ការចរចាពន្ធបដិការ កម្ពុជា-អាមេរិក បានឯកភាពលើបញ្ញត្តិជាច្រើន

ថ្នាក់ដឹកនាំកម្ពុជា-អាមេរិកនឹងជួបប្រជុំចរចារជុំ ៣ ជុំវិញពន្ធបដិការរវាងកម្ពុជា-អាមេរិកនៅពេលឆាប់ៗខាងមុខនេះបន្តទៀត។

កាលពីថ្ងៃទី ០៤-០៦ ខែមិថុនា លោកឧបនាយករដ្ឋមន្ត្រី ស៊ុន ចាន់ថុល និង​ជា​អនុ​ប្រ​ធានទី១ នៃក្រុមប្រឹក្សាអភិវឌ្ឍន៍កម្ពុជា បានដឹកនាំគណៈប្រតិភូជួបប្រជុំចរចាជុំទី ២ ជា​មួយ​លោក​ស្រី Sarah Ellerman អនុប្រធានតំណាងពាណិជ្ជកម្មសហរដ្ឋអាមេរិក ទទួលបន្ទុក​តំបន់​​អាស៊ី​អាគ្នេយ៍ និងប៉ាស៊ីហ្វិក។

សេចក្ដីប្រកាសព័ត៌មានរបស់អ្នកនាំពាក្យរាជរដ្ឋាភិបាលកម្ពុជាបង្ហាញថា៖ «ក្នុងកិច្ចប្រជុំចរចារជុំទី២ នេះ ភាគីទាំងពីរបានបន្តពិភាក្សាគ្នា លើអត្ថបទសេចក្ដីព្រាងកិច្ចព្រមព្រៀងពាណិជ្ជកម្មបដិការ ដោយឈរលើស្មារតីយោគយល់គ្នាខ្ពស់ និងបាន​ឈានទៅឯកភាពគ្នាលើបញ្ញត្តិជាច្រើន»។ ភាគីទាំងពីរគ្រោងនឹងរៀបចំកិច្ចប្រជុំចរចារជុំទី៣ នៅពេលឆាប់ៗ ខាងមុខនេះ នៅរដ្ឋធានីវ៉ាស៊ីនតោន៕