ក្រសួងមុខងារ នឹងរៀបចំការប្រឡងជ្រើសរើស មន្រ្តីចូលក្រសួង ស្ថាប័នចំនួន៤

នៅព្រឹកថ្ងៃទី១៧ ខែមិថុនា ឆ្នាំ២០២៥ ឯកឧត្តម ហ៊ុន ម៉ានី ឧបនាយករដ្ឋមន្រ្តី រដ្ឋមន្រ្តីក្រសួងមុខងារសាធារណៈ បានអញ្ជើញជាអធិបតីដឹកនាំកិច្ចប្រជុំពិភាក្សាលើការរៀបចំដំណើរការប្រឡងប្រជែងជ្រើសរើសមន្រ្តីរាជការ និងមន្រ្តីផ្អែកលើកិច្ចព្រមព្រៀងការងារ ឱ្យចូលបម្រើការងារក្នុងក្របខណ្ឌក្រសួង ស្ថាប័នចំនួន៤។ នេះបើតាមការផ្សព្វផ្សាយរបស់ក្រសួងមុខងារសាធារណៈ នៅរសៀលថ្ងៃទី១៧ ខែមិថុនា។

ក្រសួងបញ្ជាក់ថា ការប្រឡងរើសមន្រ្តីចូលក្រសួង ស្ថាប័នទាំង៤ មានដូចជា ក្រសួងកសិកម្ម រុក្ខាប្រមាញ់ និងនេសាទ, ការប្រឡងរើសមន្ត្រីចូលបម្រើការនៅអគ្គលេខាធិការដ្ឋានក្រុមប្រឹក្សាអ្នកច្បាប់ ក្នុងក្របខណ្ឌទីស្តីការគណៈរដ្ឋមន្រ្តី (លើកទី២), ការប្រឡងក្នុងក្របខណ្ឌក្រសួងការបរទេស និងសហប្រតិបត្តិការអន្តរជាតិ និងការប្រឡងមន្ត្រីផ្អែកលើកិច្ចព្រមព្រៀងការងារ សម្រាប់ក្រសួងសុខាភិបាល។

ប្រភពដដែល បញ្ជាក់ថា មន្ត្រីដែលត្រូវជ្រើសរើសតាមរយៈការប្រឡងប្រជែងរួមមាន៖ (១) «មន្រ្តីកសិកម្មឃុំ» ក្របខណ្ឌក្រសួងកសិកម្ម រុក្ខាប្រមាញ់ និងនេសាទ ចំនួន ៣៧២ កន្លែង (២) «មន្រ្តីច្បាប់» ឱ្យចូលបម្រើការងារនៅអគ្គលេខាធិការដ្ឋានក្រុមប្រឹក្សាអ្នកច្បាប់ ក្នុងក្របខណ្ឌទីស្តីការគណៈរដ្ឋមន្រ្តី (លើកទី២) ចំនួន ៨ កន្លែង (៣) «មន្រ្តីជាន់ខ្ពស់» ក្របខណ្ឌក្រសួងការបរទេស និងសហប្រតិបត្តិការអន្តរជាតិ ចំនួន៥០ កន្លែង និង (៤) «មន្រ្តីសុខាភិបាល (មន្ត្រីផ្អែកលើកិច្ចព្រមព្រៀងការងារ)» សម្រាប់ក្រសួងសុខាភិបាល ចំនួន ៦៩៩ កន្លែង (មន្រ្តីគិលានុបដ្ឋាកបរិញ្ញាបត្រ ៥៦កន្លែង, មន្រ្តីគិលានុបដ្ឋាកមធ្យម ៣១០កន្លែង, មន្រ្តីឆ្មបបរិញ្ញាបត្រ ៤៧កន្លែង, និងមន្រ្តីឆ្មបមធ្យម ២៨៦កន្លែង)៕