ល្បែងប្រជាប្រិយខ្មែរ ១១ប្រភេទ ត្រូវបានលើកយកលេងកម្សាន្តនៅវិទ្យាល័យព្រែកលៀប

នៅថ្ងៃថ្ងៃទី២ ខែមេសា ស្អែកនេះ វិទ្យាល័យព្រែកលាប នឹងរៀបចំកម្មវិធីសង្ក្រាន្ត ដោយមានកម្មវិធីជាច្រើន ព្រមទាំងលើកយកល្បែងប្រជាប្រិយខ្មែរ ចំនួន ១១ប្រភេទ មកលេងកម្សាន្តផងដែរ។

ល្បែងប្រជាប្រិយខ្មែរ ដែលយកមកលេងកម្សាន្តក្នុងកម្មវិធីសង្ក្រាន្ត វិទ្យាល័យព្រែកលាប រួមមាន ល្បែងទាញព្រ័ត្រ វាយក្អម ប្រកួតហូបប៉ិកួ ប្រកួតលោតបាវ ប្រកួតដណ្តើមស្លឹកឈើ លាក់កន្សែង ខ្លែងចាប់កូនមាន់ ចោលឈូង បោះអង្គញ់ រាំដណ្តើមកៅអី ពង្រាត់កូនក្រមុំ។​ ក្រៅពីការលេងល្បែងប្រជាប្រិយខាងលើនេះ ក៏មានការសម្តែង និងរាំកម្សាន្តចង្វាក់ប្រពៃណីទៀតផង។

កាលពីពេលថ្មីៗនេះ ក្រសួងអប់រំ បានធ្វើការណែនាំដល់គ្រឹះស្ថានសិក្សាសាធារណៈ និងឯកជន ក្នុងឱកាសត្រៀមអបអរសាទរសង្ក្រាន្តតាមគ្រឹះស្ថានសិក្សា ត្រូវរៀបចំឱ្យមានការលេងល្បែង និងរបាំប្រជាប្រិយខ្មែរ នៅមុន និងក្នុងឱកាសបុណ្យចូលឆ្នាំប្រពៃណីជាតិ ដើម្បីចូលរួមអភិរក្ស និងលើកកម្ពស់វប្បធម៌ ដូចជា ជំនឿ ទំនៀមទម្លាប់ ប្រពៃណីជាតិខ្មែរឱ្យបានគង់វង់ និងរីកចម្រើន។

ជាមួយគ្នានោះ ក្រសួងក៏បានហាមឃាត់ រាល់ល្បែងទាំងឡាយណាដែលមិនមែនជាល្បែង ឬរបាំប្រជាប្រិយខ្មែរ និងល្បែងមួយចំនួនដែលប្រឈមនឹងហានិភ័យ អសុវត្ថិភាព និងគ្រោះថ្នាក់ ដូចជាដុត ឬបាញ់ផាវ បាញ់ទឹក ជះទឹក លាបម្សៅ។ល៕