ក្រុមហ៊ុន HF FRUIT ផ្ដើមនាំចេញទុរេនជើងដំបូងជាង ១០ តោនទៅចិន

ក្រុមហ៊ុនវេចខ្ចប់ទុរេន អេចអេហ្វ ហ្រ្វូត ឯ.ក (HF FRUIT LTD.) នៅថ្ងៃទី ១៧ ខែកក្កដា ឆ្នាំ ២០​​២៥ បានចាប់ផ្ដើមនាំចេញទុរេនទូដំបូងប្រមាណជាង ១៧ តោន ទៅទីផ្សារប្រទេសចិន តាម​កំពង់​ផែក្រុងព្រះសីហនុ។

ការនាំចេញជើងដំបូងនេះ បានធ្វើឡើង បន្ទាប់ពី អគ្គរដ្ឋបាលគយចិន (GACC) កាលពីថ្ងៃទី ០៥ ខែកក្កដា បានវាយតម្លៃ និងយល់ព្រមលើសំណើចុះបញ្ជីចម្ការទុរេនចំនួន ១១២កន្លែង និងរោង​ចក្រ​វេចខ្ចប់ចំនួន ៣០កន្លែង ដែលបានបំពេញតាមគោល​ការណ៍​កសិកម្មល្អ (GAP) លក្ខខណ្ឌ​ភូត​គាមអនាម័យ និងស្តង់ដាសុវត្ថិភាពចំណី​អាហារ​របស់ប្រ​ទេសចិន។

បុគ្គលិកក្រុមហ៊ុន HF FRUIT កញ្ញា ទូច មុន្នីរស្មី បានឱ្យដឹងថា តាមផែនការក្រុមហ៊ុន គ្រោងនឹង​នាំចេញ​រាប់រយតោន នៅឆ្នាំនេះ ខណៈនេះជាជើងដំបូងដែលក្រុមហ៊ុន​ចាប់ផ្ដើមនាំ​ចេញទៅចិន។

លោក ហេង ឆេងលី ប្រធានសហគមន៍ទុរេនបែកអន្លូង ប្រាប់​កម្ពុ​ជាថ្មីថា អគ្គនាយកដ្ឋាន កសិ​កម្មនៃក្រសួងកសិកម្មជ្រើសរើស​យកចម្ការចំនួន ១០ ខណៈសហគមន៍របស់លោក​បាន​ស្នើចុះ​បញ្ជី​សម្រាប់​ការបញ្ជាក់វិញ្ញា​បនបត្រការអនុវត្តកសិកម្មល្អ(Cam-GAP)។

លោក ហេង ឆេងលី បញ្ជាក់ថា ចម្ការសហគមន៍របស់លោកប្រមាណជាង ៦០ បន្ថែមទៀត គ្រោងនឹងរៀប​ចំចុះបញ្ជី ដើម្បីថ្នាក់ជាតិចុះពិនិត្យកែតម្រូវ មុនពេលចិនមកត្រួតពិនិត្យ។

បើតាម​លោក ឆេងលី ប្រសិនបើទុរេនកម្ពុជាមានឱកាសនាំចេញទៅទីផ្សារចិន កាន់​តែ​ល្អ​សម្រាប់ទុរេន​យើង​​សម្រាប់កសិករគាត់មានជម្រើសច្រើន។

ក្រសួងកសិកម្មក៏អំពាវនាវឱ្យម្ចាស់ចម្ការទុរេន និងរោងចក្រវេចខ្ចប់ ត្រូវបន្តអនុវត្តឱ្យ​បានខ្ជាប់ខ្ជួន​តាម​លក្ខខណ្ឌនៃពិធីសារដែលកំណត់ដោយគ្មានសមាសភាពចង្រៃ គ្មានសំណល់ថ្នាំកសិកម្ម ឬសារធាតុគីមីហាមឃាត់ ដើម្បីធានានូវគុណភាព និងនិរន្តរភាព​នៃការនាំចេញ។

ក្រសួងកសិកម្មក៏បានជំរុញឱ្យម្ចាស់ចម្ការ និងរោងចក្រវេចខ្ចប់ផ្សេងទៀត ដែលមានបំណង​នាំ​ចេញ រួសរាន់​មកដាក់ពាក្យ ស្នើសុំចុះបញ្ជីជាមួយអគ្គនាយកដ្ឋានកសិកម្ម ដើម្បីទទួល​បានការ​វាយ​តម្លៃ។

មកដល់បច្ចុប្បន្ននេះ ផ្លែទុរេនស្រស់គឺជាកសិផលទី៩ របស់កម្ពុជា ដែលត្រូវបានអនុញ្ញាតឱ្យ​នាំចេញ ដោយផ្ទាល់ទៅចិនបន្ទាប់​ពីអង្ករ កន្ទក់អង្ករ ចំណិតដំឡូងមីក្រៀម ពោត ផ្លែចេក ស្វាយ ផ្លែមៀន និងម្រេច។

យោងតាមក្រសួងកសិកម្ម នៅក្នុងរយៈពេល ៥ ខែ (មករា-ឧសភា) ឆ្នាំ ២០២៥ ការនាំចេញ​ទុរេនរបស់កម្ពុជា​សម្រេចបានតែជាង ១,២ តោន ធ្លាក់ចុះសឹងតែ ១០០% បើធៀបនឹងរយៈ​ពេលដូច​គ្នា​កាល​ពីឆ្នាំមុន ចំនួនជាង ៦,២២ ពាន់​តោន​ ប៉ុន្តែកត្តាទីផ្សារ​ពុំមានបញ្ហាចោទ​នោះ​ឡើយ ដោយសារ​តែ​តម្រូវការក្នុងស្រុកខ្ពស់​។

លោក ហេង ឆេងលី បញ្ជាក់បន្ថែមថា ទោះការនាំចេញធ្លាក់ចុះ ប៉ុន្តែតម្រូវការទីផ្សារក្នុងស្រុកនៅ​តែ​ដំ​ណើរ​​ការ​ល្អ ជា​មួយ​តម្លៃមានស្ថិរភាព។

គិតត្រឹមឆ្នាំ ២០២៤ កម្ពុជាមានផ្ទៃដី​ដាំដុះ​ទុរេនជាង ៩ ពាន់ហិកតា ក្នុងនោះផ្ទៃដីអាចប្រមូល​ផល​​បាន ៥ ពាន់ហិកតា ដែលផ្ដល់​ទិន្នផល​ប្រមាណ ៨ ម៉ឺន ២ ពាន់តោន៕

អត្ថបទ៖ ឡេង ដេត