រថយន្ត បើកបំបុកក្រុមអ្នកគាំទ្រ Liverpool អំឡុងពិធីដង្ហែពាន Premier League របួសមនុស្ស ៤៧នាក់

រថយន្តមួយគ្រឿង បានបើកបំបុកក្រុមអ្នកគាំទ្រក្លឹបបាល់ទាត់ហង្សក្រហម Liverpool ពេលពួកគេចូលរួមអបអរ កម្មវិធីដង្ហែពានរង្វាន់ក្របខណ្ឌ Premier League បណ្តាលឲ្យមនុស្ស៤៧នាក់រងរបួស។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ហេតុការណ៍ដ៏រន្ធត់នេះកើតឡើងនៅលើផ្លូវ Water ក្នុងទីក្រុង Liverpool ចក្រភពអង់គ្លេស នាវេលាម៉ោង៦ល្ងាច ថ្ងៃចន្ទទី២៦ខែឧសភាឆ្នាំ២០២៥ ខណៈមនុស្សរាប់ម៉ឺននាក់កំពុងចូលរួមកម្មវិធីយ៉ាងសប្បាយរីករាយ។

តាមការបញ្ជាក់ពីសេវាសុខាភិបាល North West, ក្នុងចំណោមអ្នករបួសទាំង៤៧នាក់ មាន២០នាក់ព្យាបាលរបួសនៅនឹងកន្លែងកើតហេតុ ចំណែក២៧នាក់ទៀតត្រូវបញ្ជូនទៅមន្ទីរពេទ្យ ខណៈ២នាក់ត្រូវរបួសធ្ងន់ ក្នុងនោះរួមមានទាំងកុមារម្នាក់ផងដែរ។

ភ្លាមៗក្រោយកើតហេតុ ប៉ូលិសបានចាប់ខ្លួនអ្នកបើករថយន្ត គឺបុរសអង់គ្លេសវ័យ៥៣ឆ្នាំ ដែលជាអ្នករស់នៅក្នុងទីក្រុង Liverpool ផ្ទាល់តែម្តង។ 

ទោះបីជាយ៉ាងណាក៏ដោយ ប៉ូលិសនៅមិនទាន់រកឃើញមូលហេតុដែលបុរសរូបនេះ បើករថយន្តបំបុកហ្វូងមនុស្សឡើយ ប៉ុន្តែអាជ្ញាធរបានច្រានចោលថា ហេតុការណ៍នេះមិនមែនជាអំពើភេរវកម្មនោះទេ ហើយគាត់ធ្វើសកម្មតែម្នាក់ឯងគត់។

សូមជម្រាបថា តាមពិតទៅ Liverpool ឈ្នះពានលីគកំពូលអង់គ្លេសរដូវកាល ២០២៤/២០២៥ តាំងតែពីថ្ងៃទី២៧ខែមេសាមកម្ល៉េះ បន្ទាប់ពីឈ្នះមាន់ខ្នាយមាស Tottenham Hotspur ដោយលទ្ធផល ៥-១ នៅកីឡដ្ឋាន Anfield។

Liverpool បានបញ្ចប់រដូវកាលជាមួយ៨៤ពិន្ទុ ដាច់ក្រុមលេខ២ កាំភ្លើងធំ Arsenal ១០ពិន្ទុ ហើយជើងឯកលីគឆ្នាំនេះ គឺជាពានលីគទី២០របស់ Liverpool តាមស្មើកំណត់ត្រារបស់បិសាចក្រហម Manchester United៕

អត្ថបទ៖ សុខ សុវណ្ណ

ចុចអាន៖ រថយន្តបុករះមនុស្សតាមផ្លូវនៅកាណាដា ស្លាប់ច្រើននាក់