ព័ត៌មានជាតិ

រដ្ឋបាលស្រុកស្រីសន្ធរ រៀបចំសង្ក្រាន្តឆ្នាំថ្មី នៅបរិវេណវត្តកោះកែវ សម្រេចជាង ៧០% ហើយ

បានផុស

១ year មុន

នៅ

ថ្ងៃព្រហស្បតិ៍ ១០ មេសា ២០២៥

ដោយ

រដ្ឋបាលស្រុកស្រីសន្ធរ ធ្វើសង្ក្រាន្តឆ្នាំថ្មី នៅបរិវេណវត្តកោះកែវ ខណៈបច្ចុប្បន្នក្រុមការងារ និងព្រះសង្ឃ កំពុងមមាញឹកតុបតែងរៀបចំឲ្យធំជាងរាល់ឆ្នាំ ដើម្បីអបអរសាទរឆ្នាំថ្មី។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ដើម្បីចូលរួមអបអរសាទរសង្ក្រាន្តឆ្នាំថ្មី ប្រពៃណីជាតិខ្មែរ ឆ្នាំម្សាញ់ និងតាមការណែនាំពីសំណាក់ លោក អ៊ុន ចាន់ដា អភិបាលខេត្តកំពង់ចាម បានចាត់ឲ្យតាមបណ្តាស្រុក រៀបចំជ្រើសយកទីតាំងមួយសម្រាប់រៀបចំសង្ក្រាន្តធំ។ ជាក់ស្ដែងក្នុងស្រុកស្រីសន្ធរ អាជ្ញាធរស្រុក បានជ្រើសរើសវត្តកោះកែវ ជាទីធ្វើសង្ក្រាន្តឆ្នាំថ្មីនេះ ដោយបច្ចុប្បន្នក្រុមការងារបានតុបតែងរចនាផ្ទាំងថតរូបភាព ស្តង់តាមឃុំមកបង្ហាញ និងបំពាក់ភ្លើងពណ៌ ផ្កាភ្ញី ធ្វើយ៉ាងណាឲ្យមានភាពទាក់ទាញ និងបង្កភាពសប្បាយរីករាយក្រោមម្លប់សន្តិភាពដល់ប្រជាពលរដ្ឋទូទៅ។

ព្រះវិសុទ្ធមុនី រស់ លឹមខូយ ព្រះធម្មធរគុណខេត្តកំពង់ចាម និងជាព្រះអនុគុណស្រុកស្រីសន្ធរ និងជាព្រះចៅអធិការវត្តកោះកែវ បានមានសង្ឃដីកាថា ការរៀបចំសង្ក្រាន្តរដ្ឋបាលស្រុកស្រីសន្ធរនៅក្នុងវត្តរៀបចំបានប្រមាណជាង ៧០% ហើយ នេះជាលើកទី ១ ដែលរដ្ឋបាលស្រុកជ្រើសរើសយកវត្តកោះកែវ រៀបចំសង្ក្រាន្តធំ ពោលគឺដោយមានការគាំទ្រជួយពីអាជ្ញាធរស្រុក និងពុទ្ធបរិស័ទជិតឆ្ងាយ។

ព្រះវិសុទ្ធមុនី រស់ លឹមខូយ មានសង្ឃដីកាទៀតថា សម្រាប់សង្ក្រាន្តឆ្នាំថ្មីនេះ ក្រុមការងារបានបង្កកម្មវិធីសប្បាយកម្សាន្តជាច្រើន តាមបែបប្រពៃណី និងមានលេងល្បែងប្រជាប្រិយទៀតផង ក្នុងឱកាសបុណ្យចូលឆ្នាំប្រពៃណីជាតិខាងមុខនេះ។ ទន្ទឹមនេះដែរ សម្រាប់រដ្ឋបាលខេត្តកំពង់ចាម ក៏បានបង្កើតព្រឹត្តិការណ៍ពិសេសមួយទៀត គឺដាក់បង្ហាញលៀសហាលកំពង់ចាមប្រវែង ១.០០០ ម៉ែត្រ ស្មើលៀសចំនួន ៣ តោន នៅខាងមុខសាលាខេត្ត ដើម្បីឲ្យប្រជាពលរដ្ឋពិសាដោយសេរី នៅថ្ងៃទី ១៥ ខែមេសា ដែលចំថ្ងៃទី ២ នៃសង្ក្រាន្តកំពង់ចាម ចាប់ផ្ដើមពីម៉ោង ១៤ និង ៣០ នាទីរសៀលតទៅ៕

អត្ថបទ និង រូបភាព ៖ ឡេក ចាន់ពេជ្រ