ព្រែកជីកហ្វូនណនតេជោ ឈាន​ទៅបោះ​បង្គោល​​បន្ត​ពី​ព្រំប្រទល់​​ខេត្តតាកែវ​ដល់​ខេត្ត​កំពត​

បើតាម​មន្រ្តី​ក្រសួង​សាធារណការ​និងដឹកជញ្ជូន​បាន​បញ្ជាក់​ថា ក្រុមការងារបច្ចេកទេសកំពុង​ឈាន​ទៅកំណត់និយាមការ ដើម្បី​បន្ត​បោះបង្កោល​ព្រំដី​តាម​បណ្តោយព្រែកជីកហ្វូណនតេជោ ពីព្រំប្រទល់ខេត្ត​កណ្តាល​តាកែវ ទៅដល់ព្រំប្រទល់ខេត្តតាកែវ​កំពត។

លោក ផន រឹម មន្រ្តី​អ្នកនាំពាក្យក្រសួងសាធារណការនិងដឹកជញ្ជូន​បាន​ឲ្យ​ដឹង​ថា​ នៅថ្ងៃទី០៣ ខែមិថុនា ឆ្នាំ២០២៥ ក្រុមការងារចុះពិនិត្យទីតាំង ប្រមូលទិន្នន័យ ផ្ទៀងផ្ទាត់និយាមកា និងបោះបង្គោលព្រំដីតាមបណ្តោយព្រែក​ជីក​ហ្វូណន​តេជោ ក្នុងភូមិសាស្រ្តខេត្តតាកែវ នឹងចាប់ផ្តើមបោះបង្គោលបន្តចាប់ពីព្រំប្រទល់ខេត្តកណ្ដាល និង​ខេត្តកំពត ដែលគ្រោងបោះបង្គោលប្រមាណ ៥០៦ បង្គោលបន្ថែមទៀត។

លោកបន្ត​ថា គិតត្រឹមបំណាច់ខែឧសភា ឆ្នាំ២០២៥ ក្រុមការងារបច្ចេកទេសបានបញ្ចប់ការងារសម្រាប់កំណាត់ទី២ ក្នុងភូមិសាស្ត្រខេត្តកណ្តាលទាំងស្រុង ដោយបន្តពីកំណាត់ទី១ ពីភូមិសាស្ត្រព្រែកពោធិ៍ ស្របតាមបណ្តោយទន្លេបាសាក់ ឆ្ពោះទៅព្រែកតាហ៊ីង។

ជារួមលទ្ធផលនៃចំនួនបង្គោលដែលបានពិនិត្យ និងបោះរួចរាល់ក្នុងខេត្តកណ្តាលទាំងស្រុងសម្រាប់កំណាត់ទី២ មានចំនួន ២៣២ បង្គោល។

សម្រាប់កំណាត់ទី១ ក្នុងភូមិសាស្ត្រខេត្តកណ្តាល ដែលមានប្រវែង ២១ គីឡូម៉ែត្រ ចាប់ពីព្រែកតាកែវ ដល់ព្រែកពោធិ៍ ក្រុមការងារដោះស្រាយផលប៉ះពាល់ នៃក្រសួងសេដ្ឋកិច្ច និងហិរញ្ញវត្ថុ បានកំពុងបញ្ចប់ការងារវាស់វែង ក្បាលដី ដែល​រងផលប៉ះពាល់រួចរាល់។

ក្រុមការងារដោះស្រាយផលប៉ះពាល់នៃក្រសួងសេដ្ឋកិច្ច និងហិរញ្ញវត្ថុ ក្រសួងសាធារណការ និងដឹកជញ្ជូន និងរដ្ឋបាលខេត្តកណ្តាល កំពុងបន្តអនុវត្តនីតិវិធីពាក់ព័ន្ធដើម្បីបញ្ចប់ការងារនេះក្នុងពេលដ៏ខ្លីខាងមុខនេះ។

លោក​ផន រឹម បាន​អះអាង​ថា បើគ្មានការប្រែប្រួលទេ គម្រោងព្រែកជីកហ្វូណនតេជោ គ្រោងចាប់ផ្ដើមសាងសង់ជាផ្លូវការនៅចុងឆ្នាំ២០២៥ ខាងមុខ។ ដោយឡែក សម្រាប់ចំនួនគ្រឿងចក្រដែលត្រូវធ្វើការប្រើប្រាស់ក្នុងការសាងសង់ អាស្រ័យ​លើពេលវេលា ស្ថានភាព និងទីតាំងដែលជ្រើសរើសសម្រាប់បើកការសាងសង់ជាផ្លូវការ។

ជារួម ក្រុមហ៊ុនសាងសង់បានត្រៀមគ្រឿងចក្ររួចរាល់ រង់ចាំតែការអនុវត្តនីតិវិធីចាំបាច់ (ការដោះស្រាយផលប៉ះពាល់ ការបោសសម្អាតយុទ្ធភណ្ឌមិនទាន់ផ្ទុះជាដើម) ទើបការសាងសង់ចាប់ផ្តើមបាន។ លោក ផន រឹមបន្ថែម៕