ព័ត៌មានជាតិ

អាជ្ញាធរខណ្ឌបឹងកេងកង ផ្លាស់ប្ដូរប្រព័ន្ធលូចាស់ៗ បញ្ចៀសការជន់លិច នារដូវវស្សា

បានផុស

៤០ វិនាទី មុន

នៅ

ថ្ងៃព្រហស្បតិ៍ ២៩ ឧសភា ២០២៥

ដោយ

ដើម្បីបញ្ចៀសការជន់លិចនៅពេលមានភ្លៀងធ្លាក់ក្នុងរដូវវស្សា អាជ្ញាធរខណ្ឌបឹងកេងកង បានដាក់គ្រឿងចក្រជីកយកប្រព័ន្ធលូចាស់ទ្រុឌទ្រោមចេញ និងដាក់ប្រព័ន្ធលូបង្ហូរទឹកថ្មី ដែលមានទំហំធំជាងមុន ធ្វើឲ្យលំហូរទឹកអាចហូរបានទាន់ពេលវេលា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ជាក់ស្ដែង អាជ្ញាធរខណ្ឌបឹងកេងកង បានចាប់ផ្ដើមធ្វើការផ្លាស់ប្ដូរប្រព័ន្ធលូ ចាប់ពីចំណុចផ្លូវលេខ ៤០២ កែង ១៧៣ រហូតទៅដល់ផ្លូវលេខ ៤០២ កែង ១៩៩ ក្នុងសង្កាត់ទំនប់ទឹក ខណ្ឌបឹងកេងកង រាជធានីភ្នំពេញ។

តាមការបញ្ជាក់ពី លោក ហូរ លី ជាប្រជាពលរដ្ឋ បានលើកឡើងថា ប្រព័ន្ធលូចាស់នេះមិនអាចប្រើប្រាស់ក្នុងការបង្ហូរទឹកបានលឿននោះទេ ដោយសារតែប្រព័ន្ធលូមានសភាពចាស់ទ្រុឌទ្រោមទៅហើយ ម្យ៉ាងវិញទៀតមានទំហំតូច និងកំណកដីនៅខាងក្នុងនោះផងដែរ នៅពេលមានភ្លៀងម្ដងៗ តែងមានទឹកដក់នៅលើចិញ្ចើមផ្លូវ លំហូរទឹកមានការយឺតយ៉ាវ។

ចំណែក អ្នកស្រី ដានី ជាអ្នកលក់ដូរនៅតំបន់នោះ បានលើកឡើងពីបញ្ហាលំហូរទឹកមានការយឺតយ៉ាវនៅពេលមានភ្លៀងធ្លាក់មក។ បន្ថែមនេះ អ្នកស្រី ក៏បានសម្ដែងក្ដីសប្បាយរីករាយចំពោះការយកចិត្តទុកដាក់ពីអាជ្ញាធរពីទុក្ខលំបាករបស់ប្រជាពលរដ្ឋរស់នៅក្នុងមូលដ្ឋានផងដែរ។

ដោយឡែក លោក ហេង ពិសិដ្ឋ អភិបាលរងខណ្ឌបឹងកេងកង បានបញ្ជាក់ថា ដោយសារតែប្រព័ន្ធលូបង្ហូរទឹកទាំងនេះមានសភាពចាស់ទ្រុឌទ្រោមមិនអាចប្រើប្រាស់បានបន្តទៀត ហើយក៏មានប្រជាពលរដ្ឋរាយការណ៍មកអាជ្ញាធរពីបញ្ហាមានទឹកដក់ និងមិនអាចរំដោះទឹកបានទាន់ពេល ទើបអាជ្ញាធរបានដាក់គ្រឿងចក្រធ្វើការផ្លាស់ប្ដូរប្រព័ន្ធលូមានប្រវែង ៧៥០ ម៉ែត្រ ចាប់ពីចំណុចផ្លូវលេខ ៤០២ កែង ១៧៣ រហូតដល់ផ្លូវលេខ ៤០២ កែង ១៩៩ ដោយដាក់ប្រព័ន្ធលូទំហំ ០.៨ តឹក ដើម្បីរំដោះទឹកឲ្យបានទាន់ពេលវេលា។

ជាមួយនេះ លោកអភិបាលរង ក៏បានសំណូមពរដល់ប្រជាពលរដ្ឋក្នុងមូលដ្ឋាន សូមមេត្តាទុកដាក់សំរាមឲ្យបានត្រឹមត្រូវ និងយកសំរាមមកចោលតាមម៉ោងកំណត់របស់ក្រុមហ៊ុនប្រមូលសំរាមនីមួយៗ ជៀសវាងការចោលសំរាមទុកដាក់គ្មានសណ្ដាប់ធ្នាប់ ជាហេតុធ្វើឲ្យបាត់បង់សោភ័ណភាពក្នុងមូលដ្ឋាន និងអាចធ្វើឲ្យសំរាមធ្លាក់ចូលមាត់លូបង្កជាការជន់លិចពេលមានភ្លៀងធ្លាក់មក៕

អត្ថបទ ៖ ម៉េង