ប្រព័ន្ធលូបង្ហូរទឹក ជាផ្នែកសំខាន់ដែលអាជ្ញាធរមូលដ្ឋានត្រូវយកចិត្តទុកដាក់ ដើម្បីបញ្ចៀសការជន់លិចនៅរដូវវស្សា

ប្រព័ន្ធលូបង្ហូរទឹក គឺជាផ្នែកដ៏សំខាន់ដែលអាជ្ញាធរនៅតាមថ្នាក់មូលដ្ឋានទាំងអស់ ត្រូវចាំបាច់គិតគូរយកចិត្តទុកដាក់ ដើម្បីបញ្ចៀសការជន់លិចនៅមុនរដូវវស្សាចូលមកដល់។

កាលពីព្រឹកថ្ងៃទី ២៣ ខែមេសា ឆ្នាំ ២០២៦ នេះ អាជ្ញាធរ នៃរដ្ឋបាលខណ្ឌដូនពេញ និងការិយាល័យសាធារណការ ដឹកនាំដោយលោក ជា ខេមា អភិបាល នៃគណៈអភិបាលខណ្ឌដូនពេញ មន្ត្រីបច្ចេកទេសចុះត្រួតពិនិត្យមើលប្រព័ន្ធលូបង្ហូរទឹក និងគម្របលូ ដើម្បីជៀសវាងមានការជន់លិចទឹកលើផ្លូវ ពេលមានភ្លៀងធ្លាក់នារដូវវស្សាខាងមុខ នៅតាមបណ្តោយផ្លូវលេខ ១៣ ស្ថិតក្នុងសង្កាត់ផ្សារចាស់ សង្កាត់ផ្សារកណ្តាលទី ១ និងសង្កាត់ជ័យជំនះ ខណ្ឌដូនពេញ រាជធានីភ្នំពេញ ដែលជាប្រព័ន្ធលូមេអាទិភាពសំខាន់មួយក្នុងមូលដ្ឋាន បានដើរតួនាទីសំខាន់បម្រើដល់ការបង្ហូរទឹកជាចាំបាច់។

លោក ជា ខេមា បានឲ្យដឹងថា អាជ្ញាធរខណ្ឌ បានចាប់ផ្តើមអនុវត្តការកាយ និងស្តារប្រព័ន្ធលូអាទិភាពនេះ ដើម្បីបញ្ចៀសកុំឲ្យជន់លិចនារដូវវស្សា ដែលអាចបង្កការលំបាកដល់ពលរដ្ឋរស់នៅ និងកំពុងប្រើប្រាស់លើដងផ្លូវ។

ចំពោះកិច្ចការងារកាយ និងស្តារប្រព័ន្ធលូបង្ហូរទឹកនេះ អាជ្ញាធរទាំង ១៤ ខណ្ឌ នៅទូទាំងរាជធានីភ្នំពេញ ក៏បាននិងកំពុងយកចិត្តទុកដាក់ផងដែរ ក្នុងការធានាឲ្យប្រព័ន្ធលូតូចធំក្នុងមូលដ្ឋានរបស់ខ្លួន អាចហូរទឹកបានដោយមិនមានការរាំងស្ទះ បង្កឡើងដោយឧបសគ្គណាមួយ ដូចជា កាកសំណល់ ឬសំរាមនានា ដើម្បីបញ្ចៀសការជន់លិច ក្នុងពេលដែលរដូវវស្សាកាន់តែកៀកមកដល់៕
អត្ថបទ ៖ សុភា