិកតានៅឆ្នាំ ២០២៤។ នេះបើយោងតាមរបាយការណ៍របស់រដ្ឋបាលខេត្តកំពត។

លោក ប៊ុន ណារិន ប្រធាន​សមាគម​ផលិត​អំបិល​កម្ពុជា បានឱ្យដឹងថា ផលិត​កម្ម​អំបិល​រដូវកាលថ្មី ​បាន​ចាប់​ផ្តើមតាំងពីខែតុលា ឆ្នាំ ២០២៤​ មក ដែល​គិត​មក​ដល់​ពេល​បច្ចុប្បន្ន​នេះ គឺ​អាច​ប្រមូល​ផល​បាន​ខ្លះ​ៗ ​សម្រាប់​លក់​នៅ​លើ​ទីផ្សារ​។

លោកបញ្ជាក់ថា ការប្រមូលផលផ្អាករយៈពេល ៣០ ថ្ងៃ ចាប់ពីចុងខែ កុម្ភៈ និងដើមខែមីនា ដោយសារអាកាសធាតុធ្លាក់ភ្លៀង។ តម្លៃអំបិលបន្តធ្លាក់ចុះ​ ដែលតម្លៃ​ជា​មធ្យមអាចលក់បាន ៥ ពាន់រៀល ទៅ ៨ ពាន់រៀល ក្នុងមួយបាវ ៥០ គីឡូក្រាម នាពេល​បច្ចុប្បន្ននេះ។

យោងតាមក្រសួងឧស្សាហកម្ម ផលិតកម្មអំបិលកម្ពុជាសម្រេចបានជាង ១៦ ម៉ឺនតោន (១៦៨ ៨៨២) នៅក្នុងឆ្នាំ ២០២៤ លើ​ផ្ទៃ​ដីស្រែអំបិលជិត ៤ ពាន់ហិកតា (៣ ៩៨៧) (កំពត ៣ ៤៨៩ហិកតា កែប ៤៩៧​ហិក​តា)។

កម្ពុជាមានក្រុមផលិតអំបិលចំនួន ១៩១ ក្រុម ក្នុងនោះខេត្តកំពតផលិតបាន ១២៨ ៤៧៤ តោន ខេត្តកែប ផលិតបាន ៤០ ៤០៨ តោន​។ ការលក់ចេញបានចំនួន ៧៤ ១៨៥ តោន។

ក្នុង​មួយ​ឆ្នាំៗ​ កម្ពុជា​ត្រូវការ​អំបិល​ចន្លោះ​ពី​ ៧-១០​ ម៉ឺន​តោន ​ដើម្បី​បំពេញតម្រូវការ​​ក្នុងស្រុក​។ ក្រៅពី​ផល​អំបិល​ក្នុងស្រុក បណ្តា​ខេត្ត​នៅជាប់​ព្រំដែន​ថៃ និង​វៀតណាម ក៏​តែង​នាំចូល​អំបិល​មក​ដាក់លក់​ផងដែរ​ ប៉ុន្តែនៅឆ្នាំ ២០២៤ ពុំមាន​ការ​នាំអំបិលចូលពីបរទេសនោះទេ៕

អត្ថបទ៖ ឡេង ដេត