រយៈពេលជិត៦ខែឆ្នាំនេះ កម្ពុជាមានអ្នកស្លាប់៥នាក់ ដោយសារជំងឺផ្តាយសាយបក្សី ភាគច្រើនជាកុមារ

យោងតាមរបាយការណ៍ប្រចាំខែរបស់ក្រសួងសុខាភិបាល បានឱ្យដឹងថា នៅក្នុងរយៈពេលជិត៦ខែឆ្នាំ២០២៥ នេះ ​កម្ពុជាមានអ្នកស្លាប់ចំនួន៥នាក់ និងឈឺចំនួន ២ នាក់ ដោយសារជំងឺផ្តាសាយបក្សី (H5N1) ដែលអ្នកស្លាប់ភាគច្រើនជាកុមារ។

បើតាមរបាយការណ៍លម្អិត អ្នកស្លាប់ចំនួន៥នាក់នោះ រួមមានកុមារអាយុក្រោម ១២ឆ្នាំ ចំនួន៣នាក់ និង ២នាក់ជាមនុស្សពេញវ័យ។ ករណីស្លាប់ទាំងនោះរួមមាន កុមាររាអាយុ ២ឆ្នាំ ៧ខែ នៅខេត្តព្រៃវែង កុមាររាអាយុ ៣ឆ្នាំ៦ខែ នៅខេត្តក្រចេះ និងកុមាររាអាយុ១១ឆ្នាំ រស់នៅខេត្តកំពង់ស្ពឺ។ ចំណែកករណីស្លាប់២នាក់ទៀត  គឺជាបុរសអាយុ៥២ឆ្នាំ នៅខេត្តស្វាយរៀង និងបុរសអាយុ២៨ឆ្នាំ រស់នៅខេត្តកំពង់ចាម។

ចំណែកអ្នកជំងឺផ្តាសាយបក្សី ០២នាក់ទៀត រួមមានស្ត្រីអាយុ៦៥ឆ្នាំ រស់នៅស្រុកព្រៃកប្បាស ខេត្តតាកែវ ត្រូវបានរកឃើញថាមានជំងឺផ្តាសាយបក្សីនៅថ្ងៃទី ១២ ខែមិថុនា និងស្ត្រីអាយុ៤១ឆ្នាំ រស់នៅស្រុកពួក ខេត្តសៀមរាប ត្រូវបានរកឃើញនៅថ្ងៃទី២៣ខែមិថុនាឆ្នាំ២០២៥។

ក្រសួងសុខាភិបាល បញ្ជាក់ថា៖«​ បច្ចុប្បន្ននេះ ស្ថានភាពរបស់អ្នកជំងឺនេះកំពុងស្ថិតក្នុងសភាពធ្ងន់ធ្ងរ និងកំពុងទទួលបានការថែទាំយ៉ាងយកចិត្តទុកដាក់ពីសំណាក់ក្រុមគ្រូពេទ្យ។ រោគសញ្ញានៃអ្នកជំងឺ មានដូចជា គ្រុនក្តៅ ក្អក ហត់ និងពិបាកដកដង្ហើមជាដើម»។ ករណីឆ្លងជំងឺផ្តាសាយបក្សីនេះ បន្ទាប់ពីអ្នកជំងឺ បានកាន់និងប៉ះពាល់មាន់ឈឺ និងងាប់រួចយកមកធ្វើម្ហូបទទួលទានបាន ៥ថ្ងៃ មុនថ្ងៃដែលអ្នកជំងឺចាប់ផ្តើមឈឺ។

ជាថ្មីម្តងទៀត ក្រសួងសុខាភិបាល ក្រើនរំឭកដល់បងប្អូនប្រជាពលរដ្ឋទាំងអស់ សូមយកចិត្តទុកដាក់ប្រុងប្រយ័ត្នលើជំងឺផ្តាសាយបក្សីជានិច្ច ដោយកុំប៉ះពាល់ ឬបរិភោគ សត្វមាន់ ទា ដែលឈឺ ឬងាប់។

ក្រសួងបញ្ជាក់ថា ពីព្រោះជំងឺផ្តាសាយបក្សី H5N1 នៅតែបន្តគំរាមកំហែងដល់សុខភាពប្រជាពលរដ្ឋ ហើយក្នុងករណីមានអាការៈក្តៅខ្លួន ក្អក ហូរសំបោរ ឬ ពិបាកដកដង្ហើម និងមានប្រវត្តិធ្លាប់បានប៉ះពាល់ជាមួយមាន់ទាឈឺ ឬងាប់ក្នុងអំឡុង១៤ថ្ងៃមុនថ្ងៃចាប់ផ្តើម មានរោគសញ្ញា សូមកុំទៅជួបជុំ ឬទីប្រជុំជនដែលមានមនុស្សច្រើន។ លើសពីនេះ ត្រូវស្វែងរកការពិគ្រោះយោបល់ និងការពិនិត្យព្យាបាលនៅមណ្ឌលសុខភាព ឬមន្ទីរពេទ្យ ដែលនៅជិតជាបន្ទាន់ ចៀសវាងការពន្យារពេល ធ្វើឱ្យប្រឈមនឹងហានិភ័យខ្ពស់នៃការស្លាប់ជាយថាហេតុ៕

អត្ថបទ៖ សំអឿន