​មនុស្ស​រាប់ម៉ឺន​នាក់​​​ជាប់គាំង​ក្នុង​​​ទឹក​​ជំនន់​ដ៏​ធ្ងន់ធ្ងរ​នៅ​ភាគ​ខាងកើត​អូស្ត្រាលី

ភ្លៀងធ្លាក់យ៉ាងគំហុកបានវាយលុកភាគខាងកើតប្រទេសអូស្ត្រាលី ជាពិសេស​ក្នុង​រដ្ឋ New South Wales ដែលបណ្តាលឱ្យមនុស្ស​៥ម៉ឺននាក់ជាប់គាំង និង​ម្នាក់​បាន​ស្លាប់​ ស្របពេល​​ជំនន់​ទឹកភ្លៀង​រីករាលដាល​យ៉ា​ងឆាប់​រហ័សបំផ្លិចបំផ្លាញហេដ្ឋារចនាសម្ព័ន្ធនានា ហើយ​អាជ្ញាធរ​​ប្រកាស​​​បិទផ្លូវ។

យោងតាមការចេញផ្សាយរបស់សារព័ត៌មាន​ CNA នៅពីថ្ងៃព្រហស្បតិ៍ទី២២ ខែឧសភានេះ ភ្នាក់ងារសង្គ្រោះបន្ទាន់របស់អូស្រ្តាលី បានបញ្ជាក់ពីការស្លាប់របស់បុរសអាយុ៦៣ឆ្នាំម្នាក់ក្នុងផ្ទះលិចទឹកក្នុងទីក្រុង Moto ចម្ងាយប្រហែល ៤០០ គីឡូម៉ែត្រភាគឦសាននៃទីក្រុងSydney។

មកដល់ពេលនេះអាជ្ញាធរ​ បានចាប់ផ្តើមប្រតិបត្តិការជួយសង្គ្រោះទ្រង់ទ្រាយធំ ដោយប្រើឧទ្ធម្ភាគចក្រ ទូក និងយន្តហោះគ្មានមនុស្សបើក ខណៈទឹកជន់លិចទីក្រុង និងតំបន់ជនបទជាច្រើន ជំរុញឱ្យអ្នកស្រុកឡើងលើដំបូលផ្ទះដើម្បីសុវត្ថិភាព។ លើសពីនេះដោយសារទឹកជំនន់ មនុស្សប្រមាណ២ម៉ឺននាក់នៅក្រុង Kempsey​ ត្រូវបានកាត់ផ្ដាច់អគ្គិសនីនិងទឹកស្អាត។

ពាក់ព័ន្ធបញ្ហានេះនាយករដ្ឋមន្ត្រីបច្ចុប្បន្ននៃរដ្ឋ New South Wales លោក Chris Minns បានព្រមានថា ស្ថានការណ៍អាចកាន់តែអាក្រក់ឡើង នឹងមានភ្លៀងធ្លាក់កាន់តែច្រើន ហើយមនុស្ស ៣នាក់ទំនងជាបាត់ខ្លួន។

បុគ្គលិកសង្គ្រោះបន្ទាន់ជាង ២,៥០០​នាក់ ត្រូវបានដាក់ពង្រាយ ប៉ុន្តែមន្ត្រីគ្រប់គ្រងគ្រាអាសន្នបានព្រមានថាវិបត្តិកំពុងបន្ត ដោយមានទន្លេជាច្រើនមិនទាន់ឈានដល់កម្រិតអាសន្ននៅឡើយ។ ភ្លៀងនៅតែបន្តធ្លាក់នៅភាគខាងកើតប្រទេសអូស្ត្រាលី ដែលតម្រូវឲ្យមានវិធានការទប់ទល់នឹងការបំផ្លិចបំផ្លាញបន្ថែមទៀត។

គ្រោះធម្មជាតិនេះគឺជាផ្នែកមួយនៃនិន្នាការទូលំទូលាយនៃបញ្ហាអាកាសធាតុប៉ះពាល់ដល់ប្រទេសអូស្ត្រាលី។ យោងតាមសាកលវិទ្យាល័យជាតិអូស្ត្រាលី ឆ្នាំ ២០២៤ បានរកឃើញសីតុណ្ហភាពជាមធ្យមលើផ្ទៃសមុទ្រកើនខ្ពស់បំផុត ដែលរួមចំណែកធ្វើឲ្យមានភ្លៀងធ្លាក់ខ្លាំង។ លោក Minns ក៏បានទទួលស្គាល់ថាប្រទេសនេះកំពុងប្រឈមមុខនឹងគ្រោះមហន្តរាយញឹកញាប់ជាងមុនផងដែរ៕

អត្ថបទ៖ ប៊ុន សុភាព