ព័ត៌មានអន្ដរជាតិ

មនុស្ស១២នាក់រងរបួសក្នុងហេតុការណ៍ចាក់សម្លាប់នៅអង្គការទីជម្រកជនអនាថារដ្ឋ Oregon

បានផុស

១ year មុន

នៅ

ថ្ងៃអង្គារ ៣ មិថុនា ២០២៥

ដោយ

នៅក្នុងការវាយប្រហារដ៏រន្ធត់មួយកាលពីយប់ថ្ងៃអាទិត្យ បុរសម្នាក់ប្រដាប់ដោយកាំបិតប្រវែង ២០សង់ទីម៉ែត្របានធ្វើឲ្យបុរស១២នាក់អាយុចន្លោះពី ២៦ដល់៥៧ ឆ្នាំរងរបួស នៅឯអង្គការ Union Gospel Mission ដែលជាទីជម្រកជនអនាថានៅទីក្រុង Salem រដ្ឋ Oregon សហរដ្ឋអាមេរិក។ នេះបើយោងតាមការចេញផ្សាយរបស់ទីភ្នាក់ងារព័ត៌មានAP នៅថ្ងៃទី០៣ខែមិថុនា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ជនសង្ស័យមានឈ្មោះ Tony Williams អាយុ ៤២ ឆ្នាំ បានចូលទៅក្នុងទីតាំងកើតហេតុនៅម៉ោងប្រហែល ៧:១៥ យប់ ហើយបន្ទាប់មកបានចាប់ផ្តើមចាក់សម្លាប់មនុស្សជាច្រើននាក់។ អ្នកដែលឃើញហេតុការណ៍បានព្យាយាមធ្វើអន្តរាគមន៍ ក៏រងរបួសផងដែរ ហើយក្រោយមក Williams បានវាយប្រហារអ្នកផ្សេងទៀតនៅខាងក្រៅអគារ។

ប៉ូលិសបានចាប់ខ្លួន Williams នៅតាមផ្លូវភ្លាមៗបន្ទាប់ពីហេតុការណ៍។ ជនរងគ្រោះចំនួន ១១នាក់ រួមទាំងបុគ្គលិកអង្គការពីរនាក់ ត្រូវបានបញ្ជូនទៅមន្ទីរពេទ្យ ក្នុងនោះមានមនសុ្ស៥នាក់ស្ថិតក្នុងស្ថានភាពធ្ងន់ធ្ងរ។ អាជ្ញាធរមិនបានបង្ហាញពីមូលហេតុនាំឲ្យមានការវាយប្រហារដ៏រន្ធត់នេះទេ ប៉ុន្តែបានបញ្ជាក់ថា ការវាយប្រហារនេះមិនបានកំណត់គោលដៅជាក់លាក់លើជនអនាថានោះទេ។

មុនហេតុការណ៍ដ៏អាក្រក់នេះ Williams បានធ្វើដំណើរពីទីក្រុងPortlandមកដល់ទីក្រុង Salem កាលពីមួយថ្ងៃមុន ហើយបានទៅលេងកន្លែងកើតហេតុដែលគាត់ធ្លាប់ស្នាក់នៅពីមុន និងបានបង្កហេតុនេះឡើងមក។ បុគ្គលិក និងមន្ត្រីមូលដ្ឋានបានសម្តែងការតក់ស្លុត និងសោកសៅ ដោយការពិភាក្សាកំពុងដំណើរការដើម្បីកែលម្អវិធានការសុវត្ថិភាព ខណៈហេតុការណ៍នេះក្លាយជាហេតុការណ៍ដ៏ឃោរឃៅបំផុតមួយនៅក្នុងប្រវត្តិសាស្ត្ររបស់ទីជម្រកសម្រាប់ជនអនាថា៕