ព័ត៌មានជាតិ

កម្ពុជាប្រឈមគ្រោះទឹកជំនន់ គ្រោះរាំងស្ងួតនាពេលខាងមុខ! នាយករដ្ឋមន្រ្តីក្រើនរំឭកឱ្យត្រៀមបង្ការនិងសង្គ្រោះ

បានផុស

១៤ វិនាទី មុន

នៅ

ថ្ងៃព្រហស្បតិ៍ ២ កក្កដា ២០២៦

ដោយ

នាយករដ្ឋមន្រ្តី សម្តេចធិបតី ហ៊ុន ម៉ាណែត បានធ្វើការក្រឿនរំឭកដល់ក្រសួង ស្ថាប័នពាក់ព័ន្ធ រដ្ឋបាលរាជធានី ខេត្ត ត្រូវបន្តយកចិត្តទុកដាក់ខ្ពស់លើការងារត្រៀមបង្ការគ្រោះធម្មជាតិនានា ពិសេសគ្រោះទឹកជំនន់នារដូវវស្សា។ ទន្ទឹមនេះ កម្ពុជាក៏អាចទទួលរងនូវគ្រោះរាំងស្ងួតដោយសារកូនរដូវប្រាំងបណ្តាលមកពីបាតុភូតអែលនីញ៉ូ (El Niño)ផងដែរ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការក្រើនរំឭកនេះធ្វើឡើងតាមរយៈសារាចរមួយ កាលពីថ្ងៃទី ២៥ ខែមិថុនា ឆ្នាំ ២០២៦ ដោយសម្តេចធិបតី ហ៊ុន ម៉ាណែត បានណែនាំឱ្យស្ថាប័នពាក់ព័ន្ធត្រូវយកចិត្តទុកដាក់ចាត់វិធានការរក្សាទឹកឱ្យបានច្រើននៅពាក់កណ្តាលនិងចុងរដូវវស្សានេះ ដើម្បីត្រៀមបង្ការការខ្វះខាតទឹក និងការកើនឡើងកម្ដៅនៅរដូវប្រាំងដោយសារបាតុភូតអែលនីញ៉ូ (El Niño) បណ្តាលឱ្យរដូវប្រាំងឆ្នាំ២០២៧ ខាងមុខអាចនឹងអូសបន្លាយរយៈពេលយូរ។

ការបង្កើនការយកចិត្តទុកដាក់នេះបន្ទាប់ពី អង្គការសហប្រជាជាតិ (UN) ព្រមានថា ពិភពលោកត្រូវតែត្រៀមខ្លួនសម្រាប់ការវិលត្រឡប់មកវិញនៃបាតុភូត El Niño ដែលនាំមកនូវអាកាសធាតុដ៏អាក្រក់បំផុត ដោយមានទាំងភ្លៀងធ្លាក់ខ្លាំងបណ្តាលឲ្យទឹកជំនន់ និងគ្រោះរាំងស្ងួតដ៏អាក្រក់។

ចំណែកអង្គការឧតុនិយមពិភពលោក (WMO) បានឱ្យដឹងកាលពីដើមខែមិថុនាថា គំរូអាកាសធាតុធម្មជាតិដ៏មានឥទ្ធិពល កំពុងបង្កើនសីតុណ្ហភាពពិភពលោក និងធ្វើឱ្យភ្លៀងធ្លាក់កាន់តែអាក្រក់ទៅៗ មានឱកាសកើតឡើង ៨០% មុនខែកញ្ញា និង ៩០% បន្តរហូតដល់ខែវិច្ឆិកា។ គ្រោះមហន្តរាយរបស់បាតុភូត El Niño នឹងកើតឡើង ហើយវាទំនងជានាំមកនូវឆ្នាំដ៏ក្តៅបំផុតមួយទៀត គឺនៅឆ្នាំ២០២៧ ជាពិសេសនឹងបំផ្លិចបំផ្លាញដល់កសិកររាប់លាននាក់ និងអាចមានមនុស្សស្លាប់ជាច្រើនផងដែរ។

កន្លងទៅនាយករដ្ឋមន្រ្តី សម្តេចធិបតី ហ៊ុន ម៉ាណែត ក៏បានណែនាំ គណៈកម្មាធិការជាតិគ្រប់គ្រងគ្រោះមហន្តរាយ ត្រូវបន្តតាមដានឱ្យដិតដល់ជាមួយគណៈអភិបាលរាជធានី-ខេត្ត ដោយត្រូវកំណត់ទីទួលសុវត្ថិភាព ក្នុងករណីមានគ្រោះទឹកជំនន់ ក៏ដូចជាការចាត់វិធានការបន្ទាន់ដោយត្រៀមកម្លាំង មធ្យោបាយ សម្ភារៈចាំបាច់នានា ដើម្បីធ្វើអន្តរាគមន៍សង្គ្រោះទាន់ពេលតាមការចាំបាច់។ ការណែនាំនេះធ្វើឡើង ខណៈរដូវវស្សាចូលមកដល់ ដែលនឹងមានភ្លៀងធ្លាក់ជាញឹកញាប់ បង្កទៅជាជំនន់ទឹកភ្លៀងនៅតាមតំបន់មួយចំនួន ជាពិសេសតំបន់វាលទំនាប។

ចំណែកក្រសួងកសិកម្ម រុក្ខាប្រមាញ់ និងនេសាទ ក្រសួងសេដ្ឋកិច្ច និងហិរញ្ញវត្ថុ និងក្រសួង ស្ថាប័នពាក់ព័ន្ធ ត្រូវត្រៀម ស្បៀងនិងសម្ភារៈចាំបាច់នានា ក្នុងករណីដែលមានផលប៉ះពាល់ធំ ដែលបង្កឱ្យមានការខូចខាតដល់ដំណាំរបស់ប្រជាពលរដ្ឋដែលចាំបាច់ត្រូវជួយស្តារឡើងវិញ។

គួរជម្រាបថា គ្រោះទឹកជំនន់កន្លងមកបានបង្កផលប៉ះពាល់ដល់ផ្ទះសម្បែងរបស់ប្រជាពលរដ្ឋ និងបណ្ដាលឱ្យខូចខាតដំណាំរបស់ប្រជាកសិករ។ ដើម្បីឆ្លើយតបនឹងបញ្ហានេះ ក្រសួង និងស្ថាប័នពាក់ព័ន្ធ ដែលជាសេនាធិការរបស់រាជរដ្ឋាភិបាល បានចេញអន្តរាគមន៍ជាកញ្ចប់ថវិកា ស្បៀងអាហារ និងចែកពូជស្រូវជូនប្រជាកសិករ សម្រាប់បង្កបង្កើនផលឡើងវិញក្រោយពេលទឹកស្រក៕

Related Topics:ទឹកជំនន់