ក្រោយចប់ព្រឹត្តិការណ៍នគរសង្ក្រាន្ត បរិស្ថានអនាម័យតាមទីតាំងរៀបចំពិធី ត្រូវធានាបានល្អប្រសើរ ដើម្បីសោភ័ណភាពទីក្រុង

ក្រោយចប់ព្រឹត្តិការណ៍នគរសង្ក្រាន្តនៅរាជធានីភ្នំពេញហើយនោះ បញ្ហាបរិស្ថានអនាម័យតាមទីតាំងរៀបចំពិធី ត្រូវធានាបានដោយភាពល្អប្រសើរ ដើម្បីសោភ័ណភាពក្នុងទីក្រុង។

នៅតាមបណ្តាទីតាំងសំខាន់ៗ ទាំង ០៦ ក្នុងរាជធានីភ្នំពេញ ដែលមានការរៀបចំព្រឹត្តិការណ៍នគរសង្ក្រាន្ត ត្រូវបានអាជ្ញាធរ និងគណៈកម្មការគ្រប់គ្រងតាមទីតាំង បង្កើនការយកចិត្តខ្ពស់ ក្នុងការប្រមែប្រមូលសំរាម និងបាញ់លាងសម្អាតបរិស្ថានអនាម័យតាមដងផ្លូវពាក់ព័ន្ធ ក្រោយព្រឹត្តិការណ៍ ០៦ ថ្ងៃ បានទាក់ទាញប្រជាពលរដ្ឋ ភ្ញៀវជាតិ និងអន្តរជាតិជាច្រើន អញ្ជើញចញទៅលេងកម្សាន្ត។

ពលរដ្ឋ និងភ្ញៀវជាតិ សម្តែងក្តីពេញចិត្តចំពោះការថែទាំបរិស្ថានអនាម័យបានយ៉ាងល្អ ពីសំណាក់ក្រុមការងារអាជ្ញាធរ បើទោះបីជាយប់ថ្ងៃបញ្ចប់ នៃព្រឹត្តិការណ៍នគរសង្ក្រាន្ត មានមនុស្សម្នាកុះករចូលទៅកម្សាន្តក៏ដោយ ។ ជាក់ស្ដែងនាព្រឹកថ្ងៃច័ន្ទ ទី ២០ ខែមេសា ឆ្នាំ ២០២៦ នេះ អាជ្ញាធរ ក៏ដូចជា ភ្នាក់ងារពាក់ព័ន្ធ បានបាញ់ទឹកលាងសម្អាតតាមទីធ្លា សាធារណៈឲ្យមានភាពល្អប្រសើរផងដែរ។

គួរជម្រាបថា ព្រឹត្តិការណ៍នគរសង្ក្រាន្ត បានដំណើរការទៅរយៈពេល ០៦ ថ្ងៃ គិតចាប់ពីថ្ងៃទី ១៤ ដល់ថ្ងៃទី ១៩ ខែមេសា ឆ្នាំ ២០២៦ ដែលជាព្រឹត្តិការណ៍ធំរៀបចំដំបូងនៅក្របខណ្ឌរាជធានីភ្នំពេញ៕
អត្ថបទ ៖ សុភា