ថៃ បញ្ជូនទ័ព ១ ០០០នាក់ទៅជួយមីយ៉ាន់ម៉ា ទោះប្រទេសខ្លួន ក៏រងគ្រោះខ្លាំងដោយរញ្ជួយដី

រដ្ឋមន្ត្រីក្រសួងការពារជាតិថៃលោក Phumtham Vejjayachai បានប្រកាសបញ្ជូនកងទ័ព ១ ០០០នាក់ទៅប្រទេសមីយ៉ាន់ម៉ា ដើម្បីជួយដល់ប្រតិបត្តិការរុករកនិងសង្គ្រោះព្រមទាំងស្តារឡើងវិញ ដ្បិតប្រទេសខ្លួនឯណោះក៏កំពុងជួបទុក្ខដោយគ្រោះរញ្ជួយដីកម្រិតធ្ងន់ដូចគ្នានេះដែរ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

កាលពីថ្ងៃសុក្រទី២៨ខែមីនាឆ្នាំ២០២៥ គ្រោះរញ្ជួយដីកម្រិត ៧.៧រ៉ិចទ័រ បានវាយប្រហារប្រទេសមីយ៉ាន់ម៉ា ដោយទីក្រុង Mandalay រងគ្រោះខ្លាំងជាងគេ ហើយឥទ្ធិពលរបស់វា​ក៏ជះដល់រាជធានី​បាងកកនៃប្រទេសថៃ ដែលបង្កឲ្យមានការបំផ្លិចបំផ្លាញធ្ងន់ធ្ងរផងដែរ។

គិតត្រឹមព្រឹកថ្ងៃអាទិត្យ តួលេខមនុស្សស្លាប់នៅមីយ៉ាន់ម៉ា ​ បានកើនឡើងដល់ ១ ៦៤៤នាក់និងជាង ៣ ៤០០នាក់រងរបួស ចំណែកនៅថៃឯណោះ មនុស្សស្លាប់កើនដល់១៧នាក់និងរបួស៣២នាក់។

សម្រាប់ការផ្តល់ជំនួយទៅប្រទេសមីយ៉ាន់ម៉ានេះ រដ្ឋាភិបាលថៃបានចាត់តាំងឲ្យបញ្ជាការដ្ឋានកងទ័ពថៃ ត្រូវដើរតួជាអង្គភាពសំខាន់ដើម្បីបង្កើតអង្គភាពជំនួយការរញ្ជួយដីមីយ៉ាន់ម៉ា នៅទីក្រុងណៃពីដោ។

យ៉ាងណាក្រៅពីជួយរុករកនិងសង្គ្រោះ បេសកកម្មចម្បងផ្សេងទៀតគឺផ្តល់ជំនួយមនុស្សធម៌ដល់ប្រជាជន ដែលរងផលប៉ះពាល់នៅក្នុងប្រទេសមីយ៉ាន់ម៉ា និងមើលថែប្រជាជនថៃ ដែលរងផលប៉ះពាល់នៅក្នុងតំបន់នេះ៕

អត្ថបទ៖ សុខ សុវណ្ណ

ចុចអាន៖ ភាគខាងជើង ថៃ ក៏កើតភ្លើងឆេះព្រៃខ្លាំង ឯនៅ បាងកក ក៏កំពុងរងទុក្ខដោយរញ្ជួយដី