អ្នកជំនាញអះអាង ជម្លោះព្រំដែនកម្ពុជា-ថៃ ជំរុញឱ្យពាណិជ្ជកម្មទ្វេភាគី​កម្ពុជា-វៀតណាមកើនឡើង

នៅក្នុងឆមាសទី១ ឆ្នាំ ២០២៥ ទំហំពាណិជ្ជកម្មកម្ពុជា-វៀតណាមសម្រេចបាន​ទឹកប្រាក់​ជាង ៤,៣៤ ពាន់លានដុល្លារ កើនឡើង ៧,២% ធៀបនឹងរយៈពេលដូចគ្នានៅឆ្នាំ ២០២៤។ នេះបើ​យោង​​តាមអគ្គនាយកដ្ឋានគយ និងរដ្ឋាករកម្ពុជា​(GDCE)។

ទិន្នន័យរបស់ GDCE បានបង្ហាញថា ជាមួយនិងទំហំនៃការនាំចេញ-នាំចូលរវាងប្រទេសទាំងពីរ ក្នុងនោះកម្ពុជា​នាំចេញ​ទៅ​វៀត​ណាម​មានទំហំទឹកប្រាក់ប្រមាណ ២,១៩ ពាន់លានដុល្លារ កើន​​ឡើង ៨,២% ចំណែកវៀតណាមនាំចូលមកវិញ មានទំហំទឹកប្រាក់ ២,១៤% កើនឡើង ៦,៣%។

លោក ឡោ វិចិត្រ អនុប្រធានសមាគមពាណិជ្ជកម្មកម្ពុជា-ចិន ប្រាប់កម្ពុជាថ្មីនៅថ្ងៃទី ១៥ ខែ​កក្កដា ឆ្នាំ ២០២៥ថា ស្ថាន​ភាពនៅចំពោះមុខ យើងមានជម្លោះព្រំដែនជាមួយប្រទេសថៃ ខណៈ​​​រដ្ឋាភិបាលកម្ពុជា-វៀតណាម ប្ដេជ្ញាជំរុញទំហំពាណិជ្ជកម្មឱ្យដល់ ២០ ពាន់លានដុល្លារ ក្នុងពេល​ឆាប់ៗ​ខាងមុខ។ លោកថា៖ «ដោយសារមានជម្លោះដែនគោក វាធ្វើឱ្យចរន្តទំនិញដែលយើង​ធ្លាប់​​​ទិញ​ពីថៃ អាចជំនួសវិញដោយទំនិញមកពីវៀតណាម ឬម៉ាឡេស៊ី ឬកូរ៉េ»។

កម្ពុជា-វៀតណាម បានចុះហត្ថលេខាលើកិច្ចសម្របសម្រួលជំរុញពាណិជ្ជកម្មទ្វេភាគីកម្ពុជា-វៀតណាម២០២៥-២០២៦ ដែលនឹង​ចូលរួមចំណែកឈានទៅសម្រេច​បានគោលដៅ​ទំហំពាណិជ្ជ​កម្ម​​ចំនួន ២០ ពាន់ដុល្លាអាម៉េរិក តាមការដាក់ចេញរបស់ថ្នាក់ដឹក​នាំកំពូល​នៃប្រទេស​ទាំងពីរ។

លោកបណ្ឌិត ហុង វណ្ណៈ អ្នកជំនាញ​សេដ្ឋកិច្ច​នៃ​រាជបណ្ឌិត្យសភាកម្ពុជាមានប្រសាសន៍ថា ដោយ​សារ​កាកម្មង់ ការបញ្ជាទិញពីប្រទេសដែលមានតម្រូវការ ដំណើរការល្អ ធ្វើឱ្យពាណិជ្ជកម្ម​អន្តរ​ជាតិ​របស់កម្ពុជាបន្តមានកំណើន។

យោងតាមក្រសួងពាណិជ្ជកម្ម នៅក្នុងឆ្នាំ ២០២៤ ការដោះដូរទំនិញកម្ពុជា-វៀតណាម​សម្រេច​បាន​ទឹកប្រាក់​ ៧,៧៨ ពាន់លានដុល្លារ ក្នុងនោះកម្ពុជា​នាំចេញ​ទៅ​វៀត​ណាម​មានទំហំទឹក​ប្រាក់​ ជាង ៣,៦១ ពាន់លានដុល្លារ កើន ២១,៦% និងវៀត​ណាម​នាំ​ចូល​មកកម្ពុជាវិញ មានទំហំទឹកប្រាក់ ៤,១៦ ពាន់លានដុល្លារ កើន ១៥,៤% បើប្រៀបធៀបនឹងឆ្នាំ ២០២៣៕

អត្ថបទ៖ ឡេង ដេត