ជួបរាជវង្សអូម៉ង់ សម្ដេចធិបតី ថា កម្ពុជាកំពុងរកឱកាសពង្រីកការធ្វើពាណិជ្ជកម្មជាមួយមជ្ឈិមបូព៌ា

ជួបរាជវង្សរបស់អូម៉ង់ នៅក្នុងឱកាសទៅចូលរួមកិច្ចប្រជុំកំពូលអាស៊ាន នៅម៉ាឡេស៊ី នាយករដ្ឋមន្ត្រីកម្ពុជា សម្ដេចធិបតី ហ៊ុន ម៉ាណែត បានបញ្ជាក់ថា កម្ពុជា កំពុងស្វែងរកឱកាសពង្រីកការដោះដូរពាណិជ្ជកម្មជាមួយបណ្ដាប្រទេសនៅតំបន់មជ្ឈិមបូព៌ា រាប់ទាំងប្រទេសអូម៉ង់។

សម្ដេចធិបតី លើកឡើងថា កម្ពុជា និងអូម៉ង់ មានសក្ដានុពលច្រើនក្នុងការពង្រឹង និងពង្រីកកិច្ចសហប្រតិបត្តិការលើវិស័យជាច្រើន ហើយបើតាមការបញ្ជាក់របស់សម្ដេច គឺក្រសួងពាណិជ្ជកម្មកម្ពុជា​​ បាននិងកំពុងខិតខំស្វែងរកឱកាស ដើម្បីផ្សារភ្ជាប់ទំនាក់ទំនងបន្ថែមទៀតក្នុងការជំរុញទំហំពាណិជ្ជកម្ម និងការទាក់ទាញការវិនិយោគបន្ថែមពីតំបន់មជ្ឈិមបូព៌ា រួមទាំងប្រទេសអូម៉ង់។

តបនឹងការលើកឡើងរបស់នាយករដ្ឋមន្ត្រីកម្ពុជា ព្រះអង្គម្ចាស់ Sayyid Assad bin Tarik Al Said ឧបនាយករដ្ឋមន្ត្រី រដ្ឋមន្ត្រីក្រសួងទំនាក់ទំនងអន្តរជាតិ និងកិច្ចសហប្រតិបត្តិការអូម៉ង់ បានបញ្ជាក់ពីការសម្លឹងឃើញកម្ពុជា ជាប្រទេសដែលមានលក្ខណៈល្អប្រសើរក្នុងការភ្ជាប់ទំនាក់ទំនងជាមួយប្រទេសអូម៉ង់ ក៏ដូចជាបណ្តាប្រទេសនៅតំបន់មជ្ឈិមបូព៌ា។ ព្រះអង្គម្ចាស់បានបន្ថែមថា ស្របពេលដែលបណ្ដាប្រទេសនៅតំបន់ឈូងសមុទ្រពែក្សកំពុងផ្តោតមកទិសខាងកើត កម្ពុជា និងអូម៉ង់ នឹងមានឱកាសក្នុងការពង្រឹង​ និង​ពង្រីកកិច្ចសហប្រតិបត្តិការលើវិស័យជាច្រើន។

ក្នុងជំនួបនាថ្ងៃទី២៧ ខែឧសភានេះ ភាគីទាំងពីរ បានឯកភាពនឹងជំរុញកិច្ចសហប្រតិបត្តិការនៃប្រទេសទាំងពីរ ឱ្យកាន់តែរីកចម្រើនតាមរយៈការជំរុញឱ្យក្រសួងស្ថាប័នពាក់ព័ន្ធនៃប្រទេសទាំងពីរ បន្តស្វែងរកកិច្ចសហប្រតិបត្តិការលើលើវិស័យសក្តានុពលសំខាន់ៗ រួមមាន៖ ពាណិជ្ជកម្ម កសិកម្ម និងការជំរុញការតភ្ជាប់រវាងប្រជាជន​ និងប្រជាជន៕